গুৱাহাটী,৪ অক্টোবৰ: একালত ৰাজ্যৰ ছাত্ৰ ৰাজনীতিৰ অভিকেন্দ্র আছিল কটন বিশ্ববিদ্যালয় । সেই কটন বিশ্ববিদ্যালয়ৰ বাকৰিতে গঢ়ি উঠা কটন বিশ্ববিদ্যালয়ৰ ২০২৪-২৫ বৰ্ষৰ ছাত্ৰ একতা সভাৰ শুকুৰবাৰে ফলাফল ঘোষণাৰ পিছতেই উত্তপ্ত পৰিস্থিতিৰ সৃষ্টি হয় । সাধাৰণ সম্পাদকৰ পদত এটা ভোটৰ ব্যৱধানত হৰা জিকাক লৈ উত্তপ্ত হৈ পৰিছে কটন বিশ্ববিদ্যালয় । সাধাৰণ সম্পাদক পদত তিনিজন প্ৰাৰ্থীয়ে প্ৰতিদ্বন্দ্বিতা কৰিছিল । কুলদ্বীপ গৌতম শৰ্মা আৰু নীৰৱ হাজৰিকাৰ মাজত তুমূল প্ৰতিদ্বন্দ্বিতা হয় ।
এটা ভোটৰ ব্যৱধানত নীৰৱ হাজৰিকাই জয়লাভ কৰে যদিও আনুষ্ঠানিক ঘোষণা হোৱা নাই । ইয়াৰ পিছতে কুলদ্বীপ গৌতম শৰ্মাৰ সমৰ্থনকাৰী সকলে পুণৰ গণনাৰ দাবী কৰে । যাক লৈ সৃষ্টি হয় এক উত্তপ্ত পৰিস্থিতি । এটা পক্ষই যদি পুণৰ গণনাৰ দাবী কৰিছে ইফালে আনটো পক্ষই পুনৰ গণনাৰ বিৰোধিতা কৰা পৰিলক্ষিত হয় ।
এইবাৰ ছাত্ৰ একতা সভাৰ নিৰ্বাচনত বিজয়ী প্ৰাৰ্থীসকল:
- সভাপতি পদত জুবেৰ হাবিব
- উপ-সভাপতি পদত নীলাক্ষী কাকতি
- সাধাৰণ সম্পাদক পদত নীৰৱ হাজৰিকা
- সহকাৰী সম্পাদক পদত মুনমী তালুকদাৰ
- সাংস্কৃতিক সম্পাদক পদত নীলাঞ্জনা বৰা
- মিউজিক সম্পাদক পদত একতা হাজৰিকা
- ছাত্ৰ জিৰণী কোঠা সম্পাদক পদত কংকন জ্যোতি ৰয়
- ছাত্ৰী জিৰণী কোঠা সম্পাদক পদত ডিম্পী ডেকা
- ক্ৰিকেট সম্পাদক পদত ভাৰ্গৱ বেজবৰুৱা
- শৰীৰচৰ্চা সম্পাদক পদত জেমচ ইলাহী
- ফুটবল সম্পাদক পদত ৰাজদ্বীপ কলিতা
- তৰ্ক সম্পাদক পদত গীতাৰ্থ বৰা
- এথলেটিক সম্পাদক পদত ডেনিল চাংমাই
- সমাজ সেৱা সম্পাদক পদত নুপূৰ কাশ্যপ
বিনা প্ৰতিদন্দ্বিতাৰে জয়ী হোৱাসকল:
- লঘুখেল সম্পাদক পদত পেৰিষ্কা বসুমতাৰী
- আলোচনী সম্পাদক পদত তুহিণকন্যা বৰা
যদিও এইসকলে জয়লাভ কৰিছে, বৰ্তমানলৈ কিন্তু আনুষ্ঠানিকভাৱে ঘোষণা কৰা হোৱা নাই বিজয়ী প্ৰাৰ্থীৰ নাম ।
উল্লেখ্য যে, বৃহস্পতিবাৰে অনুষ্ঠিত হয় কটন বিশ্ববিদ্যালয়ৰ একতা সভাৰ নিৰ্বাচনৰ ভোটগ্রহণ । সর্বমুঠ ১৩ টা পদৰ বিপৰীতে এই নিৰ্বাচনত ৩৬ গৰাকী প্রার্থী অৱতীর্ণ হয় । বৃহস্পতিবাৰে পুৱাৰে পৰা বিশ্ববিদ্যালয়খনৰ ছাত্ৰ একতা সভাৰ নিৰ্বাচনত ৪৭ শতাংশ ছাত্র-ছাত্রীয়ে অংশগ্রহণ কৰে ।
