গুৱাহাটী, ১০ জুলাই: কংগ্ৰেছ দলৰ পৰা আপলৈ আৰু আপৰ পৰা কংগ্ৰেছ দললৈ দলীয় নেতা সদস্যৰ যোগদান পৰ্ব যোৱা লোকসভা নিৰ্বাচনৰ ফলাফল ঘোষণাৰ পিচৰে পৰা অব্যাহত আছে । কিছুদিন পূৰ্বে টিকটৰ পৰা বঞ্চিত হৈ কংগ্ৰেছ দল ত্যাগ কৰা কংগ্ৰেছৰ প্ৰাক্তন জ্যেষ্ঠ নেতা ৰমেন বৰঠাকুৰে আপত যোগদান কৰিছে । তাৰ পিচতেই আজি অৰ্থাৎ বুধবাৰে আপৰ ২০ গৰাকীকৈ নেতা-সদস্যই কংগ্ৰেছ দলত যোগদান কৰে ।
গুৱাহাটী ৰাজীৱ ভৱনত অনুষ্ঠিত যোগদান কাৰ্যসূচীত অসম প্ৰদেশ কংগ্ৰেছৰ সভাপতি ভূপেন বৰাৰ উপস্থিতিত ডিব্ৰুগড়, কামৰূপ মহানগৰ আৰু কামৰূপ জিলাৰ ২০ গৰাকী সদস্যই কংগ্ৰেছ দলত যোগদান কৰে । সভাত ২০ গৰাকী সদস্যক ভূপেন বৰাই আদৰণি জনায় । আপৰ সদস্য ৰাজেন্দ্ৰ নাথ, অমৃত কুমাৰ বৰুৱা, বিমল হাজৰিকা, নীলকান্ত, কাৰ্তিক শইকীয়া, অজিত মুণ্ডা আদিয়ে যোগদান কৰে ।
লগতে পঢ়ক: আম আদমি পাৰ্টীত যোগদান জ্যেষ্ঠ কংগ্ৰেছ নেতা ৰমেন বৰঠাকুৰৰ - Romen Borthakur joins AAP
সভাত ভাষণ দি অসম প্ৰদেশ কংগ্ৰেছৰ সভাপতি ভূপেন বৰাই কয়, "যোৱা সময়ছোৱাত আমাৰ দলত যোগদান বৃদ্ধি পাইছে । বিভিন্ন ৰাজনৈতিক দলৰ নেতাই আমাৰ দল যোগদান কৰি আহিছে । দলৰ শক্তি বৃদ্ধিত সহায় কৰিছে । সকলো ৰাজনৈতিক দলৰ দেশৰ হকে কাম কৰিব বিচৰা কৰ্মীৰ বাবে কংগ্ৰেছৰ দুবাৰ খোলা আছে ।"
তেওঁ আৰু কয়, দলে পুৰণা কংগ্ৰেছীক আদৰিবলৈ সাজু আছে । কিন্তু যিসকল কংগ্ৰেছী বি জে পিলৈ গৈছে সেইসকলক বাদ দি সকলোৰে বাবে কংগ্ৰেছৰ দুৱাৰ খোলা আছে । তেওঁ জনাই যে কেবাগৰাকীও বি জে পি নেতাই কংগ্ৰেছত যোগদান কৰাৰ বাবে সাজু হৈ আছে । এই সন্দৰ্ভত অহা ১৫-১৬ জুলাইত অনুষ্ঠিত হ’বলগীয়া দলৰ ৰাজনৈতিক পৰিক্ৰমা সমিতিৰ (Political Affairs Committee) সভাত এই সিদ্ধান্ত লোৱা হ'ব ।
লগতে পঢ়ক: উপ-নিৰ্বাচন-পঞ্চায়ত নিৰ্বাচনত বিৰোধী ঐক্যমঞ্চৰ লগত নাথাকে আপ ! - AAP Assam
