গোলাঘাট, 7 আগষ্ট: অসম-নাগালেণ্ড সীমান্তৰে অবৈধভাবে সৰবৰাহ অব্যাহত আছে বাৰ্মিজ চুপাৰিৰ । নিতৌ ন ন কৌশল অৱলম্বন কৰি অসম-নাগালেণ্ড সীমান্তৰে সৰবৰাহকাৰীয়ে অব্যাহত ৰাখিছে বাৰ্মিজ চুপাৰিৰ সৰবৰাহ ৷ বুধবাৰে গোলাঘাটৰ মেৰাপানীৰ নলিনীপথাৰত গাঁওৰক্ষী বাহিনীৰ দলৰ এখন বলেৰ' পিক আপ ভানৰ ওপৰত সন্দেহ ওপজে আৰু পিক আপ ভান ৰখাই সোধ-পোছ কৰে ৷
এই সোধ-পোছ চলাওতেই মাটিকঁঠালৰ তলত বৃহৎ পৰিমাণৰ বাৰ্মিজ চুপাৰি প্ৰত্যক্ষ কৰে । বলেৰ' পিক আপ ভানখনৰ পঞ্জীয়ন নম্বৰ AS 02 DC 0919 ৷ ভানখনত আনাৰসৰ তলত 9 বস্তা চুপাৰী লুকুৱাই অনাৰ কথা চালকে গাঁওৰক্ষী বাহিনীৰ আগত কয় । পাছত গাঁওৰক্ষী বাহিনীৰ দলে এই সন্দৰ্ভত আৰক্ষীক অৱগত কৰে আৰু মেৰাপানী আৰক্ষী ঘটনাস্থলীত উপস্থিত হয় ৷ গাঁওৰক্ষী বাহিনীৰ দলে পিক আপ ভানখন মেৰাপানী আৰক্ষীক গতাই দিয়ে ।
আৰক্ষীয়ে বাহনখনৰ সৈতে অহা দুজন লোক শ্ৰীকান্ত মণ্ডল আৰু আব্দুল কালামক আটক কৰিছে । চালক শ্ৰীকান্ত মণ্ডলে দিয়া স্বীকাৰোক্তি অনুসৰি, নগাপাহাৰৰ নামনি অংশৰ পৰা নগাঁও জিলাৰ জখলাবন্ধালৈ বুলি চুপাৰিখিনি সৰবৰাহৰ চেষ্টা চলাইছিল । জব্দকৃত চুপাৰিখিনিৰ মূল্য এক লাখৰ অধিক হ'ব বুলি জানিব পৰা গৈছে ।
উল্লেখযোগ্য যে, চুবুৰীয়া ৰাষ্ট্ৰ ম্যানমাৰৰ লগত ভাৰতবৰ্ষৰ কোনোধৰণৰ বাণিজ্যিক চুক্তি নথকাৰ পাছতো দৈনিক চুবুৰীয়া ৰাজ্য নাগালেণ্ড-সীমান্তৰ মেৰাপানী হৈ দৈনিক সৰবৰাহ কৰি আহিছে বাৰ্মিজ চুপাৰিৰ চোৰাং সৰবৰাহ । এক গোপন সূত্ৰৰ পৰা জানিব পৰা মতে সীমন্তত নিয়োজিত চি আৰ পি এফৰ লগত গোপন অংকৰ বুজাবুজিৰে এই সৰহবৰাহ চলি আহিছে ।
