দুপৰীয়া 3 বজাৰ দহটা শীৰ্ষ বাতৰি

দুপৰীয়া 3 বজাৰ দহটা শীৰ্ষ বাতৰি...

কোকৰাঝাৰ জিলাৰ গ্ৰীণফিল্ড বডোফা নগৰত আজি দিনৰ 11 বজাত অনুষ্ঠিত হয় চতুৰ্থখন বিটিচি পৰিষদৰ শপতগ্ৰহণ অনুষ্ঠান ৷ বিটিচি পৰিষদৰ মুখ্য কাৰ্যবাহী হিচাপে শপত গ্ৰহণ কৰে ইপিপিএলৰ প্ৰমোদ বড়োয় ৷

আফগান শান্তি প্ৰক্ৰিয়াৰ বাবে আমেৰিকাৰ বিশেষ প্ৰতিনিধি জালময় খালিজাডৰ নেতৃত্বত এটা দলে পাকিস্তান স্থলসেনা প্ৰধান জেন. কমৰ জাৱেড বাজৱাৰ সৈতে আলোচনাত মিলিত হয় ।

ক'ভিড ১৯ আৰু ব্ৰেক্সিটৰ পিচতেই প্ৰথমবাৰৰ বাবে চাৰিদিনীয়া ভ্ৰমণসূচীৰে ভাৰতত উপস্থিত হৈছে সংযুক্ত গণৰাজ্যৰ বৈদেশিক সচিব ডমিনিক ৰাব । সোমবাৰে ভাৰতত উপস্থিত হোৱা ডমিনিক ৰাবে ভাৰতৰ বৈদেশিক মন্ত্ৰী এছ জয়শংকৰৰ সৈতে দুয়োখন দেশৰ উমৈহতীয়া আঞ্চলিক আৰু আন্ত:ৰাষ্ট্ৰীয় বিষয়সমূহত আলোচনাত মিলিত হ'ব ।

মাজুলীৰ ভকতিদুৱাৰ গাঁৱৰ ভৱেন খাউণ্ড আৰু সাবৃত্তি খাউণ্ডৰ কন্যা নৱনীতা খাউণ্ডৰ দেহত ধৰা পৰিছে দুৰাৰোগ্য এছ.এল.ই ৰোগ । হঠাতে অহা এই কালধুমুহা সদৃশ ৰোগে পৰিয়ালটোৰ বাবে কঢ়িয়াই আনিছে অমানিশা ।

কামৰূপ জিলা ৰাভা ছাত্ৰ সন্থাৰ উদ্যোগত বকোৰ গান্ধী মৈদান খেল পথাৰত অনুষ্ঠিত কৰা হৈছিল আন্তঃ ৰাভা হাছং ফুটবল প্ৰতিযোগিতা ৷ ১৪ ডিচেম্বৰৰ পৰা অনুষ্ঠিত হোৱা অষ্টম বাৰ্ষিক জননেতা 'সব্যসাচী ৰাভা সোঁৱৰণী' ফুটবল প্ৰতিযোগিতাৰ চূড়ান্ত খেলখনত গোৱালপাৰাৰ কুৰুৱাবাচা কৃষ্ণজ্যোতি সংঘই বিজয়ী দলৰ সন্মান লাভ কৰিবলৈ সক্ষম হয় ৷

দেশৰ প্ৰখ্যাত এৰ'স্পেছ বৈজ্ঞানিক তথা পদ্ম বিভূষণ বঁটাৰে সন্মানিত ৰোড্ডাম নৰসিমহাৰ ৮৭ বছৰ বয়সত দেহাৱসান ঘটে । বেংগালুৰুৰ এখন ব্যক্তিগত চিকিৎসালয়ত চিকিৎসাধীন হৈ আছিল বৈজ্ঞানিকগৰাকী ।

চৰকাৰী গৃহ আবন্টনৰ বিপৰীতে হিতাধিকাৰীৰ পৰা ধন দাবী কৰাৰ অভিযোগ ৷ শোণিতপুৰ জিলাৰ 72 নং বৰছলা বিধানসভা সমষ্টিৰ অন্তৰ্গত বিহগুৰি আৰু বৰছলা উন্নয়ন খণ্ডৰ অধীনস্থ প্ৰতিটো গাঁও পঞ্চায়তৰ অন্তৰ্গত অঞ্চলত চৰকাৰী আঁচনি ৰূপায়ণৰ নামত বৃহৎ দুৰ্নীতি সংঘটিত হোৱাৰ অভিযোগ ৷ বিধায়ক গণেশ লিম্বুৰ ঘৰ ঘেৰাও কৰাৰ হুংকাৰ কৃষক শ্ৰমিক সুৰক্ষা সংগ্ৰাম সমিতিৰ ৷

প্ৰগতি মানে বিজেপি, বিজেপি মানে প্ৰগতি শীৰ্ষক গীত গুণগুণাই ভোটাৰ ৰাইজক আকৃষ্ট কৰাৰ চেষ্টা ৰঞ্জিৎ দাসৰ ৷ নিৰ্বাচনী প্ৰচাৰ সভাত গীতৰ কলিৰে নিৰ্বাচনী বৈতৰণী পাৰ হোৱাৰ আখৰা বিজেপিৰ ৰাজ্যিক সভাপতি গৰাকীৰ ৷ তিৱা স্বায়ত্ব শাসিত পৰিষদৰ নিৰ্বাচনত প্ৰায় আটাইকেইখন বিজেপিয়ে লাভ কৰিব বুলি মন্তব্য দাসৰ ৷

বিদ্যালয়ৰ সাজতে আঘোনৰ পথাৰত ধান দোৱাত ব্যস্ত মাজুলীৰ এজাক শিক্ষাৰ্থী ৷ ছাত্ৰীসকলৰ দলটোৱে পথাৰত ধান দাই কৃষক ৰাইজক সহায় কৰিছে ধান চপোৱাত ৷ শিক্ষাৰ্থীক পাঠ্যপুথিৰ শিক্ষাৰ মাজতে সীমাবদ্ধ নাৰাখি ব্যৱহাৰিক জ্ঞানেৰে দীক্ষিত কৰি তোলাৰ উদ্দেশ্যে মেৰাগড় নাৰায়ণদেৱ উচ্চতৰ মাধ্যমিক বিদ্যালয় কৰ্তৃপক্ষই লৈছে এই ব্যতিক্ৰমী পদক্ষেপ ৷

অসহায় যুৱতীক ৰক্ষা কৰিবলৈ গৈ আক্ৰমণৰ বলি এটা ব্যক্তিগত টিভি চেনেলৰ সাংবাদিক আফনুৰ আলী ৷ নিশা গুৱাহাটী চিকিৎসা মহাবিদ্যালয়ত সংঘটিত এই কাণ্ডত গুৰুতৰভাৱে আহত সাংবাদিক তথা যুৱতীগৰাকী ৷