জোনাই/মাজুলী : এতিয়া শৰৎ ঋতু । শৰতৰ পূৰ্ণিমা নিশাত ভগৱান শ্ৰী কৃষ্ণই গোপীৰ সৈতে ৰাসক্ৰীড়া কৰিছিল । শৰৎ ঋতু চলি থকাৰ সময়তে ৰাজ্যৰ প্ৰান্তে প্ৰান্তে চলিছে ৰাস মহোৎসৱৰ ব্যাপক প্ৰস্তুতি । পূৰ্ণগতিত চলিছে ৰাসৰ আখৰাৰ । চিলাপথাৰৰ মাজগাঁৱৰ ৰাস মন্দিৰৰ আঞ্চলিক ৰাসে পূৰ্ণ কৰিলে পঞ্চাশটা বছৰ । ৰাস মন্দিৰৰ মঞ্চত গাঁৱৰখনৰ লগতে দাতিকাষৰীয়া ৪০ খন গাঁৱৰ যুৱতীসকল নামি পৰিছে মহাৰাসৰ আখৰাত ।
গৌৰৱউজ্জ্বল সোণালী জয়ন্তী বৰ্ষৰ উদযাপনৰ হেতু সাজু হৈছে চিলাপথাৰ আঞ্চলিক ৰাস মহোৎসৱ উদযাপন সমিতি । অহা ১৩ নৱেম্বৰৰ পৰা ১৭ নৱেম্বৰলৈ বৰ্নাঢ্য কাৰ্যসূচীৰে এইবাৰ সোণালী জয়ন্তী বৰ্ষ পালন কৰাৰ কথা সদৰী কৰিলে আয়োজক সমিতিয়ে । ৰাস মহোৎসৱৰ বাবে নিৰ্মাণকাৰ্য সমাপ্তিৰ দিশে আটক ধুনীয়া স্থায়ী মূলতোৰণ । আয়োজন কৰা হ’ব ‘‘অসম ভিত্তিত কংসালয়’’ প্ৰতিযোগিতাৰ । লগতে অনুষ্ঠিত হব আকৰ্ষণীয় পুৰস্কাৰ ভিত্তিত বিভিন্ন প্ৰতিযোগিতা ।
ইফালে সত্ৰনগৰীত মাজুলীটো এতিয়া উখল-মাখল পৰিৱেশে বিৰাজ কৰিছে । দিনৰ ভাগৰ পৰা নিশা দুপৰলৈক চলিছে কংস বধৰ আখৰা, কৃষ্ণৰ বাঁহীৰ সুমধুৰ সুৰ । ৰাস উৎসৱৰ মূৰ্চনাত বিলীন সত্ৰপীঠ মাজুলী । খোল-তাল, বাঁহীৰ সুৰ, ৰাস গীতৰ মধুৰ ধ্বনিৰে মুখৰিত হৈছে সত্ৰ নগৰী মাজুলী ।
মাজুলীত এইবাৰ ৰাসৰ লগত সংগতি ৰাখি বিশেষ কাৰ্যসূচীৰ আয়োজন কৰা হ’ব । বিশিষ্ট শিল্পী গুনীন্দ্র নাথ ওজাক প্ৰদান কৰা হ'ব ‘‘শিল্প-ভূষণ’’ বঁটা । মাজুলীৰ এক অগ্ৰণী সামাজিক-সাংস্কৃতিক অনুষ্ঠান সম্মিলিত শিল্পী সমাজ, মাজুলীয়ে বিগত বছৰৰ দৰে এইবছৰো অহা ১৫, ১৬ আৰু ১৭ নৱেম্বৰ, ২০২৪ তাৰিখে তিনিদিনীয়াকৈ শ্ৰীশ্ৰীকৃষ্ণৰ ৰাসলীলাৰ আয়োজন কৰিছে । এই ৰাস উৎসৱ উদযাপনৰ বাবে প্ৰস্তুতি প্ৰায় সম্পূৰ্ণ কৰিছে আয়োজকসকলে ।
ঊনবিংশতিতম্ বৰ্ষত ভৰি দিয়া সম্মিলিত শিল্পী সমাজ, মাজুলীয়ে এইবছৰৰ পৰা অসমৰ সামাজিক-সাংস্কৃতিক ক্ষেত্ৰলৈ বিশেষভাৱে বৰঙণি আগবঢ়োৱা একোজন ব্যক্তিক 'শিল্প-ভূষণ' বঁটাৰে বিভূষিত কৰিবৰ বাবে সিদ্ধান্ত গ্রহণ কৰিছে ।
প্ৰথমবাৰৰ বাবে এই বঁটা বৰপেটাৰ বিশিষ্ট শিল্পী তথা সংগীত অকাডেমী বঁটা প্রাপক শ্রীযুত গুনীন্দ্র নাথ ওজাক প্ৰদান কৰিবৰ বাবে সমিতিয়ে সিদ্ধান্ত গ্রহণ কৰিছে । ৰাসোৎসৱৰ পবিত্ৰ মঞ্চত বিশিষ্ট শিল্পীগৰাকীক এই বঁটা প্রদান কৰিব ।
