বঢ়মপুৰ, ১৪ জুন: নগাঁও জিলাৰ কামপুৰত বানৰ পিচত কপিলী নদীৰ প্ৰৱল খহনীয়াই চিন্তিত কৰিছে নৈপৰীয়া ৰাইজক । কোটিটকীয়া কপিলীৰ শৈলবান্ধ খহাৰ পিচতেই ৰাইজৰ মাজত আতংকই বিৰাজ কৰিছে । ৰাইজে অভিযোগ উত্থাপন কৰি কয় যে ৬ কোটি টকা ব্যয় সাপেক্ষে ৬০০ মিটাৰ দৈৰ্ঘ্যৰ উক্ত শৈলবান্ধটো নিৰ্মাণ কৰা হৈছিল যদিও ঠিকাদাৰৰ দুৰ্নীতিৰ বাবেই খহিবলৈ আৰম্ভ কৰিছে ।
উত্থাপিত অভিযোগ মতে, ঠিকাদাৰৰ গাফিলতিৰ বাবে কামপুৰৰ বৰচুঙত খহিল কোটিটকীয়া কপিলীৰ শৈলবান্ধ ৷ যাৰ বাবে শংকিত হৈ পৰিছে নৈপৰীয়া ৰাইজ ৷ ৰাইজৰ অভিযোগ মতে, ঠিকাদাৰে নিৰ্মাণত দুৰ্নীতি সংঘটিত কৰাৰ ফলত বছৰৰ প্ৰথমটো বানতে খহিল কোটিটকীয়া এই বান্ধটো ৷ জলসম্পদ বিভাগৰ অধীনত বিগত বৰ্ষত ৬ কোটি টকা ব্যয় সাপেক্ষে ৬০০ মিটাৰ দৈৰ্ঘ্যৰ উক্ত শৈলবান্ধটো বৰচুঙত নিৰ্মাণ কৰা হৈছিল ।
শৈলবান্ধটোৰ নিৰ্মাণ সম্পূৰ্ণ হোৱাৰ পিচত নৈপৰীয়া ৰাইজৰ মুখত হাঁহি বিৰিঙিছিল যদিও এবছৰ পিছতেই বান্ধটোৰ প্ৰায় ২৫ মিটাৰ খহাই নিয়ে । ইপিনে, কেইবা ঠাইতো ফাঁট মেলি বান্ধটো বহি যোৱাত শংকিত হৈ পৰিছে বৰচুং গাঁওবাসীৰ লগতে নৈপৰীয়া ৰাইজ । নিৰ্মাণৰ এবছৰৰ পিচতে শৈলবান্ধটো কিয় খহিল বুলি প্ৰশ্ন উত্থাপন কৰি স্থানীয় ৰাইজে নিৰ্মাণৰ সময়ত অনিয়ম সংঘটিত হোৱা বুলি কয় । ৰাইজে জলসম্পদ মন্ত্ৰী পীযুষ হাজৰীকাক শৈলবান্ধটো সন্দৰ্ভত তদন্ত কৰি দোষীক শাস্তি বিহিবলৈ দাবী জনাইছে । ৰাইজে অতি শীঘ্ৰে খহনীয়া প্ৰতিৰোধৰ বাবে জলসম্পদ বিভাগক পদক্ষেপ গ্ৰহণ কৰিবলৈও দাবী জনাইছে । এই ক্ষেত্ৰত বিভাগীয় মন্ত্ৰীয়ে কি ব্যৱস্থা গ্ৰহণ কৰে সেয়া লক্ষণীয় হ’ব ৷
