নলবাৰীৰ শ্ৰীশ্ৰী হৰি মন্দিৰত ৯১ সংখ্যক ৰাস মহোৎসৱৰ ব্যাপক প্ৰস্তুতি, ৰাসলৈ আহিব ৰাম-সীতা

নলবাৰী : শৰতৰ জোৎস্না প্লাৱিত পূৰ্ণিমা নিশাৰ পৰা ৰাজ্যৰ ভিন্ন প্ৰান্তৰ লগতে উত্তৰ পূৰ্বাঞ্চল প্ৰসিদ্ধ নলবাৰীৰ পবিত্ৰ শ্ৰী শ্ৰী হৰিমন্দিৰত ৰাস মহোৎসৱক লৈ চলিছে ব্যাপক প্ৰস্তুতি । অহা ১৫ নৱেম্বৰৰ পৰা ২৭ নৱেম্বৰলৈকে তেৰদিনীয়া বৰ্ণাঢ্য কাৰ্যসূচীৰে অনুষ্ঠিত হ’ব ৯১ সংখ্যক শ্ৰীশ্ৰী ৰাস মহোৎসৱ ।

তেৰদিনীয়া বৰ্নাঢ্য কাৰ্যসূচীৰে অনুষ্ঠিত হ'ব লগা ৰাস মহোৎসৱ এইবেলি উদ্বোধন কৰিব টেলিভিছনৰ বহুল সমাদৃত হিন্দী ধাৰাবাহিক ‘ৰামায়ণ’ত ৰাম-সীতাৰ চৰিত্ৰত অভিনয় কৰা দুই শিল্পী অৰুণ গোভিল আৰু দীপিকা চিখলীয়াই । আৰু ৰামায়ণ ধাৰাবাহিকতে অভিনয় কৰা সোতৰ গৰাকী শিল্পীয়ে পৰিৱেশন কৰিব "ৰাস মধুৰম"শীৰ্ষক এক মনোমোহা অনুষ্ঠান ।

উল্লেখ্য যে, মৃণ্ময়মূৰ্তি প্ৰধান নলবাৰীৰ ৰাসত বিগত দুবছৰৰ লেখীয়াকৈ এইবাৰো সমাহাৰ ঘটিব পুতলা ৰাস আৰু জীৱন্ত ৰাসৰ । ইয়াৰোপৰি নলবাৰীৰ ৰাস মহোৎসৱত প্ৰতিবাৰৰ দৰে এইবাৰো চলিব ভ্ৰাম্যমাণ থিয়েটাৰ অঘোষিত মহাৰণ । ৰাজ্যৰ আগশাৰীৰ দহটাকৈ ভ্ৰাম্যমাণ নাট্যদল অৱতীৰ্ণ হ'ব এই মহাৰণত ।

ভ্ৰাম্যমাণ থিয়েটাৰৰ নাট উপভোগ কৰিব বিচৰা দৰ্শকসকলে অনলাইনযোগে বুকিং কৰিব পাৰিব নিজৰ টিকট । পোন প্ৰথমবাৰৰ বাবে কৰা হৈছে এই ব্যৱস্থা । ৰাস মহোৎসৱত আকৰ্ষণৰ কেন্দ্ৰবিন্দু হ'ব শ্ৰীকৃষ্ণৰ নৌকা বিহাৰ, আইফেল টাৱাৰ, ইণ্ডিয়া গেট । লগতে অসম প্ৰকাশন পৰিষদৰ দ্বাৰা গ্ৰন্থমেলা, বাণিজ্য মেলা আদি থাকিব নলবাৰীৰ ৰাস মহোৎসৱত ।

প্ৰতিদিনে লক্ষাধিক ভক্তৰে উথপথপ পৰিৱেশ বিৰাজ কৰিব লগা নলবাৰীৰ ৰাস মহোৎসৱৰ শান্তি-শৃংখলাৰ দিশটো চোৱা-চিতাৰ দায়িত্বত নিয়োজিত থাকিব হাজাৰোধিক স্বেচ্ছাসেৱক আৰু একেলগে পাঁচ হাজাৰ লোকে বহিব পৰা বিশাল পেণ্ডেল । মুঠতে ৰাসলৈ আৰু মাত্ৰ এসপ্তাহ বাকী থকা অৱস্থাত এতিয়া হৰি মন্দিৰ চৌহদত চলিছে ব্যাপক প্ৰস্তুতি ।

লগতে পঢ়ক : ৰাসৰ আখৰাত ব্যস্ত মাজুলীয়াল লগতে পঢ়ক :ৰাসলৈ বেছি দিন নাই; মুখা তৈয়াৰত ব্যস্ত মাজুলীৰ চামগুৰি সত্ৰৰ মুখাশিল্পীসকল