গুৱাহাটী, ২৭ আগষ্ট : অসম বিধানসভাৰ শৰৎকালীন অধিৱেশনৰ আজি দ্বিতীয় দিনটোত অখিল গগৈৰ হেট্ৰিক ৷ এবাৰ বা দুবাৰ নহয় ৷ দিনটোত মুঠ তিনিবাৰকৈ বিধানসভাৰ পৰা নিলম্বন অখিল গগৈক । মঙলবাৰৰ দিনটোত অসম বিধানসভাৰ প্ৰধান ঘটনাক্ৰমৰ ভিতৰত আছিল অখিল গগৈ আৰু মুখ্যমন্ত্ৰী হিমন্ত বিশ্ব শৰ্মাৰ বাকযুদ্ধ । যাৰ ফলশ্ৰুতিত বিধানসভাৰ পৰা অধ্যক্ষই তিনিবাৰকৈ নিলম্বন কৰে বিধায়ক গগৈক ৷ বিধানসভাত সমগ্ৰ মঙলবাৰৰ দিনটো মুখ্যমন্ত্ৰী হিমন্ত বিশ্ব শৰ্মাই হিন্দু-মুছলমান প্ৰসংগৰে ৰাজনীতি কৰাৰ অভিযোগ অখিল গগৈৰ ৷
“বিধানসভাৰ মজিয়াত দিনটো হিন্দু-মুছলমান শুনি শুনি মোৰ কাণ বিষাই গৈছে ৷ মূৰ ঘূৰাই গৈছে ৷ মুখ্যমন্ত্ৰী-গৃহমন্ত্ৰীৰ দায়িত্ব হ’ল ৰাইজক সুৰক্ষা দিয়া ৷ কিন্তু আমাৰ মুখ্যমন্ত্ৰীয়ে চিভিল ৱাৰ লগাবলৈ চেষ্টা কৰিছে ৷” তৃতীয়বাৰ নিলম্বিত হোৱাৰ পিছত মুখ্যমন্ত্ৰীৰ বিৰুদ্ধে ৰাজ্যত গৃহযুদ্ধৰ পাতনি মেলিব খোজা বুলি গুৰুতৰ অভিযোগ উত্থাপন কৰিলে বিৰোধী বিধায়ক অখিল গগৈয়ে ৷
সন্ধিয়া তৃতীয়বাৰৰ বাবে বিধানসভাৰ পৰা নিলম্বিত হৈ অখিল গগৈৰ মন্তব্য, “আজি তিনি নম্বৰৰ বাবে মোক নিলম্বন কৰিলে ৷ পুৱাৰ পৰা গধূলিলৈকে যদি সদনত হিন্দু-মুছলমান আলোচনা কৰি থাকে, তেনেহ’লে কোনোবা সুস্থ মানুহ বহি থাকিব পাৰে নেকি ? মুখ্যমন্ত্ৰীয়ে হিন্দু-মুছলমানৰ মাজত কাজিয়া লগাবলৈ শপত খাই লৈছে ৷”
“মুখ্যমন্ত্ৰীয়ে বিধানসভাত হিন্দু-মুছলমান লৈ এইদৰে কৰা বক্তব্যৰ মই প্ৰতিবাৰে প্ৰতিবাদ কৰো ৷ যাৰ বাবে মোক একেদিনাই তিনিবাৰ নিলম্বন কৰিলে ৷ আমি অসমীয়া মানুহে হিন্দু-মুছলমানৰ কথা পাতি থাকিব নোৱাৰো ৷” এই মন্তব্য অখিল গগৈৰ ৷
অখিল গগৈৰ অভিযোগ যে ২০২৬ ৰ অসমৰ বিধানসভা নিৰ্বাচনক লৈ বিজেপিয়ে অসমত সাম্প্ৰদায়িকতাৰ জুই জ্বলাব খুজিছে ৷ সেয়ে মুখ্যমন্ত্ৰী হিমন্ত বিশ্ব শৰ্মাই হিন্দু-মুছলমান, উজনি-নামনি বিভাজন কৰিব খুজিছে ।
অখিল গগৈয়ে সংবাদ মাধ্যমক কয়, “কেৱল '২৬ ৰ কথা চিন্তা কৰি হিন্দু-মুছলমান কৰি থাকিলে নহ’ব ৷ গোটেই জীৱনৰ বাবে বিধায়ক পদ খাৰিজ কৰিলেও মই মুখ্যমন্ত্ৰীক সাম্প্ৰদায়িক বিষবাষ্প বিয়পাবলৈ নিদিও ৷”
লগতে পঢ়ক : চৰকাৰী চাকৰিতো ১০ শতাংশ সংৰক্ষণ লাগে মিঞাক : আমিনুল ইছলাম - Miya controversy
