নিউজ ডেস্ক, ১৩ জুলাই : উত্তৰ ভাৰতত এতিয়া বান পৰিস্থিতি । ধাৰাসাৰ বৰষুণৰ ফলত কেইবাখনো ৰাজ্য বানৰ কবলত পৰিছে । পাহাৰীয়া অঞ্চলবোৰত বিধ্বংসী পৰিস্থিতিৰ সৃষ্টি হোৱাৰ পিছত নদীবোৰে এতিয়া সমভূমিতো ধ্বংসলীলাৰ সৃষ্টি কৰিছে । হাৰিয়ানাত চলিত বাৰিষাৰ বৰষুণে বিধ্বংসী ৰূপ ধাৰণ কৰি আছে । এতিয়ালৈকে ৰাজ্যখনত বৰষুণৰ বাবে হোৱা বান পৰিস্থিতিত ১৬ জন লোকৰ মৃত্যু হৈছে । উল্লেখ্য যে বিগত পাঁচ ঘণ্টাতে পাঁচজনকৈ লোকৰ মৃত্যু হৈছে ৰাজ্যখনত । আনহাতে, বানপানীৰ ফলত হাৰিয়ানাৰ বহু জিলাৰ পৰিস্থিতি শোচনীয় হৈ পৰিছে । বানপানীৰ ফলত পঞ্চকুলা, আম্বালা, কুৰুক্ষেত্ৰ, যমুনানগৰ, কৰ্ণাল, পানীপথ, ফতেহাবাদ আৰু সোনিপটৰ লগতে কাইথালৰ কেইবাখনো গাঁও ক্ষতিগ্ৰস্ত হৈছে ।
আনহাতে, হাৰিয়ানাত বানপানীৰ ফলত হোৱা মৃত্যুৰ সংখ্যা ১৬ জনলৈ বৃদ্ধি পাইছে । ৰাজ্যখনৰ বিভিন্ন জিলাৰ ৭৪৯ খন গাঁও বানপানীৰ কবলত । এতিয়ালৈকে ২ লাখ ২২ হাজাৰ হেক্টৰ কৃষিভূমি বানপানীৰ ফলত প্ৰভাৱিত হৈছে । বানপানীয়ে প্ৰায় ২০৬ টা ঘৰ সম্পূৰ্ণৰূপে ক্ষতিগ্ৰস্ত কৰিছে । ইয়াৰ উপৰি ১৬৮ টা ঘৰ আংশিকভাৱে ক্ষতিগ্ৰস্ত হৈছে । ৰাজ্যখনত বানৰ ফলত প্ৰায় ১৭৫ টা পশুধনৰ মৃত্যু হৈছে । ১৯ টা সাহায্য শিবিৰ স্থাপন কৰা হৈছে ।
ইফালে পানী জমা হোৱাৰ ফলত ৰাস্তাবোৰো যথেষ্ট ক্ষতিগ্ৰস্ত হৈছে । লগতে বহু ঠাইত দলং আৰু গাৰ্ড ৱালবোৰো ক্ষতিগ্ৰস্ত হৈছে । পঞ্চকুলা, আম্বালা, কৰ্ণাল আৰু কাইথাল জিলাত এনডিআৰএফৰ দল মোতায়েন কৰা হৈছে । আনহাতে, আম্বালা আৰু পানীপথত সেনাৰ সহায় লোৱা হৈছে ।
