স্পৰ্টছ ডেস্ক,৫ আগষ্ট : ভাৰতৰ বাবে পেৰিছৰ পৰা এটাৰ পিচত আন এটা নিৰাশাজনক খবৰ আহিছে । ভাৰতৰ কেইবাগৰাকী পদকৰ দাবীদাৰ খেলুৱৈয়ে ইতিমধ্যে পেৰিছ অলিম্পিকৰ অভিযান সামৰিছে । ইয়াৰ মাজতে ভাৰতীয় হকী দলৰ বাবে আন এক হতাশাজনক খবৰ । ছেমি ফাইনেলৰ পূৰ্বে ভাৰতীয় দলৰ গুৰুত্বপূৰ্ণ খেলুৱৈক নিষিদ্ধ কৰা হৈছে ।
হকী খেলুৱৈক নিষিদ্ধ :
পেৰিছ অলিম্পিক ২০২৪ত ভাৰতীয় হকী দলে এতিয়ালৈকে সুন্দৰ প্ৰদৰ্শন কৰিছে । দেওবাৰে গ্ৰেট ব্ৰিটেইনৰ বিৰুদ্ধে কোৱাৰ্টাৰ ফাইনেল খেলখনত ভাৰতে শক্তিশালী প্ৰদৰ্শন কৰে আৰু শ্বুটআউট মেচখনত ভাৰত জয়ী হয় । এতিয়া ভাৰতে জাৰ্মানীৰ বিৰুদ্ধে ছেমি ফাইনেল খেলিব । কিন্তু ছেমি ফাইনেলৰ পূৰ্বে ভাৰতীয় হকী দলৰ বাবে ডাঙৰ খবৰ ।
Paris Olympics: India's Amit Rohidas set to miss semi-final clash against Germany
— ANI Digital (@ani_digital) August 5, 2024
Read @ANI Story | https://t.co/Pox5N7El8X#ParisOlympics #AmitRohidas #India #Hockey #Germany pic.twitter.com/PpNP2b5YCa
ভাৰতীয় হকী দলৰ খেলুৱৈ অমিত ৰোহিদাসক পেৰিছ অলিম্পিকত এখন খেলৰ বাবে নিষিদ্ধ কৰা হৈছে । মঙলবাৰে জাৰ্মানীৰ বিৰুদ্ধে ছেমি ফাইনেল খেলখনত তেওঁ খেলিব নোৱাৰিব । দেওবাৰে গ্ৰেট ব্ৰিটেইনৰ বিৰুদ্ধে ভাৰতীয় হকী দলৰ কোৱাৰ্টাৰ ফাইনেল খেলখনৰ সময়ত অমিত ৰোহিদাসে ৰেড কাৰ্ড লাভ কৰিছিল । যাৰ বাবে তেওঁ পৰৱৰ্তী খেলৰ বাবে বঞ্চিত হৈছে ।
৪ আগষ্টত ভাৰত বনাম গ্ৰেট ব্ৰিটেইন খেলৰ সময়ত আচৰণ বিধি উলংঘা কৰাৰ বাবে আন্তঃৰাষ্ট্ৰীয় হকী ফেডাৰেশ্যনে (এফআইএইচ) এখন খেলৰ বাবে অমিত ৰোহিদাসক নিলম্বন কৰিছে । এই নিলম্বনৰ পিচত জাৰ্মানীৰ বিৰুদ্ধে ভাৰতৰ ছেমি ফাইনেল মেচত তেওঁ অংশগ্ৰহণ কৰিব নোৱাৰিব । ভাৰতে এতিয়া ১৫ গৰাকী খেলুৱৈৰ সৈতে জাৰ্মানীৰ বিৰুদ্ধে খেলিব ।
অমিত ৰোহিদাসক ৰেড কাৰ্ড :
গ্ৰেট ব্ৰিটেইনৰ বিৰুদ্ধে কোৱাৰ্টাৰ ফাইনেল খেলৰ দ্বিতীয় কোৱাৰ্টাৰত অমিত ৰোহিদাসে উইল কালনানৰ বিৰুদ্ধে মিড ফিল্ডত তীব্ৰ যুঁজত অৱতীৰ্ণ হৈছিল । গ্ৰেট ব্ৰিটেইনৰ ফৰৱাৰ্ডৰ পৰা আঁতৰি থাকিবলৈ প্ৰচেষ্টা চলোৱাৰ সময়তে ৰোহিদাসৰ হকী ষ্টিকে কালনানৰ মুখত আঘাত কৰে । যাৰ বাবে ৰেফাৰীয়ে অমিত ৰোহিদাসক ৰেড কাৰ্ড প্ৰদৰ্শন কৰে । প্ৰথমে ৰেফাৰীয়ে ইয়াক গুৰুতৰ অপৰাধ বুলি বিবেচনা কৰা নাছিল যদিও ভিডিঅ' ৰেফাৰেলৰ পিচত তেওঁক ৰেড কাৰ্ড প্ৰদৰ্শন কৰা হয় ।
উল্লেখ্য যে, ভাৰতৰ হকী দলটোৱে টকিঅ' অলিম্পিকতো ছেমি ফাইনেলত প্ৰৱেশ কৰিছিল । অৱশ্যে দলটোৱে ব্ৰঞ্জৰ পদকতে সন্তুষ্ট থাকিব লগা হৈছিল । এইবাৰ হকী দলৰ ওপৰত দেশবাসীৰ দৃষ্টি নিবদ্ধ আছে ।
