নগাঁও : অসমত অব্যাহত আছে বন্যপ্ৰাণী আৰু বন্যপ্ৰাণীৰ অংগৰ চোৰাং বেহা । অতি গোপনে বন্যজন্তু তথা পক্ষীৰ শৰীৰৰ অংগ সৰবৰাহৰ চক্ৰ চলাইছে দুষ্টচক্ৰই । বুধবাৰে নিশা কাজিৰঙা বন বিভাগ আৰু নগাঁও আৰক্ষীৰ এক অভিযানে বন্যজন্তুৰ অংগৰ বেহাৰ ভয়ংকৰ তথ্য পোহৰলৈ আনে ।
জানিব পৰা মতে, বন্যজন্তুৰ অংগৰ সৰবৰাহৰ বিৰুদ্ধে অভিযান চলাই বুধবাৰে নিশা বৃহৎ সফলতা লাভ কৰিবলৈ সক্ষম হ'ল বন বিভাগ আৰু আৰক্ষী ।
বন্যপ্ৰাণীৰ অংগৰ সৰবৰাহ
এটা দুষ্টচক্ৰই নিশা বিভিন্ন জন্তুৰ অংগ, হাড় আদি বিক্ৰীৰ বাবে লৈ গৈ থকা অৱস্থাতে নগাঁও আৰক্ষী আৰু কাজিৰঙা বন বিভাগে অভিযান চলায় । এই অভিযানত জালত পৰে বন্যজন্তুৰ অংগৰ বেহাত জড়িত চক্ৰটো । কাজিৰঙা বন বিভাগৰ লগতে নগাঁও আৰক্ষীয়ে মৌখিকভাৱে জানোৱা অনুসৰি, কাজিৰঙা বন বিভাগে পাহাৰীয়া জিলা কাৰ্বি আংলঙৰ পৰা ৩ জনীয়া দলটোৱে পাহাৰীয়া এলেকাৰ পৰা বাঘ, হাতী আদি বন্যজন্তুৰ ছাল আৰু দাঁতৰ লগতে অন্যান্য অংগ বিক্ৰীৰ বাবে যো-জা চলোৱাৰ এক খবৰ গোপন খবৰ লাভ কৰিছিল । লগে লগে কাজিৰঙাৰ বন বিভাগৰ এটা দলে নগাঁও আৰক্ষীৰ সহযোগত অভিযান আৰম্ভ কৰে ।
সৰবৰাহকাৰী আটক
সেই অভিযানৰ মাজতে নগাঁৱৰ ননৈৰ ঘূৰঘূৰিৰ পৰা বন্যজন্তুৰ অংগসহ ৩ জনীয়া চক্ৰটোক আৰক্ষীয়ে আটক কৰিবলৈ সক্ষম হয় । ননৈৰ ঘূৰঘূৰিৰ ৩৬ নং ৰাষ্ট্ৰীয় ঘাইপথত আৰক্ষী আৰু বন বিভাগে খেদি খেদি কৰায়ত্ত কৰিবলৈ সক্ষম হ'ল ৩ সৰবৰাহকাৰীক । দুখন বাইকেৰে বন্যজন্তুৰ অংগসমূহ বিক্ৰীৰ বাবে লৈ যোৱা সময়তেই আৰক্ষী আৰু বন বিভাগৰ দলটোৱে কৰায়ত্ত কৰে বন্যজন্তুৰ অংগৰ ব্যৱসায়ত জড়িত লোক কেইজনক ।
বন্যজন্তুৰ অংগৰ ব্যৱসায়ৰ সৈতে জড়িত কাৰ্বি আংলঙৰ অমৰ হাঞ্চে, প্ৰবীণ চাংমাই আৰু নগাঁৱৰ মহিন্দ্ৰ বৰগ্ৰাঙক আটক কৰিবলৈ সক্ষম হয় অভিযানকাৰী দলটো । আটক কৰা লোক তিনিজনৰ পৰা আৰক্ষী আৰু বন বিভাগৰ অভিযানকাৰী দলটোৱে বাঘৰ ছাল, দাঁতৰ উপৰিও হাতীৰ দাঁতো উদ্ধাৰ কৰিবলৈ সক্ষম হয় ।
লগতে বন্যজন্তুৰ অংগ সৰবৰাহ চক্ৰটোৱে ব্যৱহাৰ কৰা বাইক দুখনৰ লগতে তিনিটাকৈ মোবাইল ফোনো আৰক্ষীয়ে জব্দ কৰে । বন্যজন্তুৰ অংগৰ ব্যৱসায়ৰ তথ্য পোহৰলৈ অহাৰ পিছতে উদ্বিগ্ন হৈ পৰিছে প্ৰকৃতিপ্ৰেমীসকল ।
