তিনিচুকীয়া, ২৩ ছেপ্টেম্বৰ : শাৰদীয় দুৰ্গাপূজালৈ মাজত মাথোঁ কেইটামান দিন বাকী । এনে পৰিস্থিতিত এতিয়া ৰাজ্যৰ চৌদিশে এক উখল-মাখল পৰিৱেশৰ সৃষ্টি হৈছে । ইয়াৰ সমান্তৰালভাৱে ৰাজ্যৰ চাহ বাগিচাসমূহতো উৎসৱমুখৰ পৰিৱেশে বিৰাজ কৰিছে ।
চাহ বাগিচাৰ লোকসকলে অতি আনন্দমনেৰে পালন কৰা এই শাৰদীয় দুৰ্গাপূজাৰ দিন সমাগত । আনহাতে, দুৰ্গাপূজাৰ বাবে অতি আগ্ৰহেৰে অপেক্ষা কৰি থাকে এই শ্ৰমিকসকলে । সেয়ে কণ কণ ল’ৰা-ছোৱালীৰ পৰা আৰম্ভ কৰি বৃদ্ধলৈকে, চাহ বাগিচাৰ লোকসকলে পূজাত পিন্ধিবৰ বাবে বজাৰ কৰিছে নতুন কাপোৰ ।
আনহাতে, পূৰ্বৰে পৰা চলি অহা এক নিয়ম হৈছে যে চাহ বাগিচাত কৰ্মৰত চাহ শ্ৰমিকসকলক দুৰ্গাপূজাৰ পূৰ্বে চাহ বাগিচা কৰ্তৃপক্ষই বোনাছ প্ৰদান কৰে । সেই বোনাছৰ টকাৰে তেওঁলোকে আনন্দৰে পাৰ কৰে দুৰ্গাপূজা ।
ঠিক সেইদৰেই ইতিমধ্যে ৰাজ্যৰ অধিকাংশ চাহ বাগিচাতে শ্ৰমিকক বোনাছ প্ৰদান কৰা হৈছে ৷ কিন্তু তাৰ এক বিপৰীত দৃশ্য দেখিৱলৈ পোৱা গৈছে তিনিচুকীয়া জিলাৰ পানীতোলা চাহ বাগিচাত ৷ তিনিচুকীয়া জিলাৰ পানীতোলা চাহ বাগিচাত চাহ শ্ৰমিকসকলক ২০ শতাংশ বোনাছ প্ৰদান নকৰাত সোমবাৰে বাগিচাখনত সৃষ্টি হয় এক উত্তপ্ত পৰিস্থিতিৰ ।
অসম চাহ জনজাতি ছাত্ৰ সন্থাৰ উদ্যোগত বাগিচাখনৰ শ শ চাহ শ্ৰমিক ওলাই আহি পানীতোলা চাহ বাগিচাৰ কাৰ্যালয় আৰু পৰিচালকৰ বাসগৃহ ঘেৰাও কৰি দুৰ্গাপূজাৰ পূৰ্বে ২০ শতাংশ বোনাছ প্ৰদান কৰাৰ দাবীৰে প্ৰতিবাদ সাব্যস্ত কৰে ৷
প্ৰতিবাদৰ সময়ত চাহ শ্ৰমিকসকলৰ এটায়ে শ্লোগান, “আমাক ২০ শতাংশ বোনাছ লাগিবই ।” চাহ শ্ৰমিকসকলৰ এই শ্লোগানেৰে পানীতোলাৰ আকাশ-বতাহ মুখৰিত হৈ পৰে । প্ৰতিবাদৰ সময়ত স্থানীয় আটছা নেতা তথা চাহ শ্ৰমিকসকলে কয়, "দুৰ্গাপূজাৰ পূৰ্বে চাহ শ্ৰমিকসকলক যিকোনো উপায়েৰে ২০ শতাংশ বোনাছ আদায় দিবই লাগিব । দুৰ্গাপূজাৰ পূৰ্বে বোনাছ ২০ শতাংশ নিদিয়ালৈকে বোনাছ গ্ৰহণ নকৰো । ২০ শতাংশ বোনাছ প্ৰদান নকৰিলে যিকোনো আইন-শৃংখলাজনিত পৰিস্থিতিৰ সৃষ্টি হ'ব পাৰে । তাৰ বাবে জগৰীয়া হ'ব বাগিচা কৰ্তৃপক্ষ, জিলা প্ৰশাসন আৰু তিনিচুকীয়া আৰক্ষী ।"
