ৰঙিয়াত ৰাইজৰ ৰোষত ড্ৰাগছ সৰবৰাহকাৰীসহ আসক্ত যুৱক

ৰঙিয়া, ২৫ ফেব্ৰুৱাৰীঃ ৰঙিয়াত উদিয়ানাত ৰাইজৰ ৰোষত সৰবৰাহকাৰীসহ ড্ৰাগছ আসক্ত যুৱক । ড্ৰাগছ আসক্তক কাণত ধৰাই ৰাইজে শাস্তি দিয়াৰ পিচত গতালে আৰক্ষীক । ঘটনাৰ বিৱৰণি অনুসৰি শনিবাৰে উদিয়ানাৰ ৰাইজে খেদি খেদি কৰায়ত্ত কৰে ড্ৰাগছ সৰবৰাহকাৰীটো সৈতে এটা ড্ৰাগছ আসক্তক । বিলাসীপাৰাৰ পৰা এজন যুৱকে ৰঙিয়াৰ উদিয়ানাৰ উষ্কাৰ আলী নামৰ ড্ৰাগছ সৰবৰাহকাৰীটোৰ পৰা নিবলৈ আহিছিল ড্ৰাগছখিনি । ধৃত ড্ৰাগছ আসক্ত যুৱকজন হৈছে বিলাসীপাৰাৰ নিত্য বৰ্মন ।  

স্থানীয় ৰাইজে দুই ড্ৰাগছ সৰবৰাহকাৰী আৰু আসক্তৰ গতিবিধি প্ৰত্যক্ষ কৰি খেদি খেদি কৰায়ত্ত কৰে । তিনিটা কণ্টেইনাৰত ড্ৰাগছ আৰু ভাং জব্দ কৰে স্থানীয় ৰাইজে । উত্তেজিত ৰাইজে এই দুই যুৱকক কাণত ধৰাই ৰাজহুৱা শাস্তি প্ৰদান কৰি আৰক্ষীক খবৰ দিয়াত ৰঙিয়া আৰক্ষী ঘটনাস্থলীত উপস্থিত হৈ দয়োটাকে থানালৈ নিয়ে ।  

উল্লেখ্য যে ৰঙিয়াৰ উদিয়ানা অঞ্চলত ড্ৰাগছৰ বেহা বৃদ্ধি পাবলৈ ধৰিছে । স্থানীয় ৰাইজে গাঁওসভাৰ আয়োজন কৰি সন্দেহজনক লোকৰ ওপৰত তীক্ষ্ণ নজৰ ৰাখিছে যদিও হ্ৰাস পোৱা নাই ড্ৰাগছ ব্যৱসায়ীৰ দপদপনি । 

লগতে পঢ়ক:কাছাৰত আৰক্ষীৰ অভিযানত জব্দ প্ৰায় 24 কোটি টকা মূল্যৰ ড্ৰাগছ