কৰ্মৰ সন্ধানত আহি নিজেই সন্ধানহীন হ’ল মাজুলীৰ সোমনাথ - Youth missing

মাজুলী, 8 আগষ্ট: সংস্থাপনৰ সপোন বুকুত বান্ধি মাজুলীৰ ডেৰগেৰ সোণোৱাল গাঁৱৰ পৰা যোৱা ৫ জুলাইত বেংগালুৰুলৈ ৰাওনা হৈছিল সোমনাথ ৰেগন ওৰফে ওজা । লগত আছিল সতীৰ্থ ৬ জন যুৱক । কিন্তু ঘৰৰ পৰা যোৱাৰ পিচৰে পৰা কোনো সন্ধান নাই সোমনাথ ৰেগনৰ ।

একেলগে যোৱা ৭ জনৰে ৬ জন ৮ জুলাইত বেংগালুৰুত উপস্থিত হ’লগৈ যদিও সোমনাথ ৰেগনৰ নাই কোনো সন্ধান । এমাহ পাৰ হ’ল, আৰক্ষীৰ কাষ চাপিল পৰিয়াল ৷ কিন্তু সন্ধান নাই যুৱকজনৰ । ঘৰখনত তিনিটি সন্তানসহ পত্নীয়ে ফটোখন বুকত লৈ ৰাস্তালৈ চাইছে । পিতৃ-মাতৃয়ে চোতালত বাগৰি কান্দিছে । সোমনাথৰ সন্ধান লাগে । 

পৰিয়াল আৰু গাঁওবাসীয়ে সন্দেহ কৰা মতে কোনোৱে হত্যা কৰিছে সোমনাথক । ৰেলত লগত যোৱা সতীৰ্থৰ সৈতে যুৱকজনৰ বাকযুদ্ধ হোৱা বুলি জানিব পৰা গৈছে । সোমনাথ নিৰুদ্দিষ্ট হোৱা বুলি পৰিয়ালে এজাহাৰ দাখিল কৰিছে যদিও আজি পৰ্যন্ত কোনো সন্ধান ওলোৱা নাই তেওঁৰ ৷ একমাত্ৰ উপাৰ্জনকাৰী সোমনাথ নোহোৱা হোৱাত ঘোৰ অনিশ্চয়তাত পৰিছে পৰিয়ালটো । যদি সতীৰ্থই সোমনাথক হত্যা কৰিছে, তেন্তে মৃতদেহটো চমজাই দিবলৈ আহ্বান জনাইছে পৰিয়ালে ৷ 

লগতে পঢ়ক: কাম কৰিবলৈ গৈ এসপ্তাহ ধৰি সন্ধানহীন মৰাণৰ এজন লোক - Missing case in Moran