তেজপুৰ, 21 আগষ্ট: “ৰাইজৰ মাজলৈ গৈ অসমক হিংসা আৰু বিভাজনৰ ৰাজনীতিৰ পৰা মুক্ত কৰিব বিচাৰো ৷ আমি সকলোৱে মিলি অসমখন অহংকাৰ, দমনকাৰী আৰু দুখীয়া মানুহক শোষণ কৰা ৰাজনীতিৰ পৰা বচাব লাগিব ৷ কংগ্ৰেছৰ বৰ্তমান উত্থানৰ পৰা ৰাইজৰ মনৰ পৰা শংকাৰ ভাব আঁতৰিবলৈ লৈছে ”- মঙলবাৰে তেজপুৰত এই মন্তব্য আগবঢ়ায় যোৰহাটৰ সাংসদ তথা সংসদৰ উপ-দলপতি গৌৰৱ গগৈয়ে ৷
মঙলবাৰৰ সন্ধিয়া তেজপুৰত শোণিতপুৰ জিলা কংগ্ৰেছৰ দ্বাৰা আয়োজিত এক সম্বৰ্দ্ধনা সভাত অংশ লৈ গগৈয়ে কয়, "লোকসভা নিৰ্বাচন আমাৰ বাবে ছেমি ফাইনেল আছিল, এতিয়া আমি বহিব নালাগে ৷ ছেমি ফাইনেলত আমি জিকাৰ পিছত এতিয়া আমি ফাইনেলত জয়ী হোৱাৰ লক্ষ্য ল’ব লাগে ৷ শোণিতপুৰৰ পাঁচটা বিধানসভা সমষ্টি 5-0 ত জিকাটোৱেই এতিয়া আমাৰ লক্ষ্য ৷”
অনুষ্ঠানত অংশগ্ৰহণ কৰি উত্তৰ-পূৱ ৰে’ল সংমণ্ডলত থলুৱাৰ নিযুক্তিৰ পোষকতা কৰি সাংসদ গগৈয়ে কয়, "ৰাজ্যৰ বিভিন্ন স্থানৰ লগতে উত্তৰ-পূৰ্বাঞ্চলত ৰে’ল আৰু উৰাজাহাজৰ সংযোগ ব্যৱস্থাৰ প্ৰয়োজন আছে ৷ নৰ্থ-ইষ্ট ফ্ৰন্টিয়াৰ ৰে’লৱেত থলুৱা আৰু স্থানীয় লোকক অগ্ৰাধিকাৰ প্ৰদান কৰা হওক ৷ কাটিহাড়, জলপাইগুড়িক নৰ্থ ইষ্ট ফ্ৰন্টিয়াৰ ৰে’লৱেৰ পৰা বেলেগে ৰখা হওঁক ৷ বিহাৰ, কাটিহাড় বা শিলিগুড়িৰ লোকক নিযুক্তি দিয়াৰ সলনি উত্তৰ-পূৰ্বাঞ্চলৰ যুৱক-যুৱতীক নিযুক্তি দিব লাগে ৷"
![MP Gaurav Gogoi critized assam cm and bjp on various issue in Tezpur](https://etvbharatimages.akamaized.net/etvbharat/prod-images/21-08-2024/as-tezpur-03-21aug-visbite-gaurabgogoi-pranabkumardas-7203907_21082024195228_2108f_1724250148_111.jpg)
গগৈয়ে পুনৰ কয় “প্ৰধানমন্ত্ৰীয়ে মন কি বাত কয় ৷ কিন্তু ৰাইজৰ কথা কোনে ক’ব বা কোনে শুনিব ৷ সেয়ে মই ৰাইজৰ লগত আছো, ৰাইজৰ কণ্ঠ হ’বলৈ বিচাৰিছোঁ ৷”
আনহাতে স্মাৰ্ট মিটাৰৰ প্ৰসংগত গগৈয়ে কয়, “বিজেপিয়ে য’ত স্মাৰ্ট শব্দটো লগাই তাতেই গণ্ডগোল হয় ৷ ৰাজ্যৰ মুখ্যমন্ত্ৰীয়ে এনে এটা স্মাৰ্ট মিটাৰ ৰাইজক দিলে যে ইয়াৰ নামত পূৰ্বৰ চাৰিশ টকাৰ বিল আঠশ, হেজাৰ টকালৈ বৃদ্ধি হৈছে ৷ প্ৰধানমন্ত্ৰী মোদীয়ে গুৱাহাটীক এনে স্মাৰ্ট চিটি হিচাপে বনালে যে ইয়াত 15 মিনিট বৰষুণ দিলে মানুহ পাঁচঘন্টা আৱদ্ধ হ’বলগীয়া হয় ৷ বিজেপি চৰকাৰে অতি ধনী মানুহৰ ওপৰত কৰ লগোৱা নাই, সাধাৰণ মানুহৰ ওপৰত কৰ লগাইছে ৷ চৰকাৰৰ আৰ্থিক বিফলতাৰ প্ৰতিফল সাধাৰণ মানুহে ভুগিছে ৷ চৰকাৰে ধাৰ মাৰিবলৈ এইদৰে মাচুল বৃদ্ধি কৰিছে ৷ ”
গগৈয়ে আৰু কয়, “2024 ত দেশ আৰু ৰাজ্যত বৃহৎ ৰাজনৈতিক পৰিৱৰ্তন হৈছে ৷ ইয়াৰ আগলৈকে মানুহ বিজেপিলৈ গৈছিল ৷ কিন্তু এতিয়া মানুহে কংগ্ৰেছলৈ আহিবলৈ বিচাৰিছে ৷ বিজেপিয়ে এক দেশ এক নিৰ্বাচন বুলি মুখেৰে কৈ পৃথকে নিৰ্বাচন অনুষ্ঠিত কৰিছে ৷ একেলগেনিৰ্বাচন অনুষ্ঠিত কৰাৰ সাহস বিজেপিৰ নাই ৷ ইমান দীঘলীয়া সূচীৰে নিৰ্বাচন অনুষ্ঠিত কৰা এয়ে প্ৰথম ৷ এতিয়া মহাৰাষ্ট্ৰকে ধৰি চাৰিখন ৰাজ্যত অনুষ্ঠিত হ’বলগীয়া নিৰ্বাচনতো বিজেপি পৰাভূত হ’ব ৷”
![MP Gaurav Gogoi critized assam cm and bjp on various issue in Tezpur](https://etvbharatimages.akamaized.net/etvbharat/prod-images/21-08-2024/as-tezpur-03-21aug-visbite-gaurabgogoi-pranabkumardas-7203907_21082024195228_2108f_1724250148_299.jpg)
লগতে গগৈয়ে আলফা (স্বা) বোমা সংস্থাপন কৰা সন্দৰ্ভতো প্ৰতিক্ৰিয়া প্ৰকাশক কৰি কয়, "আৰক্ষীক এতিয়া কয়লা, গৰু আদি ছিণ্ডিকেটত ব্যস্ত কৰা হৈছে ৷ ছিণ্ডিকেট নিয়ন্ত্ৰণত আৰক্ষীক ব্যৱহাৰ কৰাৰ বাবেই 15 আগষ্টত আলফা (স্বা) এ ৰাজ্যৰ 25 টা স্হানত সন্দেহজনক সামগ্ৰী ৰাখিব পাৰিলে ৷ এই ব্যৰ্থতাৰ দাযিত্ব গৃহ বিভাগৰ দায়িত্বত থকাসকলে তথা আৰক্ষীৰ বৰমূৰীয়াসকলে স্বীকাৰ কৰিব লাগে ৷ মুখ্যমন্ত্ৰী ড° হিমন্ত বিশ্ব শৰ্মাক অহেতুক আৰু যুক্তিহীন কথা কৈ থাকিবলৈ ৰাইজে মুখ্যমন্ত্ৰী পতা নাই ৷ তেওঁক গুৱাহাটীৰ বানৰ কথা ক’লে তৰুণ গগৈৰ প্ৰসংগ উনুকিয়ায় ৷ সকলো কথাতে তেওঁ মাত্ৰ জিহাদ জিহাদ কৰিয়েই থাকে ৷ যেতিয়ালৈকে তেওঁক বিদায় দিয়া নহয় সেই পৰ্যন্ত তেওঁ কেৱল জিহাদ জিহাদেই কৰি থাকিব ৷
উল্লেখযোগ্য যে, মঙলবাৰে তেজপুৰস্থিত জিলা কংগ্ৰেছৰ কাৰ্যালয়ত আয়োজিত এই অনুষ্ঠানত জিলা সভাপতি দাদুল বৰকাকতিৰ লগতে ৰাজ্যিক কংগ্ৰেছৰ উপ-সভাপতি মাধুৰ্য গোস্বামী, জিলা সাধাৰণ সম্পাদক নয়ন গোস্বামী, বেনু নাথৰ উপৰি ঢেকিয়াজুলি, তেজপুৰ, বৰছলা, ৰঙাপৰা, নদুৱাৰ সমষ্টিৰ বিভিন্ন কংগ্ৰেছ কৰ্মকৰ্তা উপস্থিত থাকে ৷