কাজিৰঙা, ২ জুলাই : কাজিৰঙা ৰাষ্ট্ৰীয় উদ্যানৰ অন্তৰ্ভাগত বৃদ্ধি পাইছে জলস্তৰ ৷ বিগত কেইবাদিন ধৰি হোৱা নেৰানেপেৰা বৰষুণৰ ফলত ব্ৰহ্মপুত্ৰ আৰু ধনশিৰি নৈৰ জলস্তৰ বৃদ্ধি পোৱাৰ লগে লগে উদ্যান সংযোগী নলাসমূহেৰে তীব্ৰগতিত বাঢ়নী পানী প্ৰৱেশ কৰাত প্লাবিত হৈছে ৰাষ্ট্ৰীয় উদ্যানখন ৷ মঙলবাৰে উদ্যান কৰ্তৃপক্ষই প্ৰকাশ কৰা অনুসৰি, কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ ৯৫ টা বনশিবিৰ এলেকা প্লাবিত হৈছে ৷
কাজিৰঙা ৰাষ্ট্ৰীয় উদ্যান (ETV BHARAT ASSAM) অগৰাতলি বনাঞ্চলৰ মুঠ ৩৪ টা বনশিবিৰৰ ৩৪ টায়ে, কহঁৰা বনাঞ্চলৰ ৫৮ টা বনশিবিৰৰ ২০টা, বাগৰি বনাঞ্চলৰ ৩৯ টা বনশিবিৰৰ ১০ টা, বুঢ়াপাহাৰ বনাঞ্চলৰ ২৫ টা বনশিবিৰৰ ৫ টা, বোকাখাতৰ ৯ টা বনশিবিৰৰ ৬ টা আৰু বিশ্বনাথ বন্যপ্ৰাণী সংমণ্ডলৰ ৩০ টা বনশিবিৰৰ ২০ টা বনশিবিৰ এলেকা প্লাবিত হৈছে ৷
বাঢ়নী পানীয়ে উদ্যানৰ অন্তৰ্ভাগৰ কেতবোৰ এলেকা ৫ ফুট পৰ্যন্ত বুৰাই পেলোৱাৰ পৰিপ্ৰেক্ষিতত উক্ত বনাঞ্চলসমূহৰ ৬ টাকৈ বনশিবিৰ স্থানান্তৰ কৰিব লগা হৈছে ৷ বৰ্তমানলৈকে অগৰাতলিত এটা, কহঁৰাত এটা, বোকাখাতত ৩ টা আৰু বিশ্বনাথৰ এটা বনশিবিৰ স্থানান্তৰ কৰিব লগা হৈছে ৷
ইফালে, উদ্যানৰ অন্তৰ্ভাগত থকা বিভাগীয় হাতীসমূহ সুৰক্ষিত স্থানলৈ স্থানান্তৰ কৰাৰ সমান্তৰালকৈ বন্যপ্ৰাণীৰ সুৰক্ষাৰ বাবে কেতবোৰ ব্যৱস্থা গ্ৰহণ কৰিছে উদ্যান কৰ্তৃপক্ষই ৷ উদ্যানৰ অন্তৰ্ভাগত ঠায়ে ঠায়ে মেচিন নাও, হাত নাও, স্পীড ব’ট আদিৰে বনকৰ্মীয়ে তহলৰ ব্যৱস্থা কৰাৰ লগতে উদ্ধাৰ কাৰ্যৰ বাবে যাৱতীয় সামগ্ৰী প্ৰস্তুত কৰি ৰখা হৈছে ৷
লগতে পঢ়ক:বান পৰিস্থিতিৰে মোকাবিলা কৰিবলৈ সাজু বোকাখাত আৰক্ষী: বন্যপ্ৰাণীক অনিষ্ট নকৰাৰ আহ্বান - ASSAM FLOOD 2024
আনহাতে, বানৰ লগে-লগে উদ্যানৰ বন্যপ্ৰাণীসমূহ আশ্ৰয়স্থল বিচাৰি কাজিৰঙা ৰাষ্ট্ৰীয় উদ্যানৰ দক্ষিণৰ ৩৭ নং ৰাষ্ট্ৰীয় ঘাইপথ অতিক্ৰম কৰি কাৰ্বি পাহাৰৰ নামনি অঞ্চলত প্ৰৱেশ কৰিছে ৷ এই সময়চোৱাত যাতে ঘাইপথৰ এনিমেল ক’ৰিড’ৰ সমূহত যান-বাহনৰ দ্বাৰা বাধাপ্ৰাপ্ত অথবা দুৰ্ঘটনাগ্ৰস্ত নহয় তাৰ বাবে ঠায়ে ঠায়ে বেৰিকেডৰ ব্যৱস্থা কৰিছে । লগতে বনকৰ্মীৰ দ্বাৰা নিয়মীয়া তহলৰ ব্যৱস্থা কৰা হৈছে ৷ তহলৰ বাবে অতিৰিক্ত বনকৰ্মী নিয়োগ কৰাৰ সমান্তৰালৈ দাঁতিকাষৰীয়া এলেকাসমূহত বনকৰ্মী আৰু আৰক্ষীৰ যৌথ তহলৰ ব্যৱস্থাও কৰা হৈছে ৷
লগতে পঢ়ক:কাজিৰঙাৰ বানাক্ৰান্ত জীৱ-জন্তুক সুৰক্ষাৰ বাবে ৰাষ্ট্ৰীয় উদ্যান কৰ্তৃপক্ষ-আৰক্ষীৰ বিশেষ সতৰ্কতা - Assam Floods 2024
ইফালে, মঙলবাৰৰ পৰা কাৰ্যকৰী হোৱাকৈ গোলাঘাট জিলা আৰক্ষী অধীক্ষকে বানৰ সময়ত কাজিৰঙাৰ বন্যপ্ৰাণীৰ সুৰক্ষাৰ বাবে ঘাইপথত যান-বাহনৰ চলাচলত কেতবোৰ নীতি-নিয়ম বান্ধি দি এক নিৰ্দেশনা জাৰি কৰিছে ৷ সেই অনুসৰি, বানৰ সময়ত বাণিজ্যিক যান-বাহনৰ চলাচল কাজিৰঙাৰ ঘাইপথ অতিক্ৰম কৰাত নিষেধাজ্ঞা আৰোপ কৰা হৈছে ৷ আনহাতে, কেৱল দিনৰ ভাগত ব্যক্তিগত যান-বাহন নিয়ন্ত্ৰিত গতিবেগৰ মাজেৰে কাজিৰঙা অতিক্ৰম কৰিব পাৰিব ৷ ইফালে, ৰাতিৰ ভাগত কেৱল স্থানীয় ব্যক্তিগত যান-বাহনহে কাজিৰঙাৰ ঘাইপথত চলাচল কৰিব পাৰিব ৷
লগতে পঢ়ক:বানৰ কবলত অসমৰ কেইবাখনো ৰাষ্ট্ৰীয় উদ্যান : বানবিধ্বস্ত মানাহত উটি গ’ল শিবিৰ - ASSAM FLOOD 2024
