বৰপেটাৰোড 2 জুন : গুৱাহাটী বিশ্ববিদ্যালয়ৰ ৱেবচাইটত নম্বৰ তালিকা অৰ্থাৎ মাৰ্কশ্বীট জালিয়াতিৰ অভিযোগ ৷ বিশ্ববিদ্যালয়খনৰ অন্তৰ্গত বৰপেটাৰোডৰ গণেশলাল চৌধুৰী মহাবিদ্যালয়ৰ এজন ছাত্ৰৰ মাৰ্কশ্বীট পৰীক্ষণৰ পিচতে উত্থাপন হৈছে এই অভিযোগ ৷ জি এল চি মহাবিদ্যালয়ৰ অভিযুক্ত এই ছাত্ৰজনৰ নাম আজিজুল হক ৷ মহাবিদ্যালয়খনৰ গণিত বিভাগৰ যষ্ঠ ষান্মাষিকৰ ছাত্ৰ আজিজুল ৷ এই ছাত্ৰজনে ইতিমধ্যে ষষ্ঠ ষান্মাষিকৰ পৰীক্ষাত অৱতীৰ্ণ হৈছে ৷
এই ছাত্ৰজনে ইতিপূৰ্বে উত্তীৰ্ণ হোৱা প্ৰথম, তৃতীয়, চতুৰ্থ আৰু পঞ্চম ষান্মাসিকৰ পৰীক্ষা সমূহত পোৱা Cumulative Grade Point Average চমুকৈ চি জি পি এ আছিল চি, বি অথবা পি ৷ ছাত্ৰজনে লাভ কৰা নম্বৰ তালিকা অৰ্থাৎ মাৰ্কশ্বীট মহাবিদ্যালয়ৰ কাৰ্যালয়তো মজুত হৈ আছে ৷ কিন্তু শনিবাৰে গণিত বিভাগৰ পৰা বিশেষ কাৰণত আন একাংশ ছাত্ৰ-ছাত্ৰীৰ লগতে আজিজুল হকৰ মাৰ্কশ্বীটখন বিচৰা হয় ৷ কিন্তু আজিজুলে এখন নতুন মাৰ্কশ্বীট কৰ্তৃপক্ষৰ হাতত জমা দিয়ে বুলি অভিযোগ উত্থাপন হয় ৷
অভিযোগ অনুসৰি ছাত্ৰজনে নতুনকৈ জমা দিয়া মাৰ্কশ্বীটখনত পূৰ্বে প্ৰাপ্ত কৰাতকৈ নম্বৰ বৃদ্ধি হৈ থকাতো বিভাগটোৰ অধ্যাপক সকলৰ দৃষ্টিগোচৰ হয় ৷ ইয়াৰ পিচত তেওঁলোকে এই মাৰ্কশ্বীটখন গুৱাহাটী বিশ্ববিদ্যালয়ৰ ৱেৱ চাইটতো নিৰীক্ষণ কৰে আৰু তাতো নতুন মাৰ্কশ্বীট আপলোড হৈ থকা দেখি হতভম্ভ হৈ পৰে তেওঁলোক ৷ তেওঁলোকে বিশ্ববিদ্যালয়ৰ ৱেৱচাইটত থকা নতুন মাৰ্কশ্বীটখন ডাউনলোড কৰাৰ লগতে তেওঁলোকৰ হাতত মজুত থকা তথা ছাত্ৰজনৰ পৰা প্ৰতিটো পৰীক্ষাৰ পিচতে সংগ্ৰহ কৰা মাৰ্কশ্বীটৰ প্ৰতিলিপি উলিয়াই ৷
এই মাৰ্কশ্বীট কেইখন পৰীক্ষা কৰাত ইতিমধ্যে হৈ যোৱা পৰীক্ষাসমূহৰ দ্বিতীয়টো ষান্মাষিকৰ পৰীক্ষাক বাদ দি বাকী কেইটা পৰীক্ষাত নম্বৰ বৃদ্ধি কৰা বুলি অভিযোগ কৰে মহাবিদ্যালয় কৰ্তৃপক্ষই৷ এই সন্দৰ্ভত মহাবিদ্যালয় কৰ্তৃপক্ষই ছাত্ৰজনক জেৰা কৰে ৷ ইয়াৰ পিচতে মহাবিদ্যালয় কর্তৃপক্ষই এই সন্দৰ্ভত বৰপেটাৰোড আৰক্ষী থানাত এখন এজাহাৰ দাখিল কৰাত আৰক্ষীয়ে ছাত্ৰজনক আটক কৰি থানালৈ লৈ আহে ৷ কিন্তু বৰপেটাৰোড আৰক্ষীয়ে ছাত্ৰজনক এই সন্দৰ্ভত বিশেষ কোনো সোধ-পোছ নকৰাকৈ নামমাত্ৰ গোচৰ ৰুজু কৰি ছাত্ৰজনক মুকলি কৰি দিয়ে বুলি এতিয়া অভিযোগ উত্থাপন হৈছে ৷
