বিলাসীপাৰা, ১৬ মে': বিহাৰত গংগা নৈত গা ধুবলৈ গৈ মৃত্যুবৰণ কৰা অসম আৰক্ষীৰ জোৱান মিণ্টু ৰায়ক বিলাসীপাৰাৰ বাসভৱনত সম্পূৰ্ণ সামৰিক মৰ্যদাৰে শ্ৰদ্ধাঞ্জলি নিবেদন কৰা হয় । বৃহস্পতিবাৰে মিণ্টু ৰায়ৰ মৃতদেহ স্বগৃহলৈ অনাৰ পাছতে এক শোকাকুল পৰিৱেশৰ মাজত অসম আৰক্ষীয়ে সামৰিক মৰ্যাদাৰে শেষ শ্ৰদ্ধা নিবেদন কৰে ।
বিলাসীপাৰাৰ সন্তান তথা অসম আৰক্ষীৰ জোৱান মিণ্টু ৰায়ে বিহাৰত লোকসভা নিৰ্বাচনৰ কৰ্তব্য পালন কৰিবলৈ গৈছিল । মঙলবাৰে দুই সতীৰ্থৰ লগত গা ধুবলৈ গৈছিল ৰাজ্যখনৰ সমষ্টিপুৰৰ গংগা নদীত । গা ধুই থাকোতেই তিনিওজন জোৱান গংগাৰ ঘূলিত পৰি যায় । কাষতে থকা নাৱৰীয়াই দুজনক জীৱন্তে উদ্ধাৰ কৰে যদিও মিন্টুক উদ্ধাৰ কৰিবলৈ সক্ষম নহয় ।
বুধবাৰে এন ডি আৰ এফে অভিযান চলাই ৰায়ৰ মৃতদেহ উদ্ধাৰ কৰে । বৃহস্পতিবাৰে ৰায়ৰ নশ্বৰদেহ বিলাসীপাৰাৰ ৯ নং ৱাৰ্ডৰ বাসভৱনলৈ অনাৰ লগে লগে এক শোকাকুল পৰিস্থিতিৰ সৃষ্টি হয় । যুৱকজনৰ আত্মীয় স্বজনৰ লগতে গাঁওবাসীয়ে শেষ শ্ৰদ্ধা জ্ঞাপন কৰে । জোৱানজনক অসম আৰক্ষীয়ে সামৰিক মৰ্যাদাৰে শেষ শ্ৰদ্ধা নিবেদন কৰে ।
অসম আৰক্ষীৰ মহাপৰিদৰ্শক দিলীপ কুমাৰ দে’, ধুবুৰীৰ আৰক্ষী অধীক্ষক নবীন সিং, ১ম বেটেলিয়নৰ অধীক্ষক মোছলেম উদ্দিন আহমেদ, ২০ তম ভাৰতীয় সংৰক্ষিত বেটেলিয়নৰ অধীক্ষক, বিহাৰৰ আৰক্ষীৰ বিষয়া, মহকুমাধিপতি, বিপনন বিভাগৰ অধ্যক্ষ ড৹ অশোক কুমাৰ সিংহী, বিধায়ক ছামছুল হুদাকে ধৰি কেইবাজনো ৰাজনৈতিক নেতা, শীৰ্ষ বিষয়া, দল-সংগঠনৰ নেতৃবৃন্দই ৰায়ক অন্তিম শ্ৰদ্ধা জ্ঞাপন কৰে ।
অসম আৰক্ষীৰ মহাপৰিদৰ্শক দিলীপ কুমাৰ দে'ই ৰায়ৰ বিভাগীয় কাম-কাজসমূহ ত্বৰান্বিত কৰি তোলাৰ লগতে ভগ্নীয়ে বিচাৰিলে আৰক্ষী বিভাগত চাকৰি প্ৰদান কৰিবলৈ চৰকাৰলৈ বিভাগীয়ভাৱে আবেদন জনাব বুলি প্ৰতিশ্ৰুতি দিয়ে ।
লগতে পঢ়ক: বিহাৰত সন্ধানহীন অসম আৰক্ষীৰ কনিষ্টবল; গংগাত মাৰিছিল ডুব - Assam Police Jawan Missing
