স্প’ৰ্টছ ডেস্ক, 28 আগষ্ট: ফুটবলৰ খেলপথাৰৰ সলনি ইউ টিউবৰ একছত্ৰী সম্ৰাটত পৰিণত হৈছে ক্ৰিষ্টিয়ানো ৰ’নাল্ডো ৷ এইগৰাকী ফুটবলাৰে অভিলেখৰ পিছত দৌৰিবলগীয়া নহয়, বৰং অভিলেখেহে তেওঁক খেদি ফুৰে ৷ কিংবদন্তী ফুটবলাৰগৰাকীৰ ক্ষেত্ৰতো এই কথা শুদ্ধ প্ৰমাণিত হৈছিল । যোৱা সপ্তাহত চেনেলটো মুকলি কৰা ৰ’নাল্ডোৱে এটাৰ পিছত এটাকৈ বহুতো অভিলেখ ভংগ কৰি যথেষ্ট সফলতা অৰ্জন কৰা দেখা গৈছে ।
ৰ’নাল্ডোৱে নিজৰ ইউ টিউব চেনেল মুকলি কৰাৰ প্ৰায় এসপ্তাহ পূৰ্ণ হৈছে ৷ এই এসপ্তাহত চেনেলটোৱে অতিক্ৰম কৰিছে 50 নিযুত গ্ৰাহকৰ সীমা ৷ যাৰ ফলত ফুটবলাৰগৰাকীৰ চেনেলটো দ্ৰুততম গ্ৰাহক অৰ্জনকাৰী চেনেলত পৰিণত হৈছে । ইয়াৰ পূৰ্বে কোনেও এই অভিলেখ গঢ়িবলৈ সক্ষম হোৱা নাছিল ৷ যোৱাটো সপ্তাহত ৰ’নাল্ডোৰ চেনেলটো 282,480,111 বাৰতকৈও অধিক উপভোগ কৰিছে গ্ৰাহকে ৷ যাৰ ফলত এই সংখ্যা দ্ৰুতগতিত বৃদ্ধি হৈছে ৷
ইয়াৰ পূৰ্বে ৰ’নাল্ডোৰ চেনেলটোৱে মাত্ৰ ডেৰ ঘণ্টাত লাভ কৰিছিল এক নিযুত গ্ৰাহক ৷ চেনেলটো মুকলি হোৱাৰ পিছৰে পৰা সামাজিক মাধ্যমত যথেষ্ট চৰ্চা চলিছিল এই চেনেলটোৰ বিষয়ত ৷ সম্প্ৰতি 50 নিযুত গ্ৰাহক লাভ কৰাৰ পিছত এই চৰ্চা অধিক বৃদ্ধি পাইছে ।
ৰ’নাল্ডো হৈছে বিশ্বৰ সৰ্বাধিক উপাৰ্জন কৰা এথলীট । ক্ৰিষ্টিয়ানো ৰ’নাল্ডোৱে এতিয়ালৈকে শ্বেয়াৰ কৰা সকলো ভিডিঅ’ লক্ষাধিক গ্ৰাহকে উপভোগ কৰিছে ৷ সংবাদ মাধ্যমৰ এক প্ৰতিবেদন অনুসৰি, তেওঁৰ চেনেলে বিজ্ঞাপনৰ ধনৰ পৰা 1.2-6 নিযুত ডলাৰ উপাৰ্জন কৰিছে ।
সামাজিক মাধ্যমত আছে ৰ’নাল্ডোৰ প্ৰায় ১ বিলিয়ন অনুসৰণকাৰী
বৰ্তমান সময়ত ক্ৰিষ্টিয়ানো ৰ’নাল্ডোৰ সামাজিক মাধ্যমত 964 নিযুতৰো অধিক ফ’ল’ৱাৰ্ছ আছে ৷ ফুটবলাৰগৰাকীৰ এক্সত আছে 112.6 নিযুত ফ’ল’ৱাৰ্ছ, ফেচবুকত আছে 170 নিযুত আৰু ইনষ্টাগ্ৰামত আছে 637 নিযুত ফ’ল’ৱাৰ্ছ । যি সংখ্যা যিকোনো খেলুৱৈৰ ক্ষেত্ৰতে অবিশ্বাস্য ৷
ৰ’নাল্ডোৱে 21 আগষ্টত নিজৰ ইউ টিউব চেনেলটো মুকলি কৰে ৷ আজি 28 আগষ্টলৈকে চেনেলৰ জৰিয়তে ফুটবলাৰগৰাকীয়ে 50 নিযুতৰো অধিক গ্ৰাহক অৰ্জন কৰিছে ।
