ডিব্ৰুগড়, ৫ ছেপ্টেম্বৰ : অনলাইন ট্ৰেডিঙৰ নামত সংঘটিত প্ৰৱঞ্চনাৰ ঘটনাই ৰাজ্য জোকাৰি গৈছে । ৰাজ্যৰ বিভিন্ন প্ৰান্তৰ দৰে ডিব্ৰুগড়তো আটক হৈছে এজনৰ পিছত আন এজন অনলাইন ট্ৰেডিঙৰ নামত কোটি কোটি টকা ধন আত্মসাৎ কৰা মাষ্টাৰ মাইণ্ড ।
২২ বছৰীয়া বিশাল ফুকনৰ অনলাইন ট্ৰেডিঙৰ প্ৰৱঞ্চনাকাণ্ডৰ মাজতে ডিব্ৰুগড় আৰক্ষীয়ে আটক কৰিছিল Trading FX নামৰ প্ৰতিষ্ঠানটোৰ অসমৰ দায়িত্বত থকা ৰঞ্জিৎ কাকতিক । ডিব্ৰুগড়ৰ সদৰ আৰক্ষীয়ে অভিযান চলাই মঙলবাৰ নিশা ডিব্ৰুগড় চহৰৰ জীৱন ফুকন নগৰৰ পৰা ৰঞ্জিৎ কাকতি নামৰ প্ৰৱঞ্চকটোক গ্ৰেপ্তাৰ কৰিছিল ।
Trading FX নামৰ অনলাইন মানি ট্ৰেডিঙত ধন বিনিয়োগ কৰাৰ নামত বহুলোকৰ পৰা ধন সংগ্ৰহ কৰাৰ অভিযোগ ৰঞ্জিৎ কাকতিৰ বিৰুদ্ধে আৰক্ষীয়ে লাভ কৰা পিছতে আৰক্ষীয়ে আটক কৰি সদৰ থানাত জেৰা চলাইছে । ডিব্ৰুগড় আৰক্ষীয়ে জানিবলৈ দিয়া অনুসৰি ৩১৬/৩১৮ সংলগ্ন ২১/২৩ Banning of unregulated deposit scheme actৰ জৰিয়তে গোচৰ ৰুজু কৰি জেৰা চলোৱাৰ অন্তত ৰঞ্জিৎ কাকতিক আদালতত হাজিৰ কৰোৱা হৈছে ।
ৰঞ্জিৎ কাকতিক আদালতলৈ লৈ যোৱা সময়ত ডিব্ৰুগড় সদৰ থানাৰ ভুক্তভোগীয়ে প্ৰাপ্য বিচাৰি ভিৰ কৰা পৰিলক্ষিত হয় । বহু ভুক্তভোগীয়ে সদৰ থানাৰ চৌহদতে কান্দি কান্দি কেনেকৈ প্ৰৱঞ্চনাৰ বলি হ'ল সেই কথা কয় সংবাদ মাধ্যমত । ৰঞ্জিৎ কাকতিক অধিক জেৰাৰ বাবে নিজৰ জিম্মাত ল'বলৈ আদালতৰ অনুমতি বিচাৰিব ডিব্ৰুগড় আৰক্ষীয়ে ।
আনহাতে ডিব্ৰুগড় আৰক্ষীৰ জালত আন এজন অনলাইন ট্ৰেডিঙৰ নামত প্ৰৱঞ্চনা কৰা যুৱক গ্ৰেপ্তাৰ হৈছে বৃহস্পতিবাৰে । অভিজিৎ চন্দ নামৰ আন এজন যুৱকক বৃহস্পতিবাৰে গ্ৰেপ্তাৰ কৰিছে ডিব্ৰুগড় আৰক্ষীয়ে । অভিজিৎ চন্দ ৰঞ্জিৎ কাকতিৰ Trading FX নামৰ অনলাইন মানি ট্ৰেডিং গ্ৰুপৰ সদস্য বুলি জানিব পৰা গৈছে যদিও আৰক্ষীয়ে এতিয়াও আনুষ্ঠানিকভাৱে একো তথ্য প্ৰকাশ কৰা নাই ৷
লগতে পঢ়ক : অনলাইন ট্ৰেডিং কেলেংকাৰীৰ জালত নপৰিবলৈ মুখ্যমন্ত্ৰীয়ে দিলে এই পৰামৰ্শ...
শিলচৰত চিটফাণ্ডকাণ্ডত তৃণমূল কংগ্ৰেছৰ নেতাসহ ধৃত ৭
প্ৰৱঞ্চনাৰ গোচৰত অভিযুক্ত বিশাল ফুকনৰ সকলো সম্পত্তি জব্দ কৰাৰ সম্ভাৱনা
