নুনমাটিত ভয়ংকৰ অগ্নিকাণ্ডৰ ঘটনা; কেইবালাখ টকাৰ সা-সম্পত্তিৰ ক্ষয়-ক্ষতি

গুৱাহাটী, 24 ফেব্ৰুৱাৰী: মহানগৰীৰ নুনমাটিত সংঘটিত হৈছে ভয়ংকৰ অগ্নিকাণ্ডৰ ঘটনা । শনিবাৰে পুৱাৰ ভাগত নুনমাটি শিৱ মন্দিৰৰ সমীপত থকা পেলনীয়া সামগ্ৰী মজুত ৰখা দোকান আৰু গাড়ীৰ ছিট নিৰ্মাণ কৰা দোকানত এই অগ্নিকাণ্ডৰ ঘটনা সংঘটিত হয় । প্ৰথমে পেলনীয়া সামগ্ৰী মজুত ৰখা দোকানত জুইৰ সূত্ৰপাত ঘটে আৰু পৰৱৰ্তী সময়ত আন দোকানলৈ এই জুই সম্প্ৰসাৰিত হয় ।

পেলনীয়া সামগ্ৰী মজুত ৰখা দোকানখনত লগা জুইৰ ফলত অঞ্চলটো ধোঁৱাই আগুৰি ধৰে । পিছত স্থানীয় লোকৰ খবৰৰ ভিত্তিত ঘটনাস্থলীত উপস্থিত হোৱা তিনিখনকৈ অগ্নিনিৰ্বাপক বাহিনীৰ গাড়ীয়ে কেবাঘণ্টাৰ অন্তত জুই নুমুৱাবলৈ সক্ষম হয় । বৈদ্যুতিক শ্বৰ্ট চাৰ্কিটৰ ফলত এই জুইৰ সূত্ৰপাত হোৱা বুলি সন্দেহ প্ৰকাশ কৰিছে আৰক্ষীয়ে ।

এই অগ্নিকাণ্ডৰ ফলত ব্যৱসায়িক প্ৰতিষ্ঠান দুখনৰ কেইবালাখ টকাৰ সা-সম্পত্তি বিনষ্ট হোৱা বুলি জানিব পৰা গৈছে । ব্যৱসায়িক প্ৰতিষ্ঠান দুখনৰ গৰাকী হৈছে ৰাজেশ ৰস্তোগী আৰু মুকুল শইকীয়া ।

লগতে পঢ়ক: ৰঙিয়াত অগ্নিকাণ্ড, অগ্নিদগ্ধ শতায়ু গৰকা বৃদ্ধা