গুৱাহাটী: ৰাজ্যজুৰি বিশেষ চৰ্চা লাভ কৰা অনলাইন ট্ৰেডিং কেলেংকাৰীৰ চাৰি অভিযুক্তৰ বিৰুদ্ধে চি বি আইৰ তদন্তকাৰী দলে বৃহস্পতিবাৰে গুৱাহাটীৰ বিশেষ চি বি আই আদালতত অভিযোগনামা দাখিল কৰিছে । চি বি আয়ে বৃহস্পতিবাৰে অভিযুক্ত বিশাল ফুকন, অভিজিৎ চন্দ, চুমী বৰা আৰু তাৰ্কিক বৰাৰ বিৰুদ্ধে গুৱাহাটীৰ বিশেষ চি বি আই আদালতৰ আগত অভিযোগনামা দাখিল কৰে । অভিযুক্তসকলৰ গ্ৰেপ্তাৰ কৰাৰ ৯০ দিনৰ ভিতৰত এক বৃহৎ পৰিমাণৰ বিত্তীয় জালিয়াতিৰ সন্দৰ্ভত চলি থকা তদন্তটোৰ আজি চি বি আয়ে অভিযোগনমা দাখিল কৰে ।
চি বি আইৰ দ্বাৰা কৰা তদন্তত চাৰিজন অভিযুক্ত ব্যক্তিৰ বিৰুদ্ধে যথেষ্ট গুৰুত্বপূৰ্ণ প্ৰমাণ পোৱা গৈছে বুলি অভিযোনামাত উল্লেখ কৰিছে । অভিযোগনামাত উল্লেখ কৰা অনুসৰি, অভিযুক্তসকল এটা অবৈধ জমা আঁচনিৰ সৈতে জড়িত আছিল যিয়ে ভুৱা প্ৰচাৰৰ অধীনত বিনিয়োগকাৰীসকলৰ পৰা পুঁজি বিচাৰিছিল । তেওঁলোকে বিনিয়োগকাৰীসকলক ৩০ শতাংশ নিশ্চিত লাভৰ প্ৰতিশ্ৰুতিৰে প্ৰলোভিত কৰিবলৈ ষ্টাম্প পেপাৰ আৰু ভুৱা বিনিয়োগ প্ৰতিবেদনকে ধৰি প্ৰতাৰণাৰ উপায় ব্যৱহাৰ কৰিছিল ।
তেওঁলোকে বিনিয়োগকাৰীসকলক প্ৰতাৰণা কৰিছিল আৰু তেওঁলোকৰ ব্যক্তিগত লাভৰ বাবে জমাৰ অপব্যৱহাৰ কৰিছিল । অভিযোনামাত উল্লেখ কৰা অনুসৰি, এই গোচৰৰ সন্দৰ্ভত অভিযুক্ত চুমী বৰাৰ জামিন আবেদন ১৯ নৱেম্বৰত গুৱাহাটীৰ চি বি আই গোচৰৰ বিশেষ ন্যায়াধীশৰ দ্বাৰা নাকচ কৰা হৈছিল আৰু তেওঁ ন্যায়িক জিম্মাত আছে । অভিযোনামাত উল্লেখ কৰা মতে এই গোচৰটোকে ধৰি অনিয়মিত জমা আঁচনিৰ জৰিয়তে বিনিয়োগকাৰীসকলক প্ৰতাৰণা কৰাৰ অভিযোগৰ সৈতে সম্পৰ্কিত অসমৰ ৪১ টা গোচৰৰ তদন্ত চি বি আয়ে কৰি আছে ।
চি বি আয়ে যোৱা ১৮ নৱেম্বৰত ট্ৰেডিং কেলেংকাৰীত অভিযুক্ত মনালিছা দাসৰ বিৰুদ্ধে এটা গোচৰত অভিযোগনামা দাখিল কৰিছে বুলি অভিযোগনামাত উল্লেখ কৰিছে । অভিযোগনামাত উল্লেখ কৰা মতে চি বি আয়ে, পাঁচখন ৰাজ্য তথা কেন্দ্ৰীয় শাসিত অঞ্চলৰ ৯৩ টা স্থানত নতুনকৈ অনুসন্ধান চলাই আছে । এই অনুসন্ধানৰ ফলত ম'বাইল ফোন, ডেস্কটপ, হাৰ্ড ড্ৰাইভ আৰু লেপটপ জব্দ কৰা হৈছে ।
তদন্তৰ সময়ত, চি বি আয়ে সফলতাৰে এই অনিয়ন্ত্ৰিত জমা আঁচনিসমূহত বিনিয়োগ কৰিবলৈ গৈ প্ৰতাৰিত হোৱা জমাকৰ্তাসকলৰ বিৱৰণ থকা ডাটাবেছসমূহৰ সন্ধান কৰিছে । অভিযোনামাত উল্লেখ কৰা মতে, ২০১৮ চনৰ পৰা অভিযুক্ত ব্যক্তিসকলে গেৰাণ্টেড ৰিটাৰ্ণ প্ৰদান কৰি কেইবাজনো জমাকৰ্তাৰ পৰা যথেষ্ট পৰিমাণৰ ধন সংগ্ৰহ কৰিছিল ।
ইয়াৰ বিনিময়ত তেওঁলোকে জমাকৰ্তাসকলক লেনদেনৰ প্ৰমাণ হিচাপে ১০০ টকাৰ ষ্টাম্প পেপাৰত ৰূপায়ণ কৰা নথিপত্ৰ প্ৰদান কৰিছিল । অৱশ্যে, যোৱা মাহবোৰত বহুতো জমাকৰ্তাই অনিয়মিত পৰিশোধৰ কথা প্ৰকাশ কৰিছিল আৰু বহুতে তেওঁলোকৰ প্ৰতিশ্ৰুতি দিয়া ৰিটাৰ্ণ সম্পূৰ্ণৰূপে লাভ কৰাত ব্যৰ্থ হৈছিল । বিভিন্ন গোচৰত অধিক তদন্ত অব্যাহত আছে বুলি অভিযোগনামাত উল্লেখ কৰিছে ।
