মঙলদৈ : সামাজিক সংকীৰ্ণতাৰ বাবেই অবিবাহিত হিন্দু মহিলা এগৰাকীক মৃত্যুৰ পিচত মৃতদেহ সৎকাৰৰ বিপৰীতে পুতি থবলৈ বাধ্য হ’ল ভুক্তভোগী পৰিয়াল ৷ ঘটনাৰ স্থান ছিপাঝাৰ আৰক্ষী থানাৰ অন্তৰ্গত পিঠাখোৱাপাৰাত ।
বিজ্ঞানৰ উন্নতিৰ লগে লগে মানুহৰ ধ্যান-ধাৰণা, চিন্তাধাৰা উন্নতিৰ জখলাত বগাইছে যদিও একবিংশ শতিকাৰ এই যুগতো সলনি হোৱা নাই একাংশ লোকৰ মানসিকতা । এইসকল লোকৰ চিন্তাধাৰা কেৱল আদিম, বৰ্বৰ মানুহৰ দৰেই হৈ আছে । তেনে এক শেহতীয়া উদাহৰণ হৈছে ছিপাঝাৰৰ এই ঘটনাটো ।
শাৰিৰীক অসুস্থতাৰ বাবে সোমবাৰে মৃত্যু হয় অঞ্চলটোৰ পাৰুল ডেকা নামৰ এগৰাকী ষাঠি ঊৰ্ধ্বৰ অবিবাহিত মহিলাৰ ৷ কিন্তু মৃত্যুৰ পিচত মৃতদেহ সৎকাৰ কৰিবলৈ গাঁওখনৰ মানুহক খবৰ দিছিল যদিও খেলৰ বিভিন্ন অজুহাতত ওলাই নাহিল গাঁওখনৰ এজনো লোক ৷ গাঁওখনৰ কোনো লোকে মহিলাগৰাকীৰ শেষ সৎকাৰৰ বাবে ওলাই নহাত উপায়ন্তৰ পৰিয়ালটিৰ পিতা-পুত্ৰই মিলি দুই কিলোমিটাৰ দূৰলৈ কঢ়িয়াই নি মৃতদেহ গাঁত খান্দি পুতি থবলগীয়া হয় ৷
এইক্ষেত্ৰত স্থানীয় গাঁওপ্ৰধান ৰাজীৱ বণিয়াৰ ভূমিকাক লৈয়ো প্ৰশ্ন উত্থাপন হৈছে ৷ ভুক্তভোগী পৰিয়ালটোক সহযোগ নকৰাৰ অভিযোগ উঠিছে গাঁওপ্ৰধানৰ বিৰুদ্ধে । আনহাতে, পৰিয়ালৰ লোকে অভিযোগ কৰা অনুসৰি, ঘটনা সংঘটিত হোৱাৰ চাৰিদিন উকলি যোৱাৰ পিচতো এতিয়ালৈকে মৃতকৰ ঘৰত উপস্থিত হোৱা নাই গাঁওপ্ৰধানগৰাকী ।
ইফালে এগৰাকী হিন্দু মহিলাক কেৱল সামাজিক সংকীৰ্ণতাৰ বাবেই গাঁত খান্দি পুতি থবলগীয়া হোৱা ঘটনাই সমগ্ৰ দৰং জিলাতে চাঞ্চল্যৰ সৃষ্টি কৰিছে । লগতে ভুক্তভোগী পৰিয়ালটোৱে এই ক্ষেত্ৰত ন্যায় বিচাৰিছে ।
