নলবাৰী, 7 ছেপ্টেম্বৰ : এইবাৰ নলবাৰীত আৰক্ষীৰ জালত পৰিছে এটা অনলাইন ট্ৰেডিঙৰ প্ৰৱঞ্চক । নলবাৰীৰ মুকালমুৱাত অনলাইন ট্ৰডিঙৰ পোহাৰ মেলি আটক হয় প্ৰৱঞ্চকটি । UNIQUE FUND নামৰ ভুৱা কোম্পানী এটা খুলি কেইবা লক্ষ টকা লুটিছিল ৰচিদুল আলী নামৰ প্ৰৱঞ্চকটোৱে । ভুক্তভোগীৰ এজাহাৰৰ ভিত্তিত জিলাখনৰ মুকালমুৱাৰ ঘৰুৱাবাহাৰ পৰা মুকালমুৱা আৰক্ষীয়ে আটক কৰে প্ৰৱঞ্চকটোক ।
ভুক্তভোগী এজন যুৱকৰ অভিযোগ মতে, "ৰচিদুল আলীয়ে ইউনিক ফাণ্ড নামৰ এটা কোম্পানীত বিনিয়োগ কৰিব বুলি কৈ মোৰ পৰা ধন সংগ্ৰহ কৰিছিল । ৰচিদুলে কৈছিল কোম্পানীটো ডুবাইৰ । তাত ধন বিনিয়োগ কৰিলে বহুত লাভ হ'ব বুলি আমাক কৈছিল । সেই আশাতে আমি বহুকেইজনে কোম্পানীটোত বিনিয়োগ কৰিছিলো ।"
ধন প্ৰদান সন্দৰ্ভত বিনিয়োগকাৰীজনে কয়, "ৰচিদুল আলীক অনলাইনৰ জৰিয়তে ধন দিছিলো । প্ৰায় দুই লাখ টকা বিনিয়োগ কৰিছিলো । প্ৰথমে আমাক কিছু পৰিমাণে লাভ ওভতাই দিছিল । কিন্তু যোৱা জুন মাহৰ পৰা ৰচিদুলে আমাক কোনো ধৰণৰ লাভ বা কোনো ধৰণৰ মূলধন ওভতাই দিয়া নাই ।"
তেওঁ লগতে কয়, "ইয়াৰ পিচত আমাৰ ৰচিদুলৰ ওপৰত সন্দেহ উপজিল । তাৰ পিচত আমি নিজাববীয়াকৈ অনুসন্ধান কৰাত গম পালো যে ইউনিক ফাণ্ড নামৰ কোনো ধৰণৰ কোম্পানী ডুবাইত নাই । আমাক তিনিমাহ ধৰি ৰচিদুলক দিয়া ধন ওভতাই দিয়া নাই । আমি বিচাৰি আছিলো যদিও দিয়া নাছিল । সেয়ে উপায়ন্তৰ আমি মুকালমুৱা আৰক্ষী থানাত এজাহাৰ দাখিল কৰো ।"
উল্লেখ্য যে, বিনিয়োগকাৰীয়ে অভিযোগ কৰা অনুসৰি, ইউনিক ফাণ্ডত বিনিয়োগ কৰাৰ নামত ৰচিদুলক ২ লাখ টকা পৰ্যন্ত দিছে । ইফালে আৰক্ষীয়ে প্ৰৱঞ্চক ৰচিদুল আলীক আটক কৰি ইতিমধ্যে তদন্ত আৰম্ভ কৰিছে । এতিয়া আৰক্ষীৰ তদন্ততহে পোহৰলৈ আহিব আচলতে ৰচিদুলে কিমান টকা লুটিছিল বা এই প্ৰৱঞ্চনাত আৰু কোন কোন জড়িত আছে ।
