স্প’ৰ্টছ ডেস্ক, 25 ছেপ্টেম্বৰ: দ্বিতীয়খন টেষ্টত অংশগ্ৰহণৰ উদ্দেশ্যে কানপুৰত উপস্থিত হৈছে টীম ইণ্ডিয়া ৷ দলটো চহৰখনত উপস্থিত হোৱাৰ পিছতে জনোৱা হৈছিল উষ্ম আদৰণি ৷ হোটেল কৰ্তৃপক্ষৰ ফালৰ পৰাও দলটোক আদৰিবলৈ কৰা হৈছিল ব্যাপক আয়োজন ৷ দলটো হোটেলত উপস্থিত হোৱাৰ পিছত তাৰকা ক্ৰিকেটাৰ বিৰাট কোহলীৰ এক বিশেষ ভিডিঅ’ ভাইৰেল হৈ পৰে সামাজিক মাধ্যমত ৷
প্ৰকৃততে বিৰাট কোহলী হোটেলত উপস্থিত হোৱাৰ লগে লগে গ্ৰীণপাৰ্ক ক্ৰিকেট এছ’চিয়েশ্যনৰ বিষয়াসকলেও দলটোৰ সৈতে তাৰকা খেলুৱৈগৰাকীক আদৰণি জনায় । সেই সময়ত তাত উপস্থিত আছিল হোটেলখনৰ শীৰ্ষ বিষয়াসকলো ৷
হোটেল কৰ্তৃপক্ষই কোহলীক এটা ফুলৰ থোপাৰে সম্ভাষণ জনায় ৷ তাৰপিছতে আন এগৰাকী বিষয়াই কোহলীৰ সৈতে হাত মিলাই অভিবাদন জনাব বিচাৰে ৷ পিছে এখন হাতত নিজৰ বেগ আৰু এখন হাতত ফুলৰ থোপা লৈ থকা কোহলীয়ে হাত মিলাবলৈ অস্বীকাৰ কৰে ৷ কোহলীয়ে বিষয়াগৰাকীক এনেদৰে কয় "মহাশয় মোৰ মাথো দুখনহে হাত" ৷ তাৰপিছতে অভিবাদন নজনোৱাকৈ হোটেলৰ কোঠালৈ গমন কৰে ক্ৰিকেটাৰগৰাকীয়ে ৷
Virat Kohli's welcome at the team's hotel in Kanpur. 🇮🇳pic.twitter.com/Fqt7QkNfkX
— Mufaddal Vohra (@mufaddal_vohra) September 24, 2024
এই মুহূৰ্তটোৰ ভিডিঅ’ পৰৱৰ্তী সময়ত ভাইৰেল হৈ পৰে সামাজিক মাধ্যমত ৷ ভিডিঅ’টোৱে সামাজিক মাধ্যম ব্যৱহাৰকাৰীৰ মাজত লাভ কৰে ব্যাপক চৰ্চা ৷
ভাৰত আৰু বাংলাদেশৰ মাজৰ দ্বিতীয়খন টেষ্ট মেচ 27 ছেপ্টেম্বৰৰ পৰা কানপুৰত অনুষ্ঠিত হ’ব । এই মেচখনত কানপুৰ ষ্টেডিয়ামৰ কৰ্মচাৰীসকলে 2000 স্কুলীয়া ছাত্ৰ-ছাত্ৰীক বিনামূলীয়া মেচ উপভোগ কৰাৰ সুবিধা প্ৰদানৰ লগতে খাদ্য আৰু খোৱাপানী যোগান ধৰিব । এই ষ্টেডিয়ামখনত প্ৰায় 20,000 দৰ্শকৰ বাবে আসনৰ সুবিধা মজুত আছে ৷ ইতিমধ্যে বিক্ৰীৰ বাবে মুকলি কৰা হৈছে টিকট ৷
চেন্নাইৰ এম এ চিদাম্বৰম ষ্টেডিয়ামত অনুষ্ঠিত প্ৰথমখন টেষ্টত ভাৰতে বাংলাদেশক 280 ৰাণত পৰাস্ত কৰিছিল । ৰবিচন্দ্ৰন অশ্বিনৰ উপৰিও শুভমন গিল আৰু ঋষভ পন্তে উক্ত মেচত অৰ্জন কৰিছিল শতক । তদুপৰি আৰ অশ্বিনে দ্বিতীয় ইনিংছত 6 টাকৈ উইকেট দখল কৰে, যাৰ বাবে খেলুৱৈগৰাকীক প্লেয়াৰ অৱ দ্য মেচৰ বঁটা আগবঢ়োৱা হয় ৷
