হায়দৰাবাদ: বিশ্বজুৰি জনপ্ৰিয় এপলৰ আইফোন । বৰ্তমান কোম্পানীটোৰ আইফোন 16 ছিৰিজ বজাৰত বিক্ৰীৰ বাবে উপলব্ধ । এই ফোনটোত কোম্পানীটোৱে এপল ইন্টেলিজেন্সৰ বৈশিষ্ট্যও আগবঢ়াইছে । উল্লেখ কৰা প্ৰয়োজন যে সম্প্ৰতি বিশ্ববাসীৰ আকৰ্ষণৰ কেন্দ্ৰবিন্দু আইফোনৰ আৰম্ভণি ইমান আধুনিক নাছিল । 2007 ত চনত প্ৰথম প্ৰজন্মৰ আইফোনটো বজাৰত মুকলি কৰা হৈছিল ।
প্ৰথমটো আইফোন (2007)
2007 চনৰ 9 জানুৱাৰীত ছান ফ্ৰান্সিস্কোত অনুষ্ঠিত হোৱা মেকৱৰ্ল্ড সন্মিলনত এপল ইনকৰ্পৰেশ্যনৰ চিইঅ’ ষ্টিভ জবছে প্ৰথমটো আইফোন প্ৰৱৰ্তন কৰে । টাচস্ক্ৰীণ মোবাইল ফোন, আইপড, কেমেৰা, ৱেব ব্ৰাউজাৰৰ বহু বৈশিষ্ট্যৰ সংমিশ্ৰণ ঘটোৱা এটা বৈপ্লৱিক যন্ত্ৰ আছিল এই আইফোনটো ।
প্ৰথমটো আইফোনৰ বৈশিষ্ট্য
প্ৰথমটো আইফোনত 320×480 পিক্সেল ৰিজ’লিউচনৰ 3.5 ইঞ্চি ডিছপ্লে আছিল আৰু ইয়াত 412 মেগাহাৰ্টজ এ আৰ এম 11 প্ৰচেছৰ আৰু 128 মেগাবাইট ৰেম আছিল । ইয়াৰ উপৰিও ইয়াত আছিল 2MP কেমেৰা আৰু ইয়াত 4GB বা 8GB পৰ্যন্ত ষ্ট’ৰেজ আছিল । এই ডিভাইচটো এপলৰ নতুন আই অ’ এছ অপাৰেটিং চিষ্টেমত চলিছিল, যিটো বিশেষভাৱে আইফোনৰ বাবে ডিজাইন কৰা হৈছিল আৰু ব্যৱহাৰকাৰীৰ অভিজ্ঞতাৰ নতুন স্তৰ প্ৰদান কৰিছিল ।
আইফোন উদ্ভাৱনৰ আঁৰৰ কাহিনী
আইফোনটো এপল ইনকৰ্পৰেশ্যনে নিৰ্মাণ কৰিছিল আৰু ইয়াৰ ডিজাইন আৰু ডেভেলপমেণ্টৰ আঁৰৰ মূল স্থপতি আছিল ষ্টিভ জবছ । এপল ফোনটোৰ ধাৰণাটো আহিছিল NeXTSTEP আৰু পিছলৈ MacOS ৰ চফট্ ৱেৰ ইঞ্জিনিয়াৰ জিন-মেৰী হুলটৰ পৰা । প্ৰথম অৱস্থাত চিইঅ’ ষ্টিভ জবছে এপল ফোন নিৰ্মাণৰ পক্ষত নাছিল যদিও অৱশেষত হুলটে তেওঁক পতিয়ন নিয়াবলৈ সক্ষম হৈছিল । পেৰিছত প্ৰথমটো দল গঠন হৈছিল যদিও কেইবছৰমানৰ পিছতহে তেওঁ এই প্ৰকল্পটোক অধিক গুৰুত্বসহকাৰে লৈ ফৰাচী অভিযন্তাসকলক আমেৰিকাত কাম কৰিবলৈ কয় ।
কিন্তু হুলটে নাকচ কৰি নিজৰ দলৰ সৈতে এপলৰ পৰা পদত্যাগ কৰে । আন এজন অভিযন্তা হেনৰী লেমিৰেক্স স্কট ফৰ্ষ্টলৰ সৈতে আইফোনৰ চফট্ ৱেৰ বিকশিত কৰাৰ প্ৰকল্পৰ নতুন মুৰব্বী হৈ পৰে । 2004 চনত আইফোনৰ বিকাশ আৰম্ভ হৈছিল, যেতিয়া ষ্টিভ জবছে টনি ফেডেল, স্কট ফৰ্ষ্টল আৰু জনাথন আইভক অতি গোপনীয় ‘প্ৰজেক্ট পাৰ্পল’ৰ কাম কৰিবলৈ অনুৰোধ কৰিছিল ।
2007 চনৰ 9 জানুৱাৰীত ষ্টিভ জবছে আনুষ্ঠানিকভাৱে ঘোষণা কৰে আৰু 2007 চনৰ 29 জুনত আমেৰিকাত আৰম্ভণি মূল্য 499 মাৰ্কিন ডলাৰত মুকলি কৰে আৰু এ টি এণ্ড টিৰ সৈতে দুবছৰৰ চুক্তিবদ্ধ হয় । আইফোনত 3.5 ইঞ্চিৰ মাল্টি টাচ ডিছপ্লে আছিল আৰু ইয়াত কম হাৰ্ডৱেৰ বুটাম আছিল আৰু আইফোন অ’ এছ অপাৰেটিং চিষ্টেমটো টাচ-ফ্ৰেণ্ডলী ইন্টাৰফেছৰ সৈতে চলাইছিল, তাৰ পিছত মেকঅ’এছ এক্সৰ সংস্কৰণ হিচাপে বজাৰত বিক্ৰী কৰা হৈছিল ।
আইফোন আপডেট হোৱাৰ সময়
- 2007: চনত টাচ্চ স্ক্ৰীণ ইন্টাৰফেচ, আইপড, কেমেৰা আৰু ৱেব ব্ৰাউজিং বৈশিষ্ট্যৰে প্ৰথম আইফোন মুকলি কৰা হয় ।
- 2008: চনত এপলে এপ ষ্ট’ৰ মুকলি কৰে, য’ত ব্যৱহাৰকাৰীয়ে গেম, ছ’চিয়েল নেটৱৰ্কিং আদিৰ বাবে চফট্ ৱেৰ এপ্লিকেচন ডাউনলোড কৰিব পাৰে ।
- 2010: আইফোন 4 হাই-ৰিজ’লিউচন ৰেটিনা ডিছপ্লে, ফ্ৰন্ট-ফেচিং কেমেৰা, আৰু ফেচটাইম ভিডিঅ’ কলিঙৰ সৈতে মুকলি কৰা হয় ।
- 2011: আইফোন 4S চিৰি (ভাৰ্চুৱেল ব্যক্তিগত সহায়ক)ৰ সৈতে মুকলি কৰা হয় ।
- 2012: আইফোন 5 বৃহৎ 4 ইঞ্চি ডিছপ্লে, দ্ৰুত প্ৰচেছৰ, আৰু 4G এলটিই ক্ষমতাৰে মুকলি কৰা হয় ।
- 2013: এই বছৰ আইফোন 5S আৰু 5C মুকলি কৰা হয়, য’ত 5S ত ফিংগাৰপ্ৰিণ্ট চেন্সৰ আৰু উন্নত কেমেৰাৰ দৰে বৈশিষ্ট্য প্ৰদান কৰা হয় ।
- 2014: আইফোন 6 আৰু 6 প্লাছ বৃহৎ ডিছপ্লে, দ্ৰুত প্ৰচেছৰ, আৰু উন্নত কেমেৰাৰ সৈতে মুকলি কৰা হয় ।
- 2015: আইফোন 6S আৰু 6S প্লাছ মুকলি কৰা হয় থ্ৰীডি টাচ প্ৰযুক্তি আৰু 12 মেগাপিক্সেল কেমেৰাৰ সৈতে ।
- 2016: আইফোন 7 আৰু 7 প্লাছ মুকলি কৰা হয় পানী প্ৰতিৰোধী ডিজাইন, উন্নত কেমেৰা আৰু হেডফোন জেক আঁতৰোৱাৰ সৈতে ।
- 2019: আইফোন 8 আৰু 8 প্লাছ গ্লাছ বেক, বেতাঁৰ চাৰ্জিং আৰু উন্নত A11 বায়’নিক চিপৰ সৈতে মুকলি কৰা হয় ।
- 2018: এপলে আইফোন এক্সআৰ, এক্সএছ আৰু এক্সএছ মেক্স মুকলি কৰে এজ-টু-এজ ডিছপ্লে, ফেচ আইডি আৰু নতুন A12 বায়’নিক চিপৰ সৈতে ।
- 2019: পৰৱৰ্তী বছৰটোতে আইফোন 11, 11 প্ৰ’ আৰু 11 প্ৰ’ মেক্সত উন্নত কেমেৰা, দ্ৰুত A13 বায়নিক চিপ আৰু বেটাৰীৰ জীৱন উন্নত কৰা হয় ।
- 2020: আইফোন SE (দ্বিতীয় প্ৰজন্ম) সুলভ মূল্যৰ মডেল হিচাপে মুকলি কৰা হয়, লগতে আইফোন 12, 12 মিনি, 12 প্ৰ’, 12 প্ৰ’ মেক্স 5G নেটৱৰ্ক, উন্নত কেমেৰা আৰু নতুন A14 বায়নিক চিপৰ সমৰ্থনত মুকলি কৰা হয় ।
- 2021: আইফোন 13, 13 মিনি, 13 প্ৰ’ আৰু 13 প্ৰ’ মেক্স প্ৰ’ম’চন ডিছপ্লে, চিৰামিক শ্বিল্ড ফ্ৰন্ট কভাৰ আৰু A15 বায়নিক চিপৰ সৈতে মুকলি কৰা হয় ।
- 2022: 2022 চনৰ 7 ছেপ্টেম্বৰত আইফোন 14 মডেল ঘোষণা কৰা হয়, য’ত বৃহৎ ডিছপ্লে, উন্নত কেমেৰা আৰু শেহতীয়া A16 বায়নিক চিপৰ সৈতে নতুন ডিজাইনৰ বৈশিষ্ট্য আছিল । আইফোন 14 আৰু আইফোন 14 প্লাছ মডেলত ডুৱেল কেমেৰা চিষ্টেম আৰু বেটাৰী লাইফ উন্নত হোৱাৰ বিপৰীতে আইফোন 14 প্ৰ’ আৰু আইফোন 14 প্ৰ’ মেক্স মডেলত ট্ৰিপল কেমেৰা চিষ্টেম আৰু প্ৰ’ৰেছ ভিডিঅ’ ৰেকৰ্ডিং আৰু লিডাৰ স্ক্যানাৰৰ দৰে উন্নত বৈশিষ্ট্য আছে ।
- 2023: 2023 চনৰ 7 ছেপ্টেম্বৰত আইফোন 15 মডেল ঘোষণা কৰা হয়, য’ত ডাইনামিক আইলেণ্ড ডিছপ্লে, উন্নত কেমেৰা আৰু শক্তিশালী A16 বায়নিক চিপৰ সৈতে আকৰ্ষণীয় ডিজাইনৰ বৈশিষ্ট্য আছিল । ষ্টেণ্ডাৰ্ড আইফোন 15 আৰু আইফোন 15 প্লাছ মডেলত ডুৱেল কেমেৰা চিষ্টেম আৰু উন্নত বেটাৰী লাইফ আছে, আনহাতে আইফোন 15 প্ৰ’ আৰু আইফোন 15 প্ৰ’ মেক্স মডেলত ট্ৰিপল কেমেৰা চিষ্টেম, প্ৰ’ম’চন ডিছপ্লে প্ৰযুক্তি আৰু প্ৰ’চেচৰৰ দৰে উন্নত বৈশিষ্ট্য আছে ভিডিঅ' ৰেকৰ্ডিং আৰু বিভিন্ন কাৰ্য্যসমূহলৈ দ্ৰুত প্ৰৱেশৰ বাবে এটা নতুন একচন বুটাম।
- 2024: 2024 চনৰ 7 ছেপ্টেম্বৰত আইফোন 16 ছিৰিজৰ ঘোষণা কৰা হয়, য’ত এটা অনন্য উলম্ব বেক কেমেৰা এৰে, বহু উন্নত কেমেৰা চিষ্টেম আৰু অত্যাধুনিক A18 বায়নিক চিপিইউৰ সৈতে নতুন ডিজাইন আছে । আইফোন 16 আৰু আইফোন 16 প্লাছ মডেলত শক্তিশালী 48MP ফিউজন কেমেৰা চিষ্টেম আৰু মোবাইল ফটোগ্ৰাফীক ৰূপান্তৰিত কৰা সুবিধাজনক কেমেৰা কণ্ট্ৰল বুটাম আছে ৷ আনহাতে আইফোন 16 প্ৰ’ আৰু আইফোন 16 প্ৰ’ মেক্স মডেলত স্থানীয় ভিডিঅ’ সমৰ্থন আৰু কাষ্টমাইজেবল একচন বুটামৰ দৰে উন্নত বৈশিষ্ট্য আছে ৷
বিক্ৰীৰ ক্ষেত্ৰত আইফোন আগবাঢ়িছে
2023 চনত প্ৰথমবাৰৰ বাবে এপলে বিশ্বজুৰি স্মাৰ্টফোন ৰপ্তানিৰ ক্ষেত্ৰত ছেমছাং আৰু আন সকলো স্মাৰ্টফোন নিৰ্মাতাক চেৰ পেলাইছিল । 2023 চনত এপলে 234.6 মিলিয়ন আইফোন ৰপ্তানি কৰি 20.1 শতাংশ বজাৰ অংশীদাৰিত্ব লাভ কৰিছিল । এই বিক্ৰীৰ লগে লগে 2023 চনত আইফোনৰ বিক্ৰী 3.7 শতাংশ বৃদ্ধি পাইছে । আইডিচিৰ তথ্য অনুসৰি (আন্তঃৰাষ্ট্ৰীয় ডাটা কৰ্পৰেশ্যন) 2010 চনৰ পৰা 13 বছৰ ধৰি বিশ্বব্যাপী স্মাৰ্টফোন ইউনিট বিক্ৰীৰ ক্ষেত্ৰত ছেমছাঙে আগবাঢ়ি আহিছে ।
