গোলাঘাট, ২৭ ফেব্ৰুৱাৰী: গোলাঘাট নগৰৰ টায়াৰ ব্যৱসায়ীসকললৈ আৰক্ষীৰ কঠোৰ নিৰ্দেশনা । দল-সংগঠনসমূহক ব্যৱসায়ীসকলে বিক্ৰী কৰিব নোৱাৰিব পুৰণি টায়াৰ । এই নিৰ্দেশনা ভংগ কৰা ব্যৱসায়ীৰ বিৰুদ্ধে আৰক্ষীয়ে ল'ব কঠোৰ ব্যৱস্থা । সমাগত লোকসভা নিৰ্বাচন । ইফালে চৰকাৰে সমগ্ৰ দেশতে কা' কাৰ্যকৰী কৰাৰো ঘোষণা কৰিছে । এনে পৰিস্থিতিত বিভিন্ন দল-সংগঠনে পুনৰ কা'ৰ বিৰুদ্ধে প্ৰতিবাদৰ বাবে সাজু হৈছে । এনে পৰিস্থিতিত যাতে কোনো দল-সংগঠনে টায়াৰ জ্বলাই প্ৰতিবাদ সাব্যস্ত কৰিব নোৱাৰে তাৰ প্ৰতি লক্ষ্য ৰাখিয়ে আৰক্ষীয়ে এই নিৰ্দেশ জাৰি কৰিছে ।
আৰক্ষীৰ এনে নিৰ্দেশনাক লৈ মিশ্ৰিত প্ৰতিক্ৰিয়া দেখিবলৈ পোৱা গৈছে । এগৰাকী সচেতন ব্যক্তি তথা টায়াৰ ব্যৱসায়ীয়ে এই সন্দৰ্ভত কয় যে চৰকাৰে কা আন্দোলন মষিমূৰ কৰাৰ উদ্দেশ্যে বিভিন্ন সময়ত দমন নীতি গ্ৰহণ কৰিছে । শেহতীয়াকৈ চৰকাৰে কা কাৰ্যকৰী কৰাৰ যো-জা কৰিছে যদিও অসমৰ ক্ষেত্ৰত এই আইনৰ কোনো প্ৰয়োজন নাই বুলি তেওঁ দাবী কৰিছে ।
ইফালে 'কা'ৰ বিৰোধিতা কৰি একাংশ নেতা শাসকীয় বিজেপিত যোগদান কৰা কাৰ্যকো তেওঁ তীব্ৰ ভাষাৰে গৰিহণা দিয়ে । তেওঁৰ মতে তেনেধৰণৰ নেতা সংগঠনত নথকাই ভাল । আনহাতে নিৰ্বাচন চমু চাপি অহাৰ লগে লগে কা'ক লৈ চৰকাৰে ৰাজনীতি আৰম্ভ কৰিছে বুলিও তেওঁ দাবী কৰিছে ।
ইফালে কা' বিৰোধী আন্দোলনৰ প্ৰতি লক্ষ্য ৰাখি সষ্টম হৈছে গোলাঘাট আৰক্ষী । দল-সংগঠনক টায়াৰ বিক্ৰীত নিষেধাজ্ঞা আৰোপ কৰাৰ সমান্তৰালকৈ প্ৰতিবাদকাৰীক মোকাবিলা কৰিবলৈ আৰক্ষীয়ে বিভিন্ন পৰিকল্পনা কৰিছে । গোলাঘাট সদৰ আৰক্ষী থানা চৌহদত আন্দোলনকাৰীক প্ৰতিহত কৰাৰ অনুশীলনো আৰম্ভ কৰিছে । তাৰ অংশ হিচাপে থানা চৌহদত আৰক্ষীয়ে এক অনুশীলন কাৰ্যসূচী ৰূপায়ণ কৰে ।
লগতে পঢ়ক :এফালে মুখ্যমন্ত্ৰীৰ জনসভা, আনফালে হাইস্কুল শিক্ষান্ত পৰীক্ষা
