নগাঁও, 23 জুন: দেওবাৰে নগাঁও প্ৰেছ ক্লাবৰ নতুন কাৰ্যনিৰ্বাহক সমিতি গঠন কৰা হয় । শনিবাৰৰ পৰা দুদিনীয়া কাৰ্যসূচীৰে আৰম্ভ হোৱা নগাঁও প্ৰেছ ক্লাবৰ দ্বি-বাৰ্ষিক অধিৱেশনৰ দেওবাৰে সামৰণি পৰে । নগাঁও প্ৰেছ ক্লাবৰ সভাপতি যাদৱ শইকীয়াৰ সভাপতিত্বত দেওবাৰে অনুষ্ঠিত হোৱা দ্বি-বাৰ্ষিক সাধাৰণ সভাত উদ্দেশ্য ব্যাখ্যা কৰে সাধাৰণ সম্পাদক অজিত কুমাৰ শইকীয়াই ।
ইয়াৰ পাচতে সাধাৰণ সম্পাদক অজিত কুমাৰ শইকীয়াই দাখিল কৰা সম্পাদকীয় প্ৰতিবেদনৰ লগতে বিগত দুবছৰীয়া কাৰ্যকালৰ বিত্তীয় প্ৰতিবেদন সাধাৰণ সভাই সৰ্বসন্মতি ক্ৰমে গ্ৰহণ কৰা হয় । উক্ত সভাত নগাঁও প্ৰেছ ক্লাবৰ সংবিধানৰ কেইবাটাও ধাৰাৰ সংশোধনী প্ৰস্তাৱ গ্ৰহণ কৰা হয় ।
নগাঁও প্ৰেছ ক্লাবৰ উপদেষ্টাদ্বয় কনক হাজৰিকা আৰু শৈলেন শইকীয়া উপস্থিত থকা সাধাৰণ সভাখনত প্ৰেছ ক্লাবৰ কাৰ্যপন্থা সন্দৰ্ভত বিস্তৃতভাৱে আলোচনা কৰাৰ লগতে ভালেকেইগৰাকী সদস্যই বিভিন্ন বিষয়ত মত পোষণ কৰে । ইয়াৰ পাচতে আগন্তুক দুটা বৰ্ষৰ কাৰ্যকালৰ বাবে অনুষ্ঠিত বিষয় বাছনি সভাত নগাঁও প্ৰেছ ক্লাবৰ সভাপতি পদত জিতেন বৰকটকী আৰু সাধাৰণ সম্পাদকৰ পদত নীলোৎপল বৰা বিনা প্ৰতিদ্বন্দ্বিতাৰে নিৰ্বাচিত হয় ।
লগতে পঢ়ক: দেশৰ ভিতৰতে ক্ৰীড়াৰ ক্ষেত্ৰত অন্যতম কেন্দ্ৰবিন্দু গুৱাহাটী : সৰ্বানন্দ সোণোৱাল - Olympic Day 2024
আনহাতে উপ-সভাপতি পদত পলাশ প্ৰতীম হাজৰিকা আৰু বৈদ্যনাথ চাহানী ভোটদান প্ৰক্ৰিয়াৰে নিৰ্বাচিত হয় । নতুন কাৰ্যনিৰ্বাহক সমিতিখনত কৃষ্ণ শইকীয়া আৰু বেদব্ৰত ৰাজাক সহকাৰী সম্পাদক, ফাইজুৰ ৰহমানক কোষাধ্যক্ষ, ভাস্কৰজ্যোতি শইকীয়াক পত্ৰিকা সম্পাদক, নাজিম উদ্দিন আহমেদক প্ৰচাৰ সম্পাদক, টমাছ ভূঞাক সাংস্কৃতিক সম্পাদক আৰু লক্ষ্যজ্যোতি বৰাক কাৰ্যালয় সম্পাদক হিচাপে বিনা প্ৰতিদ্বন্দিতাৰে নিৰ্বাচিত কৰা হয় ।
আনহাতে সাংবাদিক হেমেন কুমাৰ দাস, ছফিকুৰ ৰহমান, বিৰিঞ্চি ডেকা, তপন কুমাৰ বৰা, অজিত কুমাৰ শইকীয়া, মিন্টু দাস, ভাস্কৰজ্যোতি বৰা আৰু মহিবুল্লাহক কাৰ্যনিৰ্বাহক সদস্য হিচাপে মনোনীত কৰা হয় ।
