গুৱাহাটী, ১৫ ফেব্ৰুৱাৰী : ‘যিসকলে ভাৰতীয় জাতীয় কংগ্ৰেছক দুৰ্বল কৰিম বুলি ভাবিছে তেওঁলোকে ভাৰতীয় জাতীয় কংগ্ৰেছৰ এটা বেজীৰ সমানো ক্ষতি কৰিব নোৱাৰে’, এই মন্তব্য কংগ্ৰেছৰ বিধায়ক ৰেকিবুদ্দিন আহমেদৰ । উল্লেখ্য যে, এটাৰ পাচত আনটোকৈ মোক্ষম আঘাতৰ সন্মূখীন হোৱা কংগ্ৰেছ দলৰ দুজনকৈ বিধায়কে আনুষ্ঠানিকভাৱে দল ত্যাগ নকৰিলেও বিজেপি চৰকাৰৰ প্ৰতি সমৰ্থন আগবঢ়াই বিজেপি দলৰ প্ৰতি নিজৰ আনুগত্য স্বীকাৰ কৰিলে ।
- " class="align-text-top noRightClick twitterSection" data="">
বুধবাৰে কংগ্ৰেছৰ বিধায়ক কমলাক্ষ দে’ পুৰকায়স্থ আৰু বসন্ত দাসে চৰকাৰখনৰ প্ৰতি সমৰ্থন আগবঢ়ায় । যাক লৈ এতিয়া ৰাজ্যৰ ৰাজনীতিত ব্যাপক খলকনিৰ সৃষ্টি হৈছে । এই সন্দৰ্ভত বৃহস্পতিবাৰে সংবাদ মাধ্যমৰ আগত প্ৰতিক্ৰিয়া ব্যক্ত কৰি বিধায়ক ৰেকিবুদ্দিন আহমেদে কয় যে ভাৰতীয় জাতীয় কংগ্ৰেছৰ কোনেও কোনো ধৰণৰ ক্ষতি কৰিব নোৱাৰে ।
অহাবাৰ ৰাহুল গান্ধী ভাৰতৰ প্ৰধানমন্ত্ৰী হ’ব বুলি বিধায়কজনে দাবী কৰে । অসমত দলৰ যিটো নিদৰ্শন দেখা পোৱা গৈছে সেইটো ভাল নিদৰ্শন নহয় বুলি তেওঁ সদৰী কৰে । সংবাদ মাধ্যমক বেছি ইফাল-সিফাল কৰি কোনো লাভ নাই বুলি সদৰী কৰি তেওঁ কয়, ‘আপোনালোকে কিছুমান কথা ইফালে আৰু সিফালে কৰে । এনেকুৱা নকৰিব ৷ আপোনালোকৰ লগত আমাৰ এটা জীৱনজোৰা সম্পৰ্ক আছে । আমাৰ মাজত সু-সম্পৰ্কৰ দেৱাল আছে ।’ মিডিয়াৰ পৰা আমি শিকো বুলি সদৰী কৰি তেওঁ কয় যে ৰাজনীতিকৰ বাবে মিডিয়া ৰাজনৈতিক জীৱনত এটা বহুত ডাঙৰ শিকনি হয় ।
তেওঁ লগতে কয় যে যিসকলে ভাৰতীয় জাতীয় কংগ্ৰেছক দুৰ্বল কৰিম বুলি ভাবিছে তেওঁলোকে নোম এডালো লৰাব নোৱাৰে । ‘কোনোবা নেতা যাব, হাজাৰজন নেতা ওলাব অনাগত সময়ত ভাৰতীয় জাতীয় কংগ্ৰেছে তাৰ প্ৰতিফলন ভালদৰে দেখুৱাই দিব । ইয়াৰ বাবে বৰ বেছি দিন নাই’ বুলি উল্লেখ কৰে তেওঁ ।
লগতে পঢ়ক : কংগ্ৰেছ দল হৈছে সাগৰ; কংগ্ৰেছৰ পৰাই সৃষ্টি হৈছে নেতাৰ : গৌৰৱ গগৈ
