ফটা বাঁহৰ দৰে কংগ্ৰেছৰ এলায়েঞ্চ, কেতিয়াও জোৰা নালাগে : ভৱেশ কলিতা

টীয়ক, 5 মাৰ্চ : ‘‘ফটা বাঁহ কেতিয়াও জোৰা নালাগে ৷ ঠিক সেইদৰে কংগ্ৰেছৰ এলায়েঞ্চ কেতিয়াও জোৰা নালাগে ৷ এই ৰিপুণ বৰা, এই ভূপেন বৰা, এই মমতা দিদি - সকলো একে ৷’’ মঙলবাৰে টীয়কৰ লাহদৈগড়স্থিত বীৰ লাচিত মৈদামত উপস্থিত হৈ সংবাদ মাধ্যমৰ আগত কংগ্ৰেছ দলক কটাক্ষ কৰি এই মন্তব্য কৰে বিজেপিৰ ৰাজ্যিক সভাপতি ভৱেশ কলিতাই ৷

লগতে তেওঁ কয়, ‘‘কংগ্ৰেছে 15 বছৰীয়া শাসন কালত কি কৰিলে ? তিতাবৰ সমষ্টিত প্ৰাক্তন মুখ্যমন্ত্ৰীগৰাকীয়ে কি কৰিলে ? মুখ্যমন্ত্ৰী হিমন্ত বিশ্ব শৰ্মাৰ সমষ্টিলৈ যাওঁক, উন্নয়ন কি দেখা পাব’’ ৷ লগতে তেওঁ চাহ জনগোষ্ঠীৰ লোকক টিকট দিয়াক লৈ চাহ জনগোষ্ঠীৰ মাজত কোনো ধৰণৰ দ্বিমত নাই বুলি সদৰী কৰে ৷ ডিব্ৰুগড় লোকসভা সমষ্টিত সৰ্বানন্দ সোণোৱাল নিশ্চিতভাৱে জয়ী হ'ব, আকৌ কেন্দ্ৰীয় মন্ত্ৰিত্ব সোণোৱালেই লাভ কৰিব বুলিও মন্তব্য কৰে সভাপতি ভৱেশ কলিতাই ।

উল্লেখ্য যে, 9 মাৰ্চত লাচিত মৈদামলৈ আহিব দেশৰ প্ৰধানমন্ত্ৰী নৰেন্দ্ৰ মোদী ৷ সেয়ে মঙলবাৰে লাহদৈগড়স্থিত বীৰ লাচিত মৈদামত উপস্থিত হৈ বিজেপি সভাপতি ভৱেশ কলিতাই মেলেং পথাৰত অনুষ্ঠিত হ’বলগীয়া জনসভাৰ প্ৰস্তুতিৰ বুজ লয় ।

লগতে পঢ়ক : প্ৰধানমন্ত্ৰীৰ কাজিৰঙা ভ্ৰমণ, পৰ্যটকৰ বাবে বন্ধ থাকিব জীপ ছাফাৰী আৰু হাতী ছাফাৰী