মৰাণ, ২৮ আগষ্ট : ধিঙৰ ধৰ্ষণ-কাণ্ডৰ পাছতেই উজনি অসমত একত্ৰিত হৈছে জাতি জনগোষ্ঠীয় দল-সংগঠনসমূহ । শেহতীয়াকৈ ৰাজ্যত সংঘটিত হোৱা নাৰী নিৰ্যাতনৰ ঘটনাৰ লগত মিঞা মুছলমান জড়িত থকাৰ অভিযোগ উত্থাপন কৰি অবৈধ মিঞা মুছলমানক অসমৰ পৰা নিষিদ্ধ কৰাৰ দাবী জনাইছে কেইবাটাও দল-সংগঠনে । ইয়াৰ মাজতে শিৱসাগৰ, চৰাইদেউ আৰু ডিব্ৰুগড়ত মিঞাৰ বিৰুদ্ধে হুংকাৰ প্ৰদান কৰা নেতাসকলক তলব কৰিছে প্ৰশাসনে ।
মঙলবাৰে অবৈধ মিঞা মুছলমানক উজনি অসম ত্যাগৰ দাবীত সোণাৰিত পোষ্টাৰিং কৰাৰ সময়তে আটক কৰা হৈছিল টাই আহোম যুৱ পৰিষদৰ কেন্দ্ৰীয় সভাপতিসহ জিলাৰ সহকাৰী সম্পাদক পাৰ্থ ৰাজকোঁৱৰক । অবৈধ মিঞা মুছলমানক উজনি অসম ত্যাগ কৰাৰ লগতে নগাঁওৰ খাৰুপেটীয়াৰ শাক-পাচলি চৰাইদেউত বন্ধ কৰিবৰ বাবে পোষ্টাৰিং কৰোতেই আৰক্ষীয়ে আটক কৰে টাইপাৰ কেন্দ্ৰীয় সভাপতিগৰাকীক ।
সোণাৰিৰ দৈনিক বজাৰত পোষ্টাৰিং কৰাৰ সময়তে সোণাৰি আৰক্ষীয়ে আটক কৰাৰ খবৰ ৰাজহুৱা হোৱাৰ পাছতে চৰাইদেউৰ সোণাৰি আৰক্ষী থানা ভৰি পৰে টাইপাৰ নেতা-কৰ্মীৰে । ৰাইজৰ দাবীত বিনাচৰ্তে মুকলি আকাশৰ তললৈ আহিল টাইপাৰ সভাপতি বিজয় ৰাজকোঁৱৰ আৰু পাৰ্থ ৰাজকোঁৱৰ ।
আৰক্ষীৰ ভয় দেখুৱাই লাভ নাই : বিজয় ৰাজকোঁৱৰ
মুকলি হোৱাৰ পিচতেই টাইপাৰ সভাপতি বিজয় ৰাজকোঁৱৰে কয়," আহোমসকলে ১৭ বাৰ অসমৰ পৰা মোগলক খেদিলে । সেই আহোমৰ নাতি পুতি আমি । সেই মিঞা খেদিব লাগিব আমি । আৰক্ষীয়ে নিজৰ কাম কৰিছে তাত আমাৰ ক'বলগা নাই । আমি আমাৰ দায়িত্ব পালন কৰিম । আৰক্ষীৰ ভয় দেখুৱাই আমাক লাভ নাই । আমাৰ স্থিতি একেই আছে, ৭ দিনৰ ভিতৰত উজনি অসম এৰিব লাগিব মিঞাই ।"
আটাছু নেতাক থানালৈ তলব :
মৰাণত মিঞাক ৭ দিনৰ সময়সীমা বান্ধি দিয়া পাছতেই আটাছু নেতাক থানালৈ তলব । এদিনৰ পূৰ্বে উজনি অসম মৰাণৰ পৰা ৭ দিনৰ ভিতৰত মিঞাক আঁতৰি যাবলৈ টাই আহোম ছাত্ৰ ছাত্ৰ সন্থাই সময়সীমা বান্ধি দিয়াৰ পিছতে সৰব হৈ পৰিছে আৰক্ষী প্ৰশাসন । মঙলবাৰে বিয়লি আটাছু কেন্দ্ৰীয় সমিতিৰ উপ সভাপতি দেৱজিত গগৈক খোৱাং থানালৈ তলব কৰি জবাবদিহি কৰে আৰক্ষীয়ে । ৩ ঘন্টাৰো অধিক সময় সোধা-পোছা কৰাৰ অন্তত কিছু নীতি নিৰ্দেশনা বান্ধি দিয়ে আটাছু নেতাগৰাকীক । সেই অনুসৰি অগণতান্ত্ৰিক পন্থা অৱলম্বন কৰিলেই আইনী ব্যৱস্থা লোৱা হ'ব নেতাগৰাকীৰ বিৰুদ্ধে ।
থানাৰ পৰা ওলাই মিঞাৰ বিৰুদ্ধে হুংকাৰ :
আটাছুৰ উপ সভাপতি দেৱজিত গগৈয়ে থানাৰ পৰা ওলাই আহিয়েই মিঞাৰ বিৰুদ্ধে হুংকাৰ দি কয়," অসমীয়াৰ অস্তিত্ব ৰক্ষাৰ সংগ্ৰামখন কৰিবলৈ গ'লে আমাক বিভিন্ন ক্ষেত্ৰৰ পৰা বাধা দিয়া হয় । আৰক্ষীয়ে নিজৰ কাম কৰাত বহু ক্ষেত্ৰত ব্যৰ্থ হৈছে । কিন্তু মিঞাৰ বিৰুদ্ধে সংগ্ৰাম অব্যাহত থাকিব ।"
মিঞা মুছলমানক সাত দিনৰ ভিতৰত উজনি অসম ত্যাগ কৰিবলৈ ইতিমধ্যে হুংকাৰ দিয়া কেইবাটাও সংগঠনৰ নেতালৈ চমন জাৰি কৰিছে জিলা শিৱসাগৰ জিলা প্ৰশাসনে । ইযাৰ মাজতো উজনিত আৰক্ষী থানাই থানাই জাতীয় সংগঠনৰ নেতাৰ মিঞাৰ বিৰুদ্ধে গৰ্জন দেখা গৈছে । সমান্তৰালভাৱে ডিব্ৰুগড় জিলাতো দেখা গৈছে এই পৰিৱেশ ।
