গুৱাহাটী: আন্দোলনৰ প্ৰসংগকলৈ এইবাৰ সৰৱ হ'ল প্ৰদেশ কংগ্ৰেছ । ৰাজনৈতিক দলে ৰাজপথৰ আন্দোলন কৰিব নালাগে বুলি মুখ্যমন্ত্রী হিমন্ত বিশ্ব শৰ্মাই কৰা মন্তব্যৰ এদিন পাছতে শনিবাৰে গুৱাহাটীত প্ৰতিবাদী কাৰ্যসূচী ৰূপায়ণ কৰে বিজেপি দলে । যাক লৈ প্ৰতিক্ৰিয়া ব্যক্ত কৰিছে প্ৰদেশ কংগ্ৰেছে ।
শনিবাৰে গুৱাহাটীৰ ৰাজীৱ ভৱনত এখন সংবাদমেল সম্বোধন কৰি এই সন্দৰ্ভত প্ৰতিক্ৰিয়া ব্যক্ত কৰে প্ৰদেশ কংগ্ৰেছৰ উপ-সভানেত্ৰী প্ৰণতি ফুকন আৰু প্ৰদেশ মহিলা কংগ্ৰেছৰ সভানেত্ৰী মীৰা বৰঠাকুৰ গোস্বামীয়ে ।
সংবাদমেলত প্ৰণতি ফুকনে কয়, "ৰাজনৈতিক দলে প্ৰতিবাদ কৰিব নালাগে বুলি মুখ্যমন্ত্রী হিমন্ত বিশ্ব শৰ্মাই কোৱাৰ এদিন পাছতে আজি বিজেপিৰ মহিলা মৰ্চাৰ নেত্রীসকলে লতাশিলৰ পৰা জজ খেলপথাৰলৈ প্ৰতিবাদ কৰিছে । প্ৰতিবাদ কৰাৰ কথাটো হৈছে যে ৰাহুল গান্ধীয়ে এগৰাকী সাংসদৰ গাত হাত দিছে । যদি সেইটোৱেই হয় তেন্তে নিশ্চয় ফুটেজ থাকিব আৰু সেইটো চালেই হয় । কিন্তু তাকে নকৰি মিছা কিছুমান অপব্যাখ্যা কৰি আমাৰ নেতাগৰাকীক দোষ দিবলৈ যোৱাটো অতি হাস্যকৰ আৰু ঘৃণনীয় কথা ।"
ফুকনে লগতে কয়, "তেওঁলোকে কয় যে কংগ্ৰেছত মহিলা সুৰক্ষিত নহয় । কংগ্ৰেছত মহিলা সুৰক্ষিত হয় নে নহয় সেইটো কথা বিজেপিয়ে আমাক শিকাব নালাগে । কাৰণ সৌ সিদিনা সকলোৱে দেখিছে যে জোনমণি ৰাভাক কেনেকৈ হত্যা কৰা হ'ল । তেওঁলোকৰ দলৰ এগৰাকী নেত্রী ইন্দ্ৰানী তহবিলদাৰে কেনেকৈ আত্মহত্যা কৰিবলগীয়া হ'ল । তেওঁ মৃত্যুৰ কাৰণো লিখি থৈ গৈছে ।’’
‘‘জোনমণি ৰাভাই ন্যায় নাপালে, মাকে আজিও কান্দে । আজি সেই দলৰ নেতৃসকলে কোনখন মুখেৰে কয় যে মহিলা সুৰক্ষিত নহয় । তেওঁলোকৰে এগৰাকী মহিলা নেত্রীয়ে কৈছিল যে বাজপেয়ী ভৱনত সন্ধিয়া ৭ বজাৰ পাছত মহিলা যাব নালাগে । সেয়া আমি কোৱা কথা নহয় ।" ফুকনে কয় ৷
তেওঁ লগতে কয়, "ৰাহুল গান্ধী এনেকুৱা এজন ব্যক্তি যিগৰাকী তেওঁৰ পিতৃক হত্যা কৰাজনক ৰেহাই দিয়াৰ বাবে উচ্চতম ন্যায়ালয়ত আবেদন জনোৱা পৰিয়ালৰ । তেনে এক পৰিয়ালৰ কোনো ব্যক্তিয়ে কাৰোবাক অপব্যৱহাৰ কৰিব পাৰে বুলি ভাৰতৰে নহয় বিশ্বৰ মানুহে কেতিয়াও বিশ্বাস নকৰে । ৰাহুল গান্ধী এনে এটা পৰিয়ালৰ যি মানৱতা বুজি পায় ।"
ইয়াৰোপৰি প্ৰণতি ফুকনে কয়, "বিজেপি দলটো কিছুমান বিশেষ ব্যৱসায়ীৰ হাতৰ পুতলা হৈ আছে । যাৰ বাবে তেওঁলোকে কংগ্ৰেছৰ বিৰুদ্ধে কিবা নহয় কিবা দোষ উলিয়াব বিচাৰে । জনতাৰ ক্ষোভ বুজিবলৈ তেওঁলোকৰ সময় নাই । তেওঁলোক কিছুমান বিশেষ ব্যক্তি তথা ব্যৱসায়ীক লৈ ব্যস্ত । যাৰ বাবে ভাৰতীয় জনতা পাৰ্টীক আমি ভাৰতীয় আদানীৰ পাৰ্টী বুলি ক'ব খোজো । তেওঁলোকে মহিলাৰ সুৰক্ষাৰ কথা কোৱাটো অতি লজ্জাজনক কথা ।"
মুখ্যমন্ত্ৰীক কঠোৰ সমালোচনা কৰি উপ-সভানেত্ৰীগৰাকীয়ে কয়, "মুখ্যমন্ত্রী হিমন্ত বিশ্ব শৰ্মা এনে এজন ব্যক্তি যিজনে কালি আমাক কৈছে যে কংগ্ৰেছে বন্দুক ফুটালৈ আশা কৰি আছে নেকি ? মুখেৰে কোৱা মানে কৰা । ডাঙৰ মানুহে যেতিয়া কথা কয় সেইটো তেওঁৰ অন্তৰত আছে । অন্তৰত আছে বাবেই মুখেৰে ওলাইছে । তেওঁ হয়টো কাইলৈ আমাৰ কংগ্ৰেছৰ মানুহবোৰৰ ঘৰলৈ গৈ মাৰপিট কৰিব পাৰে নাইবা কাৰোবাক গুলীয়াবও পাৰে ।’’
‘‘মৃদুল ইছলাম নিহত হোৱাৰ পিছত তেওঁলোকে চাই চাই মানুহৰ ঘৰে ঘৰে পুলিচ পঠিয়াইছে । সকলো ফালে তদন্ত লগাই দিছে । গণতান্ত্রিক দেশত সেইবোৰ হ'ব নালাগে ।" তেওঁ কয় ৷ আনহাতে এই সংবাদমেলতে মীৰা বৰঠাকুৰ গোস্বামীয়ে বিজেপিৰ মহিলা নেতৃত্বক কঠোৰ ভাষাৰে সমালোচনা কৰে ।
