ৰঙিয়া,২৯ ছেপ্টেম্বৰ: নাগৰিক মঞ্চ ৰঙিয়াৰ উদ্যোগত শনিবাৰে সন্ধিয়া ৰঙিয়াৰ ঐতিহাসিক কৃষক শ্বহীদ ভৱনত ৰঙিয়া নগৰৰ পৌৰ সমস্যা সন্দৰ্ভত এক ৰাজহুৱা সভা অনুষ্ঠিত হয় । ৰঙিয়াৰ ৰাইজৰ মৌলিক অধিকাৰ, মৌলিক প্ৰাপ্যকে ধৰি কেইবাটাও গুৰুত্বপূৰ্ণ সমস্যাৰ ওপৰত আলোচনা কৰা হয় সভাখনত । সভাখনত নতুন কৈ আৰম্ভ হোৱা পৌৰ কৰ আৰু অন্যান্য সমস্যাসমূহৰ ওপৰতো বিতংভাৱে আলোচনা কৰা হয় ।
লগতে নগৰখনত বিগত সময়চোৱাত কেনেধৰণৰ উন্নয়নমূলক কাম হ’ল সেই বিষয়ৰ ওপৰতো আলোচনা কৰা হয় । এই সভাখনত ৰঙিয়াৰ প্ৰাক্তন বিধায়ক অনন্ত ডেকা, প্ৰাক্তন বিধায়ক ঘনশ্যাম কলিতা, ৰঙিয়া জ্যেষ্ঠ নাগৰিক, চিকিৎসক, অধিবক্তাকে ধৰি ৰঙিয়া নগৰখনৰ প্ৰত্যেকটো ৱাৰ্ডৰ সচেতন লোক সকলে সভাখনত অংশগ্ৰহণ কৰে । সভাখনৰ অন্তত বিভিন্ন বিষয়ৰ ওপৰত কেইবাটাও প্ৰস্তাৱ গ্ৰহণ কৰা হয় ।
সভাৰ অন্তত সংবাদমাধ্যমৰ সৈতে হোৱা সাক্ষাৎকাৰত ৰঙিয়াৰ প্ৰাক্তন ৱাৰ্ড কমিছনাৰ তথা বিজেপি কৰ্মী দ্বিপেন চক্ৰৱৰ্তীয়ে কয়,"সমগ্ৰ ৰঙিয়াৰ ৰাইজৰ মৌলিক প্ৰাপ্য তথা অধিকাৰৰ বিষয়ে আলোচনা কৰিবলৈ আমি আজি একত্ৰিত হৈছোঁ । ৰঙিয়াৰ প্ৰতিটো ৱাৰ্ড তথা অঞ্চলৰ পৰা ৰাইজ আজি উপস্থিত আছে । আগন্তুক বৰ্ধিত পৌৰ এলেকাৰ পৰাও মানুহ উপস্থিত আছে । বিগত সময়চোৱাত পৌৰসভাৰ উন্নয়নৰ কামবোৰ কেনেদৰে হৈ গ'ল সেই বিষয়ে ইয়াত পৰ্যালোচনা কৰা হৈছে । কিছুমান কামত আমি পৌৰসভাক প্ৰশংসা কৰিব লাগিব লগতে কিছুমান কথাত সমালোচনা কৰিব লাগিব । আগন্তুক সময়ত আমাৰ যি প্ৰাপ্য, যি অধিকাৰ এই বিষয়ে আলোচনা কৰা হৈছে সভাখনত ।"
