গোৱালপাৰা, ১২ জুলাই : বৃহস্পতিবাৰে সন্ধিয়া নৱাগত শিমলীতোলা নয়াপাৰাত সংঘটিত মৰ্মান্তিক নাও দুৰ্ঘটনাত নিহতৰ পৰিয়ালৰ বাসগৃহত শুকুৰবাৰে উপস্থিত হয় মুখ্যমন্ত্ৰী ডঃ হিমন্ত বিশ্ব শৰ্মা । তেওঁ এই শোকাৱহ দুৰ্ঘটনাটোত নিহতসকলৰ পৰিয়ালবৰ্গক সাক্ষাৎ কৰি সমবেদনা জনায় । লগতে প্ৰতিগৰাকী নিহতৰ পৰিয়াললৈ ৪ লাখ টকাকৈ আৰ্থিক সাহাৰ্য প্ৰদান কৰে মুখ্যমন্ত্ৰী ডঃ শৰ্মাই ।
নাও দুৰ্ঘটনাটোত নিহত প্রসেনজিৎ সাহা আৰু গৌৰাংগ মালাকাৰৰ বাসগৃহত উপস্থিত হৈ মুখ্যমন্ত্ৰীয়ে পৰিয়ালটোৰ লোকসকলক সান্ত্বনা দিয়াৰ লগতে নিহতসকলৰ পৰিয়ালবৰ্গৰ প্ৰতি সমবেদনা জ্ঞাপন কৰে ।
পৰিয়ালবৰ্গক সাক্ষাতৰ পিচত সাংবাদিকৰ সৈতে মত বিনিময় কৰি মুখ্যমন্ত্ৰীয়ে কয়, "যোৱা বৃহস্পতিবাৰে এগৰাকী মহিলাৰ মৃতদেহ সৎকাৰ কৰিবলৈ গৈ উভতি অহাৰ পথত সংঘটিত নাও দুৰ্ঘটনাটো অতি মৰ্মান্তিক ঘটনা আছিল । উক্ত ঘটনাটোত ৫ গৰাকীকৈ লোকে কৰুণ মৃত্যুক সাৱটি ল'বলগীয়া হয় । নাও দুৰ্ঘটনাত নিহত পাঁচোগৰাকী লোক মৃত মহিলাগৰাকীৰ আত্মীয় আছিল ।"
আনহাতে, এনেকুৱা ঘটনা যাতে দ্বিতীয়বাৰ সংঘটিত হ'ব নোৱাৰে তাৰ বাবে সকলোকে সতৰ্ক থাকিবলৈও তেওঁ আহ্বান জনায় । লগতে নিহতসকলৰ নিকটাত্মীয়লৈ ৪ লাখকৈ টকাৰ আৰ্থিক সাহাৰ্য প্ৰদান কৰাৰ লগতে নিহতৰ পৰিয়ালবৰ্গলৈ অন্যান্য সাহাৰ্য প্ৰদানৰো আশ্বাস দিয়ে মুখ্যমন্ত্ৰীয়ে ।
ইফালে মৃতদেহ সৎকাৰ কৰা শ্মশানখন যিহেতু বিলখনৰ মাজভাগত আছে আৰু বৰ্তমান চাৰিওফালে পানী, গতিকে পানী শুকুৱাৰ পিচত শ্মশানখনলৈ যোৱা ৰাস্তাটোৰ কেনেকৈ উন্নয়ন কৰিব পাৰি সেই বিষয়ে চিন্তা-চর্চা কৰাৰ লগতে শ্মশানঘাট উন্নয়নৰো আশ্বাস প্ৰদান কৰে মুখ্যমন্ত্ৰীয়ে ।
উল্লেখ্য, গোৱালপাৰা জিলাৰ নৱাগত শিমলীতোলাৰ নয়াপাৰাত বৃহস্পতিবাৰে বিয়লি সংঘটিত শোকাৱহ নাও দুৰ্ঘটনাটোত নাৱৰ পৰা পানীত পৰি পাঁচজন লোক উটি যায় । তাৰে ভিতৰত তিনিজনৰ মৃতদেহ ঘটনাটোৰ পিচতে উদ্ধাৰ হয় যদিও সন্ধানহীন হয় আনি দুজন লোক । শুকুৰবাৰে নিৰুদ্দেশ হৈ থকা আৰু এজন লোকৰ মৃতদেহ উদ্ধাৰ কৰা হয় যদিও এজনৰ সন্ধান এতিয়া লাভ কৰিব পৰা হোৱা নাই ৷
এই নাও দুৰ্ঘটনাটোত মৃত্যু হোৱা গৌৰাংগ মালাকাৰ, জীৎ কৰ্মকাৰ আৰু উদয় মালাকাৰ হৈছে একেটা পৰিয়ালৰে সদস্য । জানিব পৰা মতে, উদয় মালাকাৰৰ পত্নীৰ মৃতদেহ সৎকাৰ কৰি শ্মশানৰ পৰা উভতি অহাৰ সময়তে সংঘটিত হৈছিল এই মৰ্মান্তিক নাও দুৰ্ঘটনাটো ।
