যোৰহাট,৫ জুলাই: নিশাটোৰ ভিতৰতে যোৰহাটত অন্তৰ্ধান হ'ল এটা বেংক । অন্তৰ্ধান হ'ল বেংকটোৰ বিষয়া-কৰ্মচাৰীও । যাক লৈ বেংকটোৰ গ্ৰাহকসকলৰ মাজত এতিয়া হাহাকাৰ পৰিস্থিতি । লাখ লাখ টকা জমা ৰাখি এতিয়া বিপাঙত পৰিছে বেংকটোৰ গ্ৰাহকসকল । ইয়েছ মনি ডিজিটেল বেংক(নিধি বেংক) নামৰ বিত্তীয় প্ৰতিষ্ঠানটোৱে গ্ৰাহকক ৰাম ঠগন দিয়াৰ অভিযোগ । যোৰহাটত যোৱা ১৭ এপ্ৰিলত শাখা মুকলি কৰি বিভিন্ন গ্ৰাহকৰ পৰা ধন জমা লৈছিল এই বেংকটোৰ কৰ্তৃপক্ষই ।
এতিয়া বেংকটোৰ শীৰ্ষ বিষয়া তথা অধিকাংশ কৰ্মচাৰীয়ে পলায়ন কৰাত হাহাকাৰ অৱস্থাৰ সৃষ্টি হৈছে গ্ৰাহকৰ মাজত । ঘৰৰ মালিকৰ ভাৰাৰ পৰা বেংকৰ আচবাব বনোৱা ব্যৱসায়ীলৈকে সকলোকে লাখ লাখ টকাৰ মাধমাৰ শোধাই ধন আত্মসাৎ কৰি পলায়ন কৰিছে বেংকটোৰ শীৰ্ষ বিষয়াও ।
উল্লেখ্য যে যোৰহাটৰ পুলিবৰত এই শাখাটো মুকলি কৰিছিল ১৭ এপ্ৰিলত । বহু লোকে দৈনিক একাউন্টত জমা থৈছিল কষ্টৰ ধন । একাংশ গ্ৰাহকে এক লাখ টকাৰ লোণ লাভৰ আশাত ধন জমা দিছিল বেংকটোত । কিন্তু হঠাৎ বেংকটোৰ পৰা CEO বনমালি হাজৰিকাকে ধৰি নৱজ্যোতি পায়েং, জগন্নাথ পেগু , প্ৰসেনজিৎ নৰহ, গৌতম কলিতাকে ধৰি শীৰ্ষ বিষয়াসকল অন্তৰ্ধান হৈ পৰে । ইতিমধ্যে ভুক্তভোগী লোকসকলে আইনৰ কাষ চপাৰ কথাও উল্লেখ কৰে সংবাদ মাধ্যমৰ আগত ।
পিচে প্ৰশাসনৰ সন্মুখতে ইমান বেপৰোৱাভাৱে এই বিত্তীয় প্ৰতিষ্ঠানটোৱে কেনেদৰে ৰাইজৰ পৰা ধন বিনিয়োগ কৰাবলৈ সক্ষম হৈছে সেয়াও এক ডাঙৰ প্ৰশ্ন ? নিজৰ সাঁচতীয়া ধন বেংকত জমা থৈয়ো যেন নিৰাপদ নহয় সাধাৰণ জনতা । সেয়ে ইয়াৰ এক উচিত তদন্তৰ দাবী কৰিছে সচেতন ৰাইজে ।
