স্প’ৰ্টছ ডেস্ক, 15 জুলাই : 2025 চনত পাকিস্তানত অনুষ্ঠিত হ’বলগীয়া চেম্পিয়নছ ট্ৰফীত ভাৰতৰ অংশগ্ৰহণক লৈ ব্যাপক চৰ্চা চলি আছে ৷ খেলুৱৈৰ নিৰাপত্তাৰ দোহাই দি বিচিচিআয়ে মেন ইন ব্লুৱে পাকিস্তানত চেম্পিয়নছ ট্ৰফী নেখেলে বুলি ঘোষণা কৰিছিল ৷ লগতে ক্ৰিকেট সংস্থাটোৱে আই চি চিক ভাৰতৰ খেলকেইখন শ্ৰীলংকা অথবা ডুবাইত অনুষ্ঠিত কৰিবৰ বাবে অনুৰোধ জনাব বুলিও কৈছিল ৷ কিন্তু এতিয়া আকোৰগোজ স্থিতি গ্ৰহণ কৰিছে পাকিস্তানেও ৷
হাইব্ৰিড মডেল অনুসৰণ কৰি পূৰ্বতে ভাৰতৰ মেচ শ্ৰীলংকাত অনুষ্ঠিত কৰা হৈছিল যদিও এইবাৰ হাইব্ৰিড মডেলৰ যিকোনো বিবেচনাক নাকচ কৰি সম্পূৰ্ণৰূপে নিজৰ ভূখণ্ডৰ ভিতৰতে চেম্পিয়নছ ট্ৰফী 2025 আয়োজনৰ ক্ষেত্ৰত দৃঢ় স্থিতি গ্ৰহণ কৰিছে পাকিস্তান ক্ৰিকেট ব’ৰ্ডে ।
তাৰোপৰি পিচিবিয়ে ভাৰত আৰু শ্ৰীলংকাৰ সহযোগত অনুষ্ঠিত হ’বলগীয়া 2026 চনৰ টি-20 বিশ্বকাপৰ পৰা আঁতৰি যোৱাৰ ভাবুকি দিয়াৰ খবৰ আহিছে ৷ যদিহে ভাৰতীয় দলটোৱে চেম্পিয়নছ ট্ৰফীৰ বাবে পাকিস্তানলৈ যাবলৈ অস্বীকাৰ কৰে, তেন্তে 2026 চনৰ টি-20 বিশ্বকাপ খেলাৰো সম্ভাৱনা নাই পাকিস্তানে ৷
লগতে পঢ়ক: চেম্পিয়নছ ট্ৰফীৰ বাবে পাকিস্তানলৈ নাযায় টীম ইণ্ডিয়া ! - ICC Champions Trophy
জিঅ’ নিউজৰ এক প্ৰতিবেদন অনুসৰি, পিচিবিয়ে সমগ্ৰ প্ৰতিযোগিতাখন পাকিস্তানত আয়োজন কৰাত অটল আছে আৰু 19-22 জুলাইলৈ কলম্বোত অনুষ্ঠিত হ’বলগীয়া আইচিচিৰ বাৰ্ষিক সন্মিলনৰ সময়ত যিকোনো হাইব্ৰিড মডেল প্ৰস্তাৱৰ বিৰোধিতা কৰিব বুলি জানিব পৰা গৈছে ৷
অহা বছৰৰ ফেব্ৰুৱাৰীৰ পৰা মাৰ্চ মাহৰ ভিতৰত অনুষ্ঠিত হ’বলগীয়া এই সন্মানীয় প্ৰতিযোগিতাখনৰ বাবে ভাৰতীয় ক্ৰিকেট নিয়ন্ত্ৰণ ব’ৰ্ডে টীম ইণ্ডিয়াক পাকিস্তানলৈ পঠিয়াবলৈ অনিচ্ছা প্ৰকাশ কৰা বাতৰিৰ প্ৰতি সঁহাৰি জনাই পিচিবিয়ে এই অটল স্থিতি গ্ৰহণ কৰিছে । ৰাজনৈতিক সম্পৰ্ক আৰু নিৰাপত্তাৰ চিন্তা-চৰ্চাৰ জটিলতাৰ পৰিপ্ৰেক্ষিতত ২০০৮ চনৰ এছিয়া কাপৰ পিচৰ পৰা ভাৰতে পাকিস্তান ভ্ৰমণ কৰা নাই ।
বিচিচিআইয়ে আইচিচিক চেম্পিয়নছ ট্ৰফীৰ বাবে হাইব্ৰিড মডেল ৰূপায়ণ কৰিবলৈ অনুৰোধ কৰাৰ ইংগিত দিছে, যাৰ ফলত ভাৰতে নিৰপেক্ষ দেশত নিজৰ মেচ খেলিব পাৰিব ।
2008 চনৰ মুম্বাই সন্ত্ৰাসবাদী আক্ৰমণৰ পিচৰে পৰা ভাৰত আৰু পাকিস্তানৰ মাজৰ ক্ৰিকেটৰ সম্পৰ্ক ৰাজনৈতিক আৰু নিৰাপত্তাজনিত সমস্যাৰে ভৰি পৰিছিল ৷ তাৰ পিচত দ্বিপাক্ষিক শৃংখলা স্থগিত ৰখা হৈছিল । ভাৰতে শেষবাৰৰ বাবে পাকিস্তান ভ্ৰমণ কৰিছিল 2008 চনত এছিয়া কাপৰ বাবে । ইয়াৰ পিচত দেশসমূহে কেৱল নিৰপেক্ষ স্থানত অনুষ্ঠিত হোৱা আইচিচি ইভেণ্ট বা এছিয়া কাপ প্ৰতিযোগিতাতহে মুখামুখি হৈছে ।
এছিয়া কাপ 2023 ৰ সময়তো একেধৰণৰ অচলাৱস্থাৰ সৃষ্টি হৈছিল, য’ত বিচিচিআইয়ে পাকিস্তানলৈ যাবলৈ অস্বীকাৰ কৰাৰ ফলত হাইব্ৰিড মডেল গ্ৰহণ কৰা হৈছিল । ইয়াৰ ফলত প্ৰতিযোগিতাখন আগবাঢ়িলেও ইয়াৰ ফলত পাকিস্তানে ছেমি ফাইনেল আৰু ফাইনেল মেচৰ আয়োজনৰ অধিকাৰ হেৰুৱাই পেলায় । এই ফলাফলে পিচিবিক আৰু অধিক দৃঢ়প্ৰতিজ্ঞ কৰি তুলিছে যে চেম্পিয়নছ ট্ৰফী 2025 সম্পূৰ্ণৰূপে পাকিস্তানৰ মাটিত অনুষ্ঠিত হ’ব ।
আন্তঃৰাষ্ট্ৰীয় প্ৰতিযোগিতাৰ অখণ্ডতা বজাই ৰখাৰ লগতে দুয়োখন ক্ৰিকেট শক্তিশালী দেশৰ স্বাৰ্থৰ মাজত ভাৰসাম্য ৰক্ষা কৰাৰ দায়িত্ব ল’বলগীয়া হোৱাত আইচিচি নিজেই প্ৰত্যাহ্বানৰ সন্মুখীন হ’ব লগা হৈছে । কলম্বোত অনুষ্ঠিত হ’বলগীয়া আইচিচিৰ বাৰ্ষিক সন্মিলনখন এক জটিল সন্ধিক্ষণ হ’ব বুলি আশা কৰা হৈছে, য’ত পিচিবিয়ে চেম্পিয়নছ ট্ৰফী 2025 ৰ বাবে যিকোনো হাইব্ৰিড মডেলৰ তীব্ৰ বিৰোধিতা কৰিব ।
