গুৱাহাটী, ১ এপ্ৰিল: আজিৰে পৰা পুনৰ দাম বাঢ়িল জীৱনদায়িনী ঔষধৰ । মুঠতে ঔষধ কিনাটো এতিয়া সাধাৰণ মানুহৰ বাবে আৰু কঠিন হৈ পৰিব । দুখীয়া, মধ্যবিত্ত তথা সৰ্বসাধাৰণ মানুহে শ্রম কৰি নিজৰ খোৱাখিনি কোনোমতে যোগাৰ কৰিব পাৰিলেও ঔষধ কিনাটো হয়তো আৰু সম্ভৱ হৈ নুঠিব । এফালে বিনামূলীয়া চাউল আনফালে ঔষধৰ মূল্য বৃদ্ধি । কেইদিনমানৰ আগলৈকে ৫০০ টকাত পোৱা চাৰিটা ছ’ডিয়াম টেবলেটৰ দাম বাঢ়ি ইতিমধ্যেই ৭৬৪.৯৫ টকা হ'ল ।
ইফালে ৫৫ টকাত পোৱা প্ৰেচাৰৰ টেবলেটৰ দাম ১১৫ টকা হ'ল । দাম বৃদ্ধি কৰা ঔষধ কোম্পানীসমূহে শাসকীয় বিজেপি দলক নিৰ্বাচনী বণ্ডৰ জৰিয়তে ৯১১ কোটি টকাৰ চান্দা দিয়াৰ অভিযোগ উঠিছে । সেই টকা ঘূৰাই অনাৰ বাবেই ঔষধৰ দাম বৃদ্ধি কৰি জনতাক ঔষধ কোম্পানীয়ে ৰামটাঙোন সোধোৱা বুলিও চর্চা হৈছে । ইয়াৰ পূৰ্বে ১২ শতাংশ ঔষধৰ দাম বৃদ্ধি পাইছিল । ২০২২ চনতো ১০ শতাংশ বৃদ্ধি পাইছিল ।
এই সম্পৰ্কে সচেতন নাগৰিক মছদ্দৰ হুছেইনে কয়, পহিলা এপ্ৰিলৰ দিনটোত ৮০০ বিধ ঔষধৰ দাম বৃদ্ধি কৰি বছৰটোৰ বাবে এপ্ৰিল ফুল কৰিলে । প্ৰতিবছৰে জীৱনদায়িনী ঔষধৰ মূল্য বৃদ্ধি কৰাটো নিয়মত পৰিণত হৈছে । ঔষধৰ দাম বৃদ্ধি কৰাৰ মূল কাৰণ হৈছে নিৰ্বাচনী বণ্ডৰ জৰিয়তে চৰকাৰক চান্দা দিছে । যাৰবাবে ঔষধ কোম্পানীসমূহক চৰকাৰে নিয়ন্ত্ৰণ কৰিব পৰা নাই ।
কামৰূপ মেডিচিন ডিলাৰ্চ এছ’চিয়েশ্যনৰ সভাপতি সন্তোষ দাস কয়, দাম বৃদ্ধি হোৱাটো মূল কথা নহয় । ০.০০৫৫% ৮০০ ঔষধৰ ব্ৰেণ্ডৰ মূল্য বৃদ্ধি পাইছে । মানুহৰ জীৱন দৈনিক প্ৰয়োজনীয় ঔষধবোৰ ১২-১৮% টেক্স দিব লাগে । উচ্চ ৰক্তচাপ, ডায়বেটিক, থায়ৰইড, মাল্টিভিটামিনকে ধৰি দুৰাৰোগ্য ৰোগৰ ঔষধবোৰ কৰ মুক্ত হ'ব লাগে । যদি কৰ থাকে তাত ৫ % বেছি হ'ব নালাগে ।
