ৰকিবুল হুছেইনক গৰিহণা নগাঁও প্ৰেছ ক্লাবৰ

নগাঁও, 23 ফেব্ৰুৱাৰী: বৃহস্পতিবাৰে নিশা নগাঁও ৰাজীৱ ভৱনত কৰা হৈছিল এক বিতৰ্কিত পষ্টাৰিং ৷ উক্ত বাতৰি পৰিৱেশন কৰা দুগৰাকীকৈ সাংবাদিকক লক্ষ্য কৰি শুকুৰবাৰে গুৱাহাটীত ৰকিবুল হুছেইনে কৰা মন্তব্যক লৈ ব্যাপক প্ৰতিক্ৰিয়াৰ সৃষ্টি হৈছে নগাঁও সংবাদ মহলত ।

নগাঁও লোকসভা সমষ্টিৰ প্ৰাৰ্থিত্বক লৈ কংগ্ৰেছ দলত সৃষ্টি হোৱা বাদ-বিসম্বাদৰ মাজতে বৃহস্পতিবাৰে নিশা ‘ৰকিবুল হুছেইনৰ অভিমন্যু বধ’ নাম দিয়া এখন প'ষ্টাৰ লগোৱা বুলি খবৰ লাভ কৰিয়েই ৰাজীৱ ভৱনত উপস্থিত হৈছিল কেইগৰাকীমান সাংবাদিক । কিন্তু বিতৰ্কিত প’ষ্টাৰিং সন্দৰ্ভত দুগৰাকী সাংবাদিকে নিজৰ চেনেলত লাইভ সম্প্ৰচাৰ কৰাৰ পিচতেই সাংবাদিক দুগৰাকীৰ বিৰুদ্ধেহে খড়্গহস্ত হৈ পৰে কংগ্ৰেছ নেতা ৰকিবুল হুছেইন ।

উল্লেখ্য যে ৰকিবুল হুছেইনৰ হাৰ্ডিঙৰ ওপৰতে ৰকিবুল হুছেইনক কৌৰৱৰ ৰূপত দেখুওৱাৰ লগতে নগাঁও লোকসভা সমষ্টিৰ প্ৰাৰ্থিত্বপ্ৰত্যাশী সাংসদ গৌৰৱ গগৈক অভিমন্যুৰ ৰূপত দেখুৱাই প'ষ্টাৰিং কৰিছিল কোনো অচিনাক্ত লোকে । উক্ত প'ষ্টাৰিঙৰ বাতৰি বিভিন্ন সংবাদ মাধ্যমত সম্প্ৰচাৰ হোৱাৰ লগতে দুটাকৈ চেনেলত লাইভ সম্প্ৰচাৰ হৈছিল ।

বাতৰি পৰিৱেশন কৰা সাংবাদিকক লক্ষ্য কৰি ৰকিবুল হুছেইনে কৰা মন্তব্যক শুকুৰবাৰে গৰিহণা দিয়ে নগাঁও প্ৰেছ ক্লাবৰ লগতে নগাঁও ডিজিটেল এণ্ড ইলেকট্ৰ’নিক মিডিয়া এছ'চিয়েশ্যনকে আদি কৰি কেবাটাও সংগঠনে ।

লগতে পঢ়ক: নগাঁও ৰাজীৱ ভৱনত কোনে আঁৰিলে অভিমন্যু বধৰ পোষ্টাৰ ?