অভিনেতা প্ৰাঞ্জল শইকীয়ালৈ ‘আনন্দম বঁটা’

গুৱাহাটী : গুৱাহাটীৰ আগশাৰীৰ ব্যৱসায়িক গৃহ নিৰ্মাণ প্ৰতিষ্ঠান ‘আনন্দম’ ৰ সপ্তম বর্ষপূৰ্তি অনুষ্ঠানৰ লগত সংগতি ৰাখি শুকুৰবাৰে ভি আই পি ৰোডস্থিত হোটেল য়েল্লো গ্ৰীণত সপ্তম বর্ষপূৰ্তিৰ বিভিন্ন কাৰ্যসূচী ৰূপায়ন কৰা হয় । সপ্তম বর্ষপূৰ্তি অনুষ্ঠানৰ লগত সংগতি ৰাখি প্ৰথমবাৰৰ বাবে বিশেষ আনন্দম বঁটা প্ৰদান কৰাৰ সিদ্ধান্ত গ্ৰহণ কৰে প্ৰতিষ্ঠানটোৱে ৷

প্ৰথমবাৰৰ বাবে এই বঁটা প্ৰদান কৰা হয় অসমৰ চলচ্চিত্ৰ জগতৰ এগৰাকী বিশিষ্ট অভিনেতা তথা প্ৰযোজক প্ৰাঞ্জল শইকীয়াক । আনন্দম পৰিয়ালৰ হৈ এই বিশেষ বঁটা প্ৰদান কৰে আনন্দমৰ স্বতাধিকাৰী অৰূপ কলিতাই । এই বঁটাত আছে গামোচা, পাটৰ চেলেং, জাপি, প্ৰশস্তি পত্ৰ, স্মাৰক আৰু নগদ ধনৰ টোপোলা । অনুষ্ঠানত আনন্দম পৰিয়ালৰ তৰফৰ পৰা কেইবাটাও শিতানত বৰ্ষটিৰ শ্ৰেষ্ঠ কৰ্মচাৰীৰূপে বাছনি কৰা কেইবাগৰাকী কৰ্মচাৰীক বঁটা প্ৰদানৰ লগতে আনন্দম পৰিয়ালৰ সৈতে ওতঃপ্ৰোতভাৱে জড়িত লোকক বিশেষভাৱে সম্বৰ্ধনা জনোৱা হয় । বর্ষপূৰ্তি অনুষ্ঠানৰ সদৌ শেষত স্থানীয় শিল্পীৰ দ্বাৰা গীতৰ অনুষ্ঠান পৰিবেশন কৰা হয় । আনন্দমৰ বর্ষপূৰ্তি অনুষ্ঠানত অভিনেত্ৰী পূৰ্ণিমা পাঠক শইকীয়া, আনন্দমৰ বিষয়া আৰু কৰ্মচাৰীৰ লগতে উপস্থিত থাকে প্ৰায় শতাধিক লোক ।

লগতে পঢ়ক : দুদিনীয়া কাৰ্যসূচীৰে শ্বিলং চেৰী ব্ল’ছম ফেষ্টিভেল