গোৱালপাৰা, ৩১ আগষ্ট: বিজ্ঞানৰ উন্নতিৰে গঢ় লৈ উঠিছে আধুনিক সমাজ ব্যৱস্থা ৷ এই উন্নতিৰ মাজতো ৰাজ্য়খনৰ ঠায়ে ঠায়ে কুসংস্কাৰ-অন্ধবিশ্বাসে থিতাপি লৈ আছে । তথ্য প্ৰযুক্তিৰ দিশত মানুহে বহু আগবাঢ়ি গৈছে যদিও এতিয়াও কিছু অঞ্চলত অন্ধবিশ্বাসৰ ধাৰা অব্যাহত থকাত দানৱৰ হাতত লুন্ঠিত হৈছে মানৱতা । তেনে এক ঘটনাই সংঘটিত হৈছে গোৱালপাৰাত । মিছন বিৰুবালাই এই ঘটনাটো পোহৰলৈ অনাত জিলাখনত সৃষ্টি হৈছে প্ৰতিক্ৰিয়াৰ । দুগৰাকী বৃদ্ধাক ডাইনী সজাই চৰম নিৰ্যাতন চলোৱাৰ তথ্য পোহৰলৈ আনিলে মিছন বিৰুবালাই।
গোৱালপাৰা জিলাৰ লক্ষীপুৰ আৰক্ষী থানাৰ অন্তৰ্গত কৃষ্ণাপুৰ গাঁৱত সভ্য সমাজক লজ্জানত কৰা এই জঘন্য ঘটনাটো সংঘটিত হৈছে । উত্থাপিত অভিযোগ অনুসৰি গাঁওখনৰ একাংশ লোকে অন্ধবিশ্বাসত ডুব গৈ দুগৰাকী বৃদ্ধাক ডাইনী সজাই চৰম নিৰ্যাতন চলায় । গাঁওখনৰ এগৰাকী কিশোৰ দীৰ্ঘদিনৰ পৰা অসুস্থ হৈ থকাত পৰিয়ালৰ লোকে কাষৰীয়া বামুনডাঙা গাঁৱৰ এগৰাকী বেজালিৰ ওচৰ চাপে । সেই হিচাপে বেজালিগৰাকীয়ে কিশোৰটিক তন্ত্ৰ-মন্ত্ৰৰে চিকিৎসা কৰি ডাইনী লম্ভা বুলি কয় । গাঁওখনৰ দুই বৃদ্ধাক ডাইনী বুলি সন্দেহ কৰি এই কাৰ্যত তেওঁলোকৰ হাত থকা বুলি কয়।
স্বয়ং গাঁওবুঢ়াই জড়িত হ'ল ডাইনী কাণ্ডত :
সেই বাবে যোৱা ২০ আগষ্টত গাঁওখনৰ গাঁওবুঢ়া কমল ৰাভাৰ নেতৃত্বত দুয়োগৰাকী বৃদ্ধাক চৰম নিৰ্যাতন চলায় । নিৰ্যাতন এনে পৰ্যায় পায়গৈ যে বৃদ্ধা দুগৰাকীক মানুহৰ বিষ্ঠা খবলৈয়ো বাধ্য কৰায় । ইফালে, এনে নিৰ্যাতনৰ কথা যাতে কোনেও গম নাপায় তাৰ বাবে বৃদ্ধা দুগৰাকী কঠোৰ সকীয়নি প্ৰদান কৰে অভিযুক্ত কেইজনে।
অভিযান চলালে মিছন বিৰুবালাই :
পিছত মিছন বিৰুবালাই এই ঘটনাৰ উমান পোৱাত যোৱা ৩০ আগষ্টত লক্ষীপুৰ আৰক্ষী থানাত এই সন্দৰ্ভত এখন এজাহাৰ দাখিল কৰে । সেই এজাহৰৰ ভিত্তিত লক্ষীপুৰ থানাৰ আৰক্ষীয়ে তাৎক্ষণিক ব্যৱস্থা গ্ৰহণ কৰি এজাহৰ দাখিলৰ পিছদিনা অৰ্থাৎ শনিবাৰে মহিলাসহ ১৩ গৰাকী অভিযুক্তক গ্ৰেপ্তাৰ কৰি আদালতত হাজিৰ কৰোৱাত আদালতে তেওঁলোকক জেল হাজোতলৈ প্ৰেৰণ কৰে।
