গোলাঘাট, 19 মাৰ্চ: "মুখ্যমন্ত্ৰী হিমন্ত বিশ্ব শৰ্মা এগৰাকী দূৰদৰ্শী ব্যক্তি ৷ তেখেতৰ অংক ভূল নহয় ৷ তেখেতে নিশ্চয় সকলো পৰিস্থিতি পৰ্যবেক্ষণ কৰি তেনেকৈ কৈছে ৷ তেখেতৰ কথা ফলিয়ালে ভাল হয় ৷" সোমবাৰে মুখ্যমন্ত্ৰীৰ বক্তব্যৰ সমৰ্থনত এই মন্তব্য আগবঢ়ায় কাজিৰঙা লোকসভা সমষ্টিৰ বিজেপি প্ৰাৰ্থী কামাখ্যা প্ৰসাদ তাছাই ৷
সমাগত লোকসভা নিৰ্বাচনক কেন্দ্ৰ কৰি সমগ্ৰ দেশৰ লগতে কাজিৰঙা লোকসভা সমষ্টিতো বিভিন্ন ৰাজনৈতিক দলসমূহে ব্যাপক নিৰ্বাচনী তৎপৰতা অৱলম্বন কৰা পৰিলক্ষিত হৈছে । পিচ পৰি থকা নাই শাসনৰ গাদীত থকা বিজেপি দলো । কাজিৰঙা লোকসভা সমষ্টিত কামাখ্যা প্ৰসাদ তাছাক বিজেপি দলে প্ৰাৰ্থিত্ব ঘোষণা কৰাৰ পাচৰে পৰা বিভিন্ন সভা-সমিতিত দেখিবলৈ পোৱা গৈছে প্ৰাৰ্থীগৰাকীক ।
সোমবাৰে গোলাঘাটৰ অসম চাহ মজদুৰ সংঘৰ গোলাঘাট শাখাৰ কাৰ্যালয়ত বিজেপি প্ৰাৰ্থীগৰাকীয়ে সদস্যসকলৰ লগত এক আলোচনাত মিলিত হয় ৷ পূৰ্বতে চাহ মজদুৰ সংঘই কংগ্ৰেছ দলক সমৰ্থন কৰাৰ কথা উল্লেখ কৰি বিজেপি প্ৰাৰ্থীগৰাকীয়ে পূৰ্বতে বিৰোধী শক্তিশালী নোহোৱাৰ বাবেই চাহ মজদুৰ সংঘই সমৰ্থন কৰিছিল বুলি তাৎপৰ্যপূৰ্ণ মন্তব্য কৰে ৷
লক্ষণীয়ভাৱে, বিজেপি প্ৰাৰ্থীগৰাকীয়ে গোলাঘাট জিলাৰ বিভিন্ন স্থানত মাৰাথন প্ৰচাৰ চলোৱা পৰিলক্ষিত হৈছে ৷ সমান্তৰালভাৱে, বিজেপি দলৰ সকলো নেতা-কৰ্মীৰ লগতে মিত্ৰ দল অগপ দলৰ নেতা-কৰ্মীসকলেও ব্যাপক প্ৰচাৰ চলোৱা দেখিবলৈ পোৱা গৈছে । মুখ্যমন্ত্ৰীৰ উপস্থিতিত 26 মাৰ্চত মনোনয়ন পত্ৰ দাখিল কৰিব কাজিৰঙা সমষ্টিৰ বিজেপি প্ৰাৰ্থী কামাখ্যা প্ৰসাদ তাছাই ৷
উল্লেখ্য যে, অসমৰ মুখ্যমন্ত্ৰী হিমন্ত বিশ্ব শৰ্মাই কাজিৰঙা সমষ্টিত বিজেপি দলৰ পৰা প্ৰক্ষেপিত প্ৰাৰ্থী কামাখ্যা প্ৰসাদ তাছাই বিপুল ভোটত জয়লাভ কৰিব বুলি কিছুদিন পূৰ্বে দাবী কৰিছিল ৷ মুখ্যমন্ত্ৰীৰ মন্তব্যৰ প্ৰতি সমৰ্থন জনায় সোমবাৰে কামাখ্যা প্ৰসাদ তাছাই বক্তব্য আগবঢ়ায় ৷
লগতে পঢ়ক: যজ্ঞ কৰিলেও শাপমুক্ত নহয় কংগ্ৰেছ: কামাখ্যা প্ৰসাদ তাছা
