গুৱাহাটী: ৰাজ্যত ৩ নৱেম্বৰৰ পৰা ৯ নৱেম্বৰলৈ পালন কৰা হ'ব 'ভাষা গৌৰৱ সপ্তাহ' । আজি অৰ্থাৎ দেওবাৰে কেবিনেট বৈঠকৰ পাছতে এখন সংবাদমেল সম্বোধন কৰি এই সন্দৰ্ভত মুখ্যমন্ত্রী ড৹ হিমন্ত বিশ্ব শৰ্মাই কয়, "ভাষা গৌৰৱ সপ্তাহ পালনৰ মূল উদ্দেশ্য হৈছে যে ৩ অক্টোবৰত প্ৰধানমন্ত্রী নৰেন্দ্ৰ মোদীৰ নেতৃত্বত হোৱা ভাৰত চৰকাৰৰ কেবিনেটে অসমীয়া ভাষাক ধ্ৰুপদী ভাষা মৰ্যাদা দিয়ে । অসমীয়া ভাষাই ধ্ৰুপদী ভাষাৰ মৰ্যাদা পোৱাৰ যাত্রাকলৈ অসম প্ৰকাশন পৰিষদে এটা সুন্দৰ টেকনিকেল ৰি'পৰ্ট নিৰ্মাণ কৰিছে । এই টেকনিকেল ৰি'ৰ্টৰ সংক্ষিপ্ত বিৱৰণটো আমি প্ৰকাশ কৰি উলিয়াইছো ।"
মুখ্যমন্ত্ৰী শৰ্মাই লগতে কয়, "ভাষা গৌৰৱ সপ্তাহৰ সময়ত ভাষাটোলৈ অৱদান আগবঢ়োৱাসকলৰ প্ৰতি ধন্যবাদ জনাই সভা অনুষ্ঠিত কৰাৰ বাবে ৰাজ্যৰ বিভিন্ন অনুষ্ঠান-প্ৰতিষ্ঠানৰ প্ৰতি আমি আহ্বান জনাইছো । শিক্ষানুষ্ঠানসমূহত ভাষা সম্পৰ্কীয় বিভিন্ন অনুষ্ঠানৰ আয়োজন কৰা হ'ব । অসমত অসমীয়াৰ লগতে মুঠ ১৪ টা ভাষাক বিভিন্ন পৰ্যায়ত চৰকাৰী স্বীকৃতি দিয়া আছে ৷ ভাষা গৌৰৱ সপ্তাহত সকলোৱে নিজৰ নিজৰ স্বীকৃত ভাষাৰে চৰ্চা কৰিব পাৰিব । এই সভাবোৰৰ পৰাই আমি অসমীয়া ভাষাক ধ্ৰুপদী ভাষাৰ মৰ্যাদা দিয়াৰ বাবে প্ৰধানমন্ত্রী নৰেন্দ্ৰ মোদীক ধন্যবাদ জনাম ।"
তেওঁ আৰু কয়, "এই সভাবোৰৰ পৰাই আমি অসমীয়া ভাষাক ধ্ৰুপদী ভাষাৰ মৰ্যাদা দিয়াৰ বাবে প্ৰধানমন্ত্রী নৰেন্দ্ৰ মোদীক ধন্যবাদ জনাম । আমি এই সপ্তাহৰ ভিতৰত কেইবাহাজাৰ পত্র যাতে প্ৰধানমন্ত্রীলৈ লিখিব পাৰো তাৰবাবে চেষ্টা কৰিছো । ৩ নৱেম্বৰত প্ৰতিগৰাকী মন্ত্রী একোখন জিলাৰ কেন্দ্ৰীয় অনুষ্ঠানত উপস্থিত থাকিব । তাৰ পিছত এইটো এটা সামাজিক অনুষ্ঠান হ'ব আৰু ইয়াত চৰকাৰী নাথাকিব । ৰাইজে নিজে কৰিব । ইফালে নিৰ্বাচনী আচৰণ-বিধি চলি থকা অঞ্চলত চৰকাৰী অনুষ্ঠান পতা নহ’ব, কিন্তু তাত সামাজিক অনুষ্ঠান পতাত কোনো অসুবিধা নাথাকিব ৷"
লগতে পঢ়ক: অসমীয়া ভাষাক ধ্ৰুপদী ভাষাৰ মৰ্যাদা প্ৰদানৰ সন্মানাৰ্থে ৰাজ্য চৰকাৰৰ উদ্যোগত ভাষা গৌৰৱ সপ্তাহ
