নিউজ ডেস্ক, ৫ জানুৱাৰী : দিল্লী আৰক্ষীৰ বিশেষ কোষৰ দলে হিজবুল মুজাহিদীনৰ সন্ত্ৰাসবাদী জাভেদ মাট্টুক গ্ৰেপ্তাৰ কৰাৰ পিছত নিতৌ নতুন নতুন তথ্য ওলাই আহিছে । জেৰাত প্ৰকাশ পাইছে যে জাভেদ আৰু তেওঁৰ ছয় সহযোগী প্ৰায় ডেৰ দশক ধৰি ভাৰতৰ বিৰুদ্ধে সন্ত্ৰাসবাদী ষড়যন্ত্ৰত জড়িত হৈ আছে । তেওঁলোক আটাইকেইজনে পাকিস্তানৰ পৰা প্ৰশিক্ষণ লাভ কৰিছিল । আনহাতে, তেওঁৰ ছয় সহযোগীৰ মাজৰ দুজন পাকিস্তানলৈ পলায়ন কৰিছে । আনহাতে, বিভিন্ন সময়ত নিৰাপত্তা বাহিনীৰ সৈতে সংঘৰ্ষত চাৰিজন নিহত হৈছে । এই সহযোগীকেইজনৰ নামো তেওঁ প্ৰকাশ কৰিছে ।
আব্দুল মজিদ জাৰ্গাৰ : ইয়াৰ ভিতৰত প্ৰথম নাম হৈছে আব্দুল মজিদ জাৰ্গাৰ ওৰফে শ্বাহিন । তেওঁ মূলত জম্মু-কাশ্মীৰৰ ছোপোৰৰ বাসিন্দা আৰু বৰ্তমান পাকিস্তানত লুকাই আছে । তাৰ পৰাই তেওঁ হিজবুল মুজাহিদীন কেডাৰৰ আন এটা গোট চম্ভালি আছে । তেওঁ পাকিস্তানৰ পৰায়ে জাভেদ মাট্টুকো চম্ভালিছিল । লগতে সন্ত্ৰাসবাদী কাৰ্যকলাপৰ বাবে ধন যোগান আৰু প্ৰয়োজন হ'লে সীমান্তৰ সিপাৰৰ পৰা অস্ত্ৰ-শস্ত্ৰ যোগান ধৰিছিল ।
আব্দুল কাইয়ুম নাজাৰ : সন্ত্ৰাসবাদীকেইজনৰ মাজত আন এটা নাম হৈছে আব্দুল কাইয়ুম নাজাৰ । তেওঁ হৈছে এজন প্ৰশিক্ষিত সন্ত্ৰাসবাদী । তেৱোঁ ছোপোৰৰ বাসিন্দা । তেওঁ সাতজন সন্ত্ৰাসবাদীৰ এটা দলক নেতৃত্ব দি আছিল । কিছুদিন পূৰ্বে নিৰাপত্তাৰক্ষীৰ সৈতে হোৱা সংঘৰ্ষত তেওঁ নিহত হয় ।
তাৰিক আহমেদ লোন : তৃতীয় সন্ত্ৰাসবাদীজনৰ নাম হৈছে তাৰিক আহমেদ লোন । তেওঁ এজন পাকিস্তানত প্ৰশিক্ষিত সন্ত্ৰাসবাদী । তেওঁ জম্মু-কাশ্মীৰৰ হান্দৱাৰাৰ বাসিন্দা আছিল । সুৰক্ষা বাহিনীৰ পৰা ৰক্ষা পাবলৈ তেওঁ নদীত জাঁপ দিয়াত মৃত্যু হয় ।
ইমতিয়াজ কুণ্ডু : চতুৰ্থ সন্ত্ৰাসবাদীজনৰ নাম হৈছে ইমতিয়াজ কুণ্ডু । তেৱোঁ জম্মু-কাশ্মীৰৰ ছোপোৰৰ বাসিন্দা আৰু পাকিস্তানত প্ৰশিক্ষণ লাভ কৰা সন্ত্ৰাসবাদী । তেওঁ ২০১৫-১৬ বৰ্ষত ভাৰতৰ পৰা পলায়ন কৰি পাকিস্তান পাইছিল আৰু বৰ্তমান তাৰে পৰা আব্দুল মজিদ জাৰ্গাৰৰ সৈতে কাম কৰি আছে ।
মেৰাজ হালৱাই : পঞ্চম সন্ত্ৰাসবাদীজনক মেৰাজ হালৱাই বুলি চিনাক্ত কৰা হৈছে । তেওঁ জম্মু-কাশ্মীৰৰ শিৱপুৰীৰ বাসিন্দা আছিল । পাকিস্তানৰ পৰা প্ৰশিক্ষণপ্ৰাপ্ত সন্ত্ৰাসবাদীজনক পূৰ্বতে সংঘৰ্ষৰ সময়ত সুৰক্ষা বাহিনীয়ে হত্যা কৰে ।
ৱাছিম গুৰু : সপ্তম সন্ত্ৰাসবাদীজনক ৱাছিম গুৰু বুলি চিনাক্ত কৰা হৈছে । তেৱোঁ ছোপোৰৰ বাসিন্দা । তেওঁকো সুৰক্ষা বাহিনীয়ে সংঘৰ্ষৰ সময়ত হত্যা কৰে ।
লগতে পঢ়ক :আদালতৰ সেউজ সংকেত, ৰাজ্যসভা নিৰ্বাচনত প্ৰতিদ্বন্দিতা কৰিব পাৰিব সঞ্জয় সিঙে
