অ' এন জি চি প্ৰসংগত ৰাজ্যসভাত সৰৱ অজিত কুমাৰ ভূঞা

নিউজ ডেস্ক: শিৱসাগৰ জিলাৰ নাজিৰাত অৱস্থিত তেল আৰু প্ৰাকৃতিক গেছ নিগম (অ' এন জি চি)ৰ মাণ্ডলিক কাৰ্যালয়টো অসমৰ পৰা স্থানান্তৰ কৰিব খোজা বিষয়টোৰ প্ৰতি মঙলবাৰে ৰাজ্যসভাৰ মজিয়াত চৰকাৰৰ দৃষ্টি আকৰ্ষণ কৰে সাংসদ অজিত কুমাৰ ভূঞাই ৷ তেওঁ কয় যে অসমৰ ডিগবৈ তেল শোধনাগাৰ ব্ৰিটিছে স্থাপন কৰি থৈ গৈছিল ৷  

সাংসদ অজিত কুমাৰ ভূঞাই কয়,"তেল,কয়লা, প্ৰাকৃতিক গেছ, চাহ আদিৰ ৰূপত প্ৰাকৃতিক সম্পদৰ ক্ষেত্ৰত ব্ৰিটিছ যুগৰ পৰা অসম শীৰ্ষস্থানত আছিল ।  ডিগবৈ তেল শোধনাগাৰ ব্ৰিটিছে প্ৰতিষ্ঠা কৰিছিল । স্বাধীনতাৰ পিছত ভাৰত চৰকাৰে অ' এন জি চি স্থাপন কৰিছিল । নাজিৰাত অ' এন জি চিৰ আঞ্চলিক কাৰ্যালয়ক দেশৰ উত্তৰ-পূব অংশত অপৰিশোধিত সামগ্ৰীৰ অন্বেষণ আৰু উৎপাদনৰ দায়িত্ব অৰ্পণ কৰা হৈছিল ।  

কিন্তু এতিয়া এক প্ৰণালীবদ্ধ ডিজাইনত ইয়াৰ কাৰ্যকলাপৰ সম্প্ৰসাৰণৰ পৰিৱৰ্তে কিছুমান কামকাজ দিল্লী বা আন ঠাইলৈ স্থানান্তৰ কৰা হৈছে । নিবিদা, বিত্ত, লজিষ্টিক আদি সম্পৰ্কীয় কামবোৰৰ কিছুমান ইতিমধ্যে স্থানান্তৰ কৰা হৈছে । এই কাৰ্যবোৰৰ বাবে জনসাধাৰণৰ মনত এক তীব্ৰ অসন্তুষ্টি বৃদ্ধি পাইছে ।" সেইবাবে সাংসদগৰাকীয়ে অ' এন জি চিৰ অসম সম্পদৰ কোনো কাৰ্যকলাপ দেশৰ আন স্থানলৈ স্থানান্তৰ নকৰিবলৈ চৰকাৰক আহ্বান জনায় ।

লগতে পঢ়ক:উত্তৰ-পূবৰ বাবে বাজেটত সীমিত পুঁজি আৱণ্টন: ৰাজ্যসভাত সৰৱ সাংসদ ভূঞা - India Budget 2024