তেজপুৰ, ২১ ছেপ্টেম্বৰ : ‘‘১৮ গৰাকী মহিলাৰ প্ৰাণ মই ৰক্ষা কৰিবই লাগিব বুলি ভাবি লৈছিলো ৷ সফল হ’লো মই ৷’’- সম্ভাব্য মৃত্যুৰ মুখৰ পৰা ১৮ গৰাকী মহিলাক বচাই অনা এগৰাকী মহিলাৰ মন্তব্য এয়া ৷ বিপদৰ সময়ত অতি প্ৰয়োজনীয় ধৈৰ্য আৰু সাহসক বাস্তৱক্ষেত্ৰত প্ৰয়োগ কৰি বহুতকে নৱ-জীৱন দিয়া মিনু বড়ো এতিয়া চৰ্চাৰ কেন্দ্ৰ ৷
পাহাৰীয়া একা-বেঁকা পথত ধীৰগতিৰে আগবাঢ়িছিল তীৰ্থযাত্ৰীৰ দলটো ৷ দলটোত আছিল শোণিতপুৰ জিলাৰ 18 গৰাকী মহিলা ৷ লক্ষ্য আছিল কেদাৰনাথ আৰু বদ্ৰীনাথ দৰ্শন ৷ সেই অনুসৰিয়ে দিল্লী বিমান বন্দৰৰ পৰা তীৰ্থযাত্ৰীসকলে ভাৰালৈ ল’লে এখন ট্ৰেভেলাৰ ৷ দুয়োখন ধাম সুকলমে দৰ্শন কৰি তীৰ্থযাত্ৰীসকল উভতি অহাৰ পথত যেন ৰৈ আছিল বিপদ ৷ দলটো উভতি অহাৰ সময়ত মুখামুখী হ’ল তীব্ৰ ভূমিস্খলন, কিনকিনিয়া বৰষুণৰ ; তাতে পাহাৰীয়া একা-বেঁকা পিচল বাট ৷ তললৈ চালেই জীউ উৰি যোৱা এটা পৰিৱেশ ৷ তথাপি আগবাঢ়িল তীৰ্থযাত্ৰীৰ দলটোক লৈ যোৱা ট্ৰেভেলাৰ বাহনখন ৷ সেই দিনটো আছিল ১২ ছেপ্টেম্বৰ, ২০২৪ ৷
দলটো উত্তৰাখণ্ডৰ শ্যামলী জিলাৰ কৰ্ণপ্ৰয়াগ পোৱাৰ সময়তে হঠাৎ অসুস্থ হৈ পৰিল বাহনখনৰ চালকগৰাকী ৷ ইফালে আগে-পিছে কেৱল গাড়ী আৰু গাড়ী ৷ তাতে ঠেক-পিচল পাহাৰীয়া পথ ৷ কেইমুহূৰ্তমানৰ ভিতৰতে চালকগৰাকীৰ কঁপিবলৈ ধৰিলে, কোঁচ খাই আহিল হাত-ভৰি, মুখেৰে ওলাবলৈ ল’লে ফেন ৷ হয়তো সম্ভাব্য বিপদৰ আগজাননী পাই পাকৈত চালকগৰাকীয়ে নিউট্ৰেল কৰিলে গাড়ীৰ গীয়েৰ ৷ দুৰ্গম পথত সংঘটিত এই ঘটনাত সৰগ ভাগি পৰিল যাত্ৰীসকলৰ মূৰত ৷ তাতোকৈ চিন্তনীয় কথাটো হ’ল যে কেউগৰাকী যাত্ৰীয়েই আছিল মহিলা, পুৰুষৰ নামত কেৱল অসুস্থ চালকগৰাকীহে আছিল ৷
সেই সময়তে প্ৰচূৰ সাহস আৰু ধৈৰ্যৰে আগবাঢ়ি আহিল মহিলা তীৰ্থযাত্ৰীসকলৰ দায়িত্ব লৈ থকা তেজপুৰ কলিবাৰীৰ মিনু বড়ো ৷ পূৰ্বে মসৃণ পথত সৰু গাড়ী চলোৱাৰ অভ্যাস থকা মিনু বড়োৰ সেই মুহূৰ্তত এটাই মাথো লক্ষ্য- যিকোনো প্ৰকাৰে যাত্ৰীসকলৰ প্ৰাণ বচাব লাগিব ৷ লগে লগে সাহসী মহিলাগৰাকীয়ে আগবাঢ়ি গৈ দেখে যে চালকগৰাকী ভৰি ব্ৰেকত নাই ৷ তাৎক্ষণিক কাম হিচাবে মিনু বড়োৱে লগালে গাড়ীখনৰ হেণ্ডব্ৰেক ৷ তাৰ পিছতে গাড়ীখনৰ ইঞ্জিন বন্ধ কৰে ৷
ইয়াৰ পিছতে আগৰ-পিচৰ চালকসকলৰ সহায় বিচাৰিলে দুঃসাহসিক মিনু বড়োৱে ৷ ইয়াৰ পিছতে অসুস্থ চালকগৰাকীক কাষৰ এখন আসনত বহুৱাই চীট বেল্ট মাৰি দিয়া হ’ল ৷ তাৰ পিছতে মিনু বড়ো আগবাঢ়িল সুৰক্ষিত স্থানলৈ গাড়ীখন লৈ যোৱাৰ বাবে ৷ পূৰ্বে তেনে গাড়ী চলোৱাৰ অভ্যাস নাছিল যদিও দুৰ্গম পথেৰে বহু সাহস বুকুত লৈ যাত্ৰীসকলক লৈ প্ৰায় ৩০ কিঃমিঃ গৈ চালকজনক ভৰ্তি কৰোৱাই এখন চিকিৎসালয়ত ৷ কিন্তু দুৰ্ভাগ্যবশতঃ চালকজনৰ ইতিমধ্যে মৃত্যু হয় ৷
এই অভিজ্ঞতা সন্দৰ্ভত মিনু বড়োৱে ই টিভি ভাৰতৰ জ্যেষ্ঠ সাংবাদিক প্ৰণৱ কুমাৰ দাসক কয়, ‘‘মই সাহস নকৰাহেঁতেন এটা ভয়ংকৰ পৰিস্থিতিত পৰিলোহেঁতেন ৷ কাষত চাব নোৱৰা খাৱৈ আছিল, নদী আছিল ৷ অলকানন্দা, কাবেৰী আদি নদীবিলাক খলখলাই বৈ আছিল ৷ মোৰ এটাই উদ্দেশ্য আছিল যে- মই ১৮গৰাকী মহিলাক লীড লৈ আহিছো, তেওঁলোকক বচাব লাগে ৷’’
স্বাভাৱিকতেই ১৮ গৰাকী মহিলাক সম্ভাব্য মৃত্যুৰ মুখৰ পৰা উভতাই অনা মিনু বড়ো এতিয়া চৰ্চাৰ কেন্দ্ৰ হৈ পৰিছে ৷ হৈ পৰিছে সাহস আৰু ধৈৰ্যৰ প্ৰতীক ৷
লগতে পঢ়ক : নাৰী হ’ল বুলিয়েই কিয় নোৱাৰিব ! ডাম্পাৰৰ চালক বিনীতা বড়ো বচনেট এতিয়া এগৰাকী চৰ্চিত মহিলা
