নেশ্যনেল ডেস্ক, 22 জুলাই : হিমাচল প্ৰদেশত প্ৰকৃতিৰ ৰুষ্ট ৰূপ ৷ এই দুৰ্যোগৰ সময়ত হিমাচলৰ ব্যাস নদীত ফেনে ফুটুকাৰে উফন্দি উঠিছিল ৷ ব্যাস নদীৰ বাঢ়নি পানীয়ে বহুতো পথ, দলং আৰু বাসগৃহ উটুৱাই লৈ গৈছিল ৷ একে সময়তে, এই দুৰ্যোগৰ সময়ত বহুলোক সন্ধানহীন হৈছিল, সম্প্ৰতি সন্ধানহীন লোকসকলৰ মৃতদেহ ব্যাস নদীত উপঙিবলৈ অৰম্ভ কৰিছে ৷
এতিয়ালৈকে ব্যাস নদীৰ পৰা 20 টা মৃতদেহ উদ্ধাৰ কৰা হৈছে, ইয়াৰে ভিতৰত 15 জন লোকক চিনাক্ত কৰা হৈছে, আনহাতে 21 জন লোক এতিয়াও সন্ধানহীন হৈ আছে বুলি জানিব পৰা গৈছে ৷
ইফালে চিনাক্ত নোহোৱা মৃতদেহসমূহ চিনাক্তকৰণৰ বাবে ধলপুৰৰ চিকিৎসালয়ত ৰখা হৈছে ৷ ইতিমধ্যে কুল্লু আৰক্ষীৰ দ্বাৰা আইনী ব্যৱস্থা সম্পূৰ্ণ কৰা হৈছে ৷ মৰণোত্তৰ পৰীক্ষাৰ পিচত মৃতদেহসমূহ পৰিয়ালৰ সদস্যসকলক হস্তান্তৰ কৰা হৈছে ৷ আনহাতে জিলা প্ৰশাসনে ব্যাস নদীৰ পাৰত এছডিআৰএফ দলো নিয়োজিত কৰিছে ৷
জানিব পৰা মতে, ভাৰতীয় নৌসেনাৰ তিনিজন বিষয়াও শেহতীয়াকৈ কুল্লু জিলাৰ পৰ্যটন চহৰ মানালী ভ্ৰমণ কৰিবলৈ আহিছিল ৷ ইয়াৰে দুজন বিষয়াৰ মৃতদেহ উদ্ধাৰ কৰা হৈছে ৷ আনহাতে এজন বিষয়া এতিয়াও সন্ধানহীন হৈ আছে ৷ তিনিওজন বিষয়া 8 জুলাইত কানপুৰৰ পৰা মানালীলৈ আহিছিল ৷ মানালীত বান হোৱাৰ পিচতেই বিষয়াকেইগৰাকীৰ পৰিয়ালৰ লোকে তেওঁলোকৰ সৈতে যোগাযোগ কৰিবলৈ চেষ্টা কৰিছিল, কিন্তু তিনিজন বিষয়াৰ সৈতে কোনো সম্পৰ্ক হোৱা নাছিল ৷
শেহতীয়াকৈ উত্তৰ প্ৰদেশৰ কবি নগৰ গাজিয়াবাদৰ পৰা অহা ভাৰতীয় নৌসেনাৰ এজন বিষয়া নিখিল চাক্সেনাৰ মৃতদেহ 9 জুলাইত উদ্ধাৰ কৰা হৈছিল ৷ মৃতদেহ ঘৰৰ লোকক চমজাবলৈ পথ বন্ধ হৈ থকাৰ বাবে কুল্লু মানালী আৰক্ষীয়ে পৰিয়ালৰ সন্মতিত তেওঁৰ অন্ত্যেষ্টিক্ৰিয়া সম্পন্ন কৰে ৷
