লখিমপুৰ, 1 জুলাই: দুৰ্যোগৰ উপৰি দুৰ্যোগৰ সন্মুখীন লখিমপুৰ, ধেমাজিবাসী । নীপকোৰ সমানে এইবাৰ এনএইচপিচিয়েও এৰিলে সোৱণশিৰি প্ৰকল্পৰ পানী । উল্লেখযোগ্য যে, নীপকোৱে য়াজালীত থকা ৰঙানদী প্ৰকল্পৰ জলাধাৰত পানীৰ চাপ বৃদ্ধি হোৱাত যোৱা শনিবাৰৰ পুৱাৰে পৰা ৰঙানদী প্ৰকল্পৰ অতিৰিক্ত জলৰাশি এৰিবলৈ আৰম্ভ কৰে ৷
শনিবাৰৰ পৰা নীপকোৱে একেৰাহে প্ৰকল্পৰ পানী এৰিয়েই আছে । জানিব পৰা মতে, ক্ৰমে এনেদৰে এৰি দিয়া পানীৰ পৰিমাণ বৃদ্ধি কৰি আছে নীপকোৱে। সোমবাৰৰ পুৱাই নীপকোৱে 22 শ মিলিমিটাৰ পৰ্যন্ত গেট খুলি দিয়ে । যাৰ বাবে প্ৰকল্পৰ অতিৰিক্ত জলৰাশি যোগ হৈ ৰঙানদীয়ে লখিমপুৰত বলিয়া ৰূপ ধাৰণ কৰিছে ৷ ৰঙানদীৰ ৰূপ দেখি শংকিত হৈ পৰিছে নৈপৰীয়া ৰাইজ ।
শনিবাৰে নীপকোৱে লখিমপুৰ জিলা প্ৰশাসনলৈ এটা সতৰ্কবাৰ্তা প্ৰেৰণ কৰাৰ পাচতে প্ৰকল্পৰ পানী এৰি দিয়ে আৰু একেৰাহে তিনিদিন ধৰি গেট খুলি ৰাখিছে । সমান্তৰালভাৱে এৰি দিয়া পানীৰ পৰিমাণ বৃদ্ধি কৰি গৈ আছে ৷ ইতিমধ্যে লখিমপুৰ নগৰৰ সমীপৰ ৰঙানদী পৰীয়া অঞ্চলৰ পাচনৈত বানৰ তাণ্ডৱ আৰম্ভ হৈছে । ঘৰ-বাৰী, ৰাস্তা-পদূলি বানত ডুব গৈছে ।
লগতে পঢ়ক: NHPC বান্ধ সম্পূৰ্ণৰূপে ভাঙি দিয়াৰ দাবী জাতীয়তাবাদী যুৱ পৰিষদৰ - AJYCP on NHPC dam
এনে দুৰ্যোগপূৰ্ণ অৱস্থা অব্যাহত থকাৰ সময়তে সোমবাৰে নামনি সোৱণশিৰি প্ৰকল্পৰ পৰাও পানী এৰি দিয়া হৈছে । এনএইচপিচিয়ে প্ৰকল্পৰ নিয়ন্ত্রণ কক্ষৰ পৰা এটা বাৰ্তা প্ৰেৰণ কৰি প্ৰকল্পৰ উজনি অংশত পানীৰ চাপ বৃদ্ধি হোৱাত 16 হেজাৰ কিউমিক পানী সোৱণশিৰি নদীত এৰি দিয়া হ’ব বুলি উল্লেখ কৰে ৷
