এবছৰৰ ভিতৰত সম্পূৰ্ণ হ'ব জোঙাল বলহু পৰ্যটন ক্ষেত্ৰ : নিৰ্মাণ কাৰ্যৰ বুজ ল’লে মুখ্যমন্ত্ৰীয়ে - Jongal Balahu Tourist Centre

ৰহা, 13 জুলাই : শনিবাৰে ৰহাৰ ঐতিহাসিক জোঙাল বলহু ক্ষেত্ৰত উপস্থিত হৈ পৰ্যটন ক্ষেত্ৰৰ কামৰ অগ্ৰগতিৰ বুজ লয় মুখ্যমন্ত্ৰী ড৹ হিমন্ত বিশ্ব শৰ্মাই ৷ এই সময়ছোৱাত মুখ্যমন্ত্ৰগৰাকীক সংগ দিয়ে মন্ত্ৰী পীযুষ হাজৰীকা, বিধায়ক শশীকান্ত দাস, ৰূপক শৰ্মা, জিতু গোস্বামী আৰু ৰমাকান্ত দেউৰীয়ে ৷  

উল্লেখ্য যে ইতিহাস প্ৰসিদ্ধ বীৰ ৰজা জোঙাল বলহুৰ স্মৃতি বিজড়িত ঐতিহ্য ক্ষেত্ৰখন আধুনিক পৰ্যটন ক্ষেত্ৰ হিচাপে গঢ় দিয়াৰ বাবে চৰকাৰে 50 কোটি টকাৰ আৱণ্টন দিছিল ৷ 2023 চনৰ 3 জানুৱাৰী জোঙাল বলহু দিৱসত ইয়াৰ আধাৰশিলা স্থাপন কৰিছিল মুখ্যমন্ত্ৰীয়ে ৷ লগতে মুখ্যমন্ত্ৰীয়ে এই নিৰ্মাণকাৰ্য অহা এবছৰৰ ভিতৰত সম্পূৰ্ণ হ'ব বুলি সংবাদিকৰ আগত জানিবলৈ দিয়ে ৷ ইফালে তিৱা জনগোষ্ঠীৰ সংস্কৃতিৰ ধ্বজাবাহক ডেকা চাং, চামাদি আদিও এই পৰ্যটনস্থলীত নিৰ্মাণ কৰা হ'ব বুলি উল্লেখ কৰে মুখ্যমন্ত্ৰী ড৹ হিমন্ত বিশ্ব শৰ্মাই ৷ আনহাতে মুখ্যমন্ত্ৰীয়ে তিৱা স্বায়ত্ত পৰিষদৰ নেতৃবৰ্গৰ লগতো আজি আলোচনাত মিলিত হয় ৷

লগতে পঢ়ক : দিনজোৰা কাৰ্যসূচীৰে জোঙাল বলহু দিৱস উদযাপন