গুৱাহাটী, ৩০ আগষ্ট: চুবুৰীয়া ৰাজ্যৰ সৈতে অসমৰ সীমা বিবাদ এক দীৰ্ঘদিনীয়া জটিল সমস্যা ৰূপে পৰিগণিত হৈ আহিছে । অসম চৰকাৰৰ সীমান্ত সুৰক্ষা আৰু উন্নয়ন বিভাগৰ তথ্য মতে চুবৰীয়া ৰাজ্যই বৰ্তমানলৈ অসমৰ মুঠ ৮২,৭৫১.৮৬১৮ হেক্টৰ ভূমি বেদখল কৰি ৰাখিছে । অসমৰ ভূমি বেদখল কৰি ৰখা চুবুৰীয়া ৰাজ্য কেইখন হ’ল অৰুণাচল প্ৰদেশ, মেঘালয়, মিজোৰাম আৰু নগালেণ্ড । অসমৰ সীমান্ত সুৰক্ষা আৰু উন্নয়ন বিভাগটোৰ মন্ত্রী অতুল বৰাই শুকুৰবাৰে বিধানসভাৰ শৰৎকালীন অধিবেশনৰ অন্তিম দিনা সদনত জনাইছে এই তথ্য ৷
কোন কোন ৰাজ্যই অসমৰ কিমান ভূমি বেদখল কৰি ৰাখিছে ?
অসম বিধানসভাৰ মজিয়াত সীমান্ত সুৰক্ষা আৰু উন্নয়ন বিভাগৰ মন্ত্রী অতুল বৰাই জনোৱা অনুসৰি সীমান্তৱৰ্তী ৰাজ্যসমূহে বৰ্তমানলৈকে বেদখল কৰি থকা অসমৰ ভূমিৰ পৰিমাণ হ'ল এনেধৰণৰ-
| ক্ৰমিক নং | ৰাজ্যৰ নাম | মুঠ দখল কৰা ভূমিৰ পৰিমাণ (হেক্টৰ) |
| 1. | অৰুণাচল প্ৰদেশ | ১৬,১৪৪.০১১৭ |
| 2. | নাগালেণ্ড | ৫৯,৪৯০.২১ |
| 3. | মেঘালয় | ৩,৪৪১.৮৬০১ |
| 4. | মিজোৰাম | ৩,৬৭৫.৭৮ |
এই তথ্য মতে নাগালেণ্ডেই সৰ্বাধিক পৰিমাণে অসমৰ ভূমি বেদখল কৰি আছে ৷ চুবুৰীয়া চাৰি ৰাজ্যৰ দ্বাৰা বেদখলকৃত সর্ব মুঠ ভূমিৰ পৰিমাণ হ’ল ৮২,৭৫১.৮৬১৮ হেক্টৰ ৷
সীমান্ত অঞ্চলত পহৰা চকী স্থাপন:
বিভাগীয় মন্ত্ৰী অতুল বৰাই সদৰী কৰা অনুসৰি যোৱা তিনি বছৰত সীমান্ত নিৰাপত্তা ব্যৱস্থা অধিক শক্তিশালী কৰিবলৈ কেতবোৰ পদক্ষেপো গ্ৰহণ কৰিছে অসম চৰকাৰে । অসম আৰক্ষীৰ আৰক্ষী অধীক্ষক (সীমান্ত) সকলৰ পৰা পোৱা তথ্য অনুসৰি যোৱা ৩ বছৰত সীমান্ত নিৰাপত্তা শক্তিশালী কৰিবলৈ সীমান্তত আৰক্ষী কমাণ্ডো বাহিনী নিয়োগ কৰাৰ লগতে ভালেমান সীমান্ত আৰক্ষী পহৰা শিবিৰ স্থাপন কৰিছে অসম চৰকাৰে ৷
ইয়াৰ ভিতৰত অসম-অৰুণাচল সীমান্তত লখিমপুৰৰ দুলুং বনাঞ্চলত ৩৮ জন কামাণ্ডো নিয়োজিত আছে আৰু নতুনকৈ শিবিৰ স্থাপনৰ প্ৰস্তুতি চলাই থকা হৈছে । মিজোৰামৰ সীমা চুই থকা কাছাৰ জিলাত ৮ টাকৈ সীমান্ত পহৰা চকী, মেঘালয়ক স্পৰ্শ কৰি থকা পশ্চিম কাৰ্বি আংলঙৰ সীমান্তত ৬ টাকৈ সীমান্ত পহৰা চকী আৰু নতুনকৈ ৩ টা সীমান্ত পহৰা চকীৰ ব্যৱস্থা অসম চৰকাৰে কৰিছে ।
ইয়াৰ উপৰিও বৰাক উপত্যকাৰ কৰিমগঞ্জৰ মিজোৰাম সীমান্ত অস্থায়ীভাৱে ২ টা কেম্প স্থাপন কৰিছে অসম চৰকাৰে । উজনি অসমৰ শিৱসাগৰ জিলাত নাগালেণ্ড সীমান্তত ৭ টাকৈ সীমান্ত পহৰা চকী আৰু কামাণ্ডো বাহিনী অসম চৰকাৰ নিয়োজিত কৰি ৰাখিছে ।
বৰাকৰ হাইলাকান্দিৰ মিজোৰাম সীমান্ততো ৪ টাকৈ অস্থায়ী সীমান্ত আৰক্ষী চকী স্থাপন কৰা হৈছে আৰু এটা স্থায়ী কামাণ্ডো বেটেলিয়ন কেম্প স্থাপন কৰা হৈছে । একেদৰে পাহাৰীয়া জিলা ডিমা-হাছাওৰ নাগালেণ্ড সীমান্তত ৪ টাকৈ নতুন সীমান্ত পহৰা চকী স্থাপন কৰা হৈছে ।
কিন্তু মন কৰিবলগীয়া যে যোৱা ৫ বছৰত অসমৰ চুবুৰীয়া ৰাজ্যই অসমৰ ভূমি বেদখল কৰা আৰু অসমে বেদখলকৃত ভূমি পুনৰুদ্ধাৰ কৰা বিতং তথ্য নাই অসম চৰকাৰৰ হাতত ৷ বিপৰীতে চুবুৰীয়া ৰাজ্য কেইখনৰ লগত সীমা বিবাদ নিস্পত্তিৰ বাবে এৰা-ধৰা আৰু বুজাবুজিৰে আলোচনা অব্যাহত ৰাখিছে অসম চৰকাৰে ।
কেনেদৰে চলিছে সীমান্ত বিবাদ নিস্পত্তি প্ৰক্ৰিয়া ?
২০২১ ত গঠন হোৱা মুখ্যমন্ত্ৰী হিমন্ত বিশ্ব শৰ্মা চৰকাৰৰ উদ্যোগত অসমে বিভিন্ন পৰ্যায়ত সীমান্ত বিবাদ নিষ্পত্তিৰ বাবে বিভিন্ন পৰ্যায়ত আলোচনা প্ৰক্ৰিয়া চলাই থকা পৰিলক্ষিত হৈ আহিছে ৷ অসম চৰকাৰৰ মন্ত্ৰীগৰাকীয়ে সদনত জনায় যে সীমান্ত বিবাদ নিষ্পত্তিৰ বাবে চুবুৰীয়া ৰাজ্যৰ বিবদিত সীমান্ত অঞ্চলত ১২ খন আঞ্চলিক সমিতি গঠন কৰি কাম কৰি থকা হৈছে । এই সমিতি সমূহে ৰাজ্য অনুসৰি বিবদিত সীমান্ত অঞ্চলত যৌথ ভ্ৰমণ কৰি আলোচনা প্ৰক্ৰিয়া আগবঢ়াই নিছে ।
অসম-অৰুণাচল প্ৰদেশৰ ৭১ খন গাঁৱৰ সীমা বিবাদ নিষ্পত্তি:
ইয়াৰ উপৰিও অসম চৰকাৰৰ মন্ত্ৰী অতুল বৰাই সদনত জনোৱা অনুসৰি যোৱা ২০২৩ ৰ ২০ এপ্ৰিলত অৰুণাচল প্ৰদেশে নিজৰ বুলি দাবী কৰা ১২৩ খন গাঁও সন্দৰ্ভত এখন বুজাবুজি চুক্তি স্বাক্ষৰিত হয় ৷ ফলত অসম অৰুণাচলৰ ৭১খন গাঁৱৰ বিবাদ নিষ্পত্তি হয় ৷ বিবাদ নিষ্পত্তি হোৱা গাঁও সমূহৰ সীমা নিৰ্ধাৰণৰ কাম কেন্দ্ৰীয় চৰকাৰৰ দ্বাৰা চলি থকাৰ লগতে বাকী ৫২খন গাঁৱৰ বাবে আলোচনা প্ৰক্ৰিয়া অব্যাহত থাকিব ।
লগতে পঢ়ক: অসমৰ ভূমিত নগাৰ আদৰণি তোৰণ, তীব্ৰ উত্তেজনা - Assam Nagaland border
বনাঞ্চল ধ্বংস কৰি নগাই চলাইছে উপদ্ৰৱ, বাটলু গুটিৰে আক্ৰমণ সাংবাদিকক
