সুধাকণ্ঠক স্মৰণ: শদিয়াত অসম সাহিত্য সভাৰ কেন্দ্ৰীয় স্মৃতি দিৱস

তিনিচুকীয়া: মঙলবাৰে অসম সাহিত্য সভাই কেন্দ্ৰীয়ভাৱে তিনিচুকীয়া জিলাৰ শদিয়াৰ চপাখোৱা মুকলি মঞ্চত সংগীত সূৰ্য, সুধাকণ্ঠ ড৹ ভূপেন হাজৰিকাৰ স্মৃতি দিৱস পালন কৰে । তিনিচুকীয়া জিলা সাহিত্য সভাৰ উদ্যোগত তথা শদিয়া শতদল শাখা সাহিত্য সভাৰ আতিথ্যত আৰু শদিয়াবাসীৰ সহযোগত অনুষ্ঠিত হোৱা সুধাকণ্ঠৰ স্মৃতি দিৱসৰ কাৰ্যসূচীৰ পুৱা অসম সাহিত্য সভাৰ পতাকা উত্তোলন কৰে সভাৰ সভাপতি ড৹ সূৰ্যকান্ত হাজৰিকাই ৷

লগতে স্মৃতি তৰ্পণ কাৰ্যসূচীৰ শুভাৰম্ভ কৰে সভাৰ উপ-সভাপতি গিৰীশ সন্দিকৈয়ে ৷ ইয়াৰ পিছতে চপাখোৱা ৰুক্মিণী উদ্যানত থকা সুধাকণ্ঠ ড৹ হাজৰিকাৰ প্ৰতিমূৰ্তিত মাল্যাৰ্পণ আৰু বন্তি প্ৰজ্বলন কাৰ্যসূচীৰ শুভাৰম্ভ কৰে তিনিচুকীয়া জিলা সাহিত্য সভাৰ সভাপতি মোহন মৰাণ আৰু শদিয়া শতদল শাখা সাহিত্য সভাৰ সভাপতি দিপালী চেতিয়া বৰগোহাঞিয়ে ৷ এই দিৱসৰ লগত সংগতি ৰাখি সাংস্কৃতিক কাৰ্যসূচী আৰু মুকলি সভাও অনুষ্ঠিত কৰা হয় ৷

লগতে পঢ়ক: ত্ৰয়োদশ মৃত্যু তিথিত সুধাকণ্ঠক স্মৰণ অসমীয়াৰ; সন্ধিয়া দীঘলীপুখুৰীৰ পাৰত জ্বলিব ১০ হাজাৰ বন্তি